Read Central Asmat AEMAWIRISAS 12 Bible Online

AEMAWIRISAS 12 - Central Asmat bible

AEMAWIRISAS 12

¹Barewen. E jofay ara, e raja Herodes e wun Yesus basicim barewsi ow ajurusumefen.

²Aram tentara ipic, e Yakobus, parang basakamtiw jirmec ajirimefen. E Yakobus, Yohanes arepwec arawen.

³E Herodes e ow ajurusumef, e Yahudi ow jak akat aememfesen. Aramat ipicam inimas aporef, ar wun ow aojurusumefen. Aram Petrus ban akimomefen. Eras pokbwi aman arawen. E pokbwi juwas Bibit Opok Roti Pokbwi arawen.

⁴Ar Petrus akimomef masirin, e penjara cem afimimefen. Aram tentara ow enam belas ajiwar, manmok e Petrus batiw jirmec ajirimefen. E tentara ow empat ajiwar emema, ajisosa, wunam empat ajiwar emema, ajisosa, inim manmok batiw ow aererememefen. Herodesam atakam asakamtiwefen. “E Bakamsow Pokbwi acices, dor a Petrus, a ow bipu boworpor afimisimcimin.” Inim aeefen.

⁵Inimas ara, ow, Petrus, penjara cem aman aakamjirimapomfesen. E Yesus basicim barewsi ow nat, e Petrus, janim fak Allah aanimfesen.

⁶Herodes, e Petrus, ow bipu bafimisim jofay aenawefen. E iram ara, Petrus, tentara ipic jamnuk wowoc, isi aemamesefen. Bap ara, tentara ow rantai jamnuk e Petrus ajiktewfesen. Wun tentara owam, e penjara manmok batiw, e jimasappu aememfesen.

⁷Bare, Tuhan malaikat erasan asarimememefen. Seream e kamar aman aseremefen. E malaikatam Petrus e damwic apottewef, wunam aramat ipic ajitimefen. “Basitey. Sarima.” Inim aeefen. Bare, e ban manam ajiktewfes rantai asuruneyefen.

⁸E malaikat masirin, “E ase manam pok bajikapomey. E sandalam bajimomey.” Inim aeefen. Petrusam inimas cowok aemefen. E malaikat masirin, “E baju bajimomey. Oram fa asatcan.” Inim aeefen.

⁹Bare, Petrus e malaikat fa asoromomisefen. Ar e malaikat aemefas, pok anakat bapor opoken. Ar pok cowok desen aporef inim arawen.

¹⁰Bare, ar e sotop manmok batiw ow asan aokorsakayenfes, wunam ar e wowoc manmok batiw ow asan aokorsakayenfesen. Ar masirin, e cesennak sey jimasappu ajaremfesen. Er e kota bafis jimasap arawen. Bare, e jimasap arma amuapefen. E ow masirin, e jimasap awarimfisfesen. Aram bokotpu cowok ajarfesen. Bokotpu cowok ajarfes masirin, e malaikat e aramat ipic bakan asarimjiosefen.

¹¹Bare, Petrus, e aemefas, umuton aporkurumef, wunam atakam aotawefen. “Tuhan, amalaikat, do bajortew jirmec ajirimef. Inimas Herodes dor bwemjurusum asan opok. Aram e malaikat e Yahudi ow aemcemenesas do bajortew, jirmec ajirimef. Dor wow inimas aporkurumamin.” Inim aeefen.

¹²Aramat ipic inimas aporkurumef masirin, ar Maria cem ajisosefen. E Maria, Yohanes arosowoc arawen. E Yohanes masirin, wun juwas Markus arawen. Erasan ow arke janim Allah manim bap ajarewsiapfesen.

¹³Petrusam e cesen jimasap, akakajumefen. Kerja bwemtam cowoc juwas Rode masirin, e jimasap bapayimtam ajisefen.

¹⁴Ar Petrus atakam jipi aporef ara, aram jak akat aememefen. Inimas ar e jimasap bapayimtam opokut arew. Aramat cowoc e cem aman akukujiwef, wunam atakam e ow aotawefen. “Petrus e jimasap awamec.” Inim aeefen.

¹⁵E ow masirin, “Or jayic ara.” Inim aefesen. Aramat cowoc nat, “Totok opok. Petrus e cesen awamec.” Inim atakam fak aotawefen. E ow masirin, “Ja amalaikat ara.” Inim aefesen.

¹⁶Petrus nat, e jimasap kaju kaju aoemefen. E ow masirin, e jimasap apayimtamfes, wunam Petrus bi aporfesen. Bare, aram junum aefesen.

¹⁷Petrusam e ow jokon bajiem ban sosin asowimefen. Wunam ar Tuhan e penjara aman atewisimefas, atakam e ow aotawefen. “Inim atakam Yakobusam, e wun Yesus mamkawi owam, mamotawey.” Inim aeefen. Petrus masirin, wun asan ajisosefen.

¹⁸Barewen. Jo apuefen. Jo apuef masirin, e tentara ow jisuwan awut ajifesen. “E Petrus wace?” Inim aefesen.

¹⁹Herodesam, Petrus bapowtew, emporef opoken. Ar masirin, e penjara manmok batiw ow aoworporef, wunam e ow bacatiw jirmec ajirimefen. Bare, e Herodes, Yudea capinmi ewjisosef, wunam kota Kaisarea ajisosefen. Aram erasan aemapawirien.

²⁰Barewen. E Herodes, jokmen atakam e kota Tirus owam, e kota Sidon owam, aotawa aeefen. Aram amos pok e ow sey aseyetama ajimepen. Inimas e ow e Herodes bipu atakam mamtaw janim aanimfesen. Aram pay bwe akat arawen. Jipic juwas Blastusam aememefen. Ar e raja cem pok manmok batiwtam ipic arawen. E owam e Blastus, atakam e Herodes akac botaw, janim aanimfesen. E Blastusam inimas akat arawen.

²¹Bare, e Herodes e ow atakam mamtaw jofay asakamtiwefen. E jofay aenawef ara, aramat ipic e araja pakaian dinas ajimwimefen. Aram araja fa bemap asan ton aemapef, wunam atakam aotawefen.

²²E ow masirin, atakam afakaytawfesen. “E atakam, asmat ipic atakam opok. Er allah ipic atakam ara.” Inim aefesen.

²³Herodes nat, Allah basicim opok ara. Inimas Tuhan amalaikat, e ipic omop aafefen. Jak aman dimam e ipic anakurumefen. Bare e ipic damir aafefen.

²⁴Barewen. Ow arke, Tuhan atakam, kawey ow aotawfesen. Ow arkeam, e atakam jen ajifesen.

²⁵Barnabasam, Saulusam, erasan kerjaas takas aemtiwkurumfesen. Aemtiwkurumfes masirin, aram Yerusalem bakan ajiemfesen. Aram Yohanes Markus atewfesen.