Read Central Asmat AEMAWIRISAS 14 Bible Online

AEMAWIRISAS 14 - Central Asmat bible

AEMAWIRISAS 14

¹Barewen. E Paulusin Barnabas e Ikonium aememfes, ar e Antiokia aemfesas, inimas cowok aoemfesen. Ar e sembahyang cem afiwfesen. Aram atakam faknakut aotawfesen. Inimas Yahudi ow arkeam, Yahudi opok samat ow arkeam, Yesus asicimfesen.

²E Yesus atakam aopowfes Yahudi ow nat, e Yahudi opok samat ow atakam aototomerfesen. E wun Yahudi opok samat ow masirin, bifan e Yesus mamkawi ow afayomfesen.

³Inimasam ara, e atakam botaw batewosom ow, tarey bwinakut aememawirisen. Aram jak fak aememawiris, wunam Tuhan atakam aotawa ajiawirisen. Aram, “Tuhan, asan akat bom ipic ara,” inim aea ajiawiris. Tuhanam fakas e ow atetama ajiawirien. Inimas e ow junum bweas aema ajiawirisen. Owam e junum bweas apora ajiawiris, aram e ow atakam, atakamnak apora ajiawirisen.

⁴E kota ow arke nat, bi binip awcawor opoken. Wun ow e Yahudi ow akaten. Wun masirin, e atakam botaw batewosom ow akaten.

⁵E Yahudi opok samat owam, e Yahudi owam, arownucur owam, e atakam botaw batewosom ow bwemsokom, atakam atawfesen. Aram ek, e atakam botaw batewosom ow dampu bajimirokopom, atakam atawfesen.

⁶E atakam botaw batewosom ow nat, inim atakam jen ajifesen. Ar masirin, e Likaonia kota jamnuk juwas Derbeam, Listraam, e jamamam, omar jisosfesen.

⁷Erasan ar e Atakam Akat acacapiomfesen.

⁸Barewen. E Listra ara, bwey jini ipic aemapefen. Aramat ipicam bwey jini jak aman ewomisef cowok arawen. Aram bacowojar amsom opok cowok arawen.

⁹Aramat ipicam e Paulus atawa aeef atakam jen ajia aeefen. Aram, “Tuhan bwey akat do batetam fakas aomomamar araman,” inim atakam asicimefen. Paulusam manmok e ipic aoromsimapomefen. Ar e ipic basicim fak aporefen.

¹⁰Ar masirin, atakam awut aotawefen. “Emtow sitemey,” inim aeefen. Aramat ipic masirin, asarimsitef, wunam acowojarefen.

¹¹E ow arkeam e Paulus aemefas aporfesen. Aporfes masirin, e Likaonia atakam, awutut atawfesen. “Allah jamnuk, asmat bi inim ajaworemfes. Aram dabipu aneyfes.” Inim aefesen.

¹²E ow masirin, Barnabas wun juwas “Seus” aamemfesen. Aram Paulus e atakam botaw ipic aporfes, inimas ar aramat ipic juwas “Hermes” aamemfesen.

¹³Bare, agama Seus sembahyang cemam e kota sotop aemamesefen. E agama Seus kepala ipic, sapi jipic mamincopam, os ciwewam, e kota pagar jimasappu atowocenefen. Aramat ipicam, e ow arkeam, e sapi e Paulusin Barnabas mami bacatitam aefesen. Aram e os ciwew mami batetam aefesen. Eras e ipic jamnuk basicimas arawen.

¹⁴E atakam botaw batewosom ipic jamnuk juwas Barnabasin Paulus, inim atakam jen ajifesen. Inim atakam jen ajifes masirin, ar arop pakaian akakamosomfes, wunam e ajarewsifes ow arke aman, jeten aterejiwfesen. Aram atakam afakayfesen.

¹⁵“Awamcokom owa. Ucim inimas emamokom? Dar asmat ow, car cimin awamcom ara. Dar e Atakam Akat car acacapiomamenom. Er car e suw pok bak bapayemas ara. Eram car e jiwne epcom Allah mamkawias ara. Ametnak ara, aramat ipic e onam opam, e capinmiam, e jicupum bwiam, e pokin pokin takasam, akenemapomefen.

¹⁶Ametnak ara, aramat ipic e samat takas arop bokotpu bacowojar, atetamawiri.

¹⁷Aramat ipic nat, arakatas, car aporomtamawirin. Ar onam op te atewnemtamawirin. Aram pok akan anakatas bwi bwenem atetamawirin. Aram amos pok car atetamawirin. Aram jak akat car aemtamawirin.” Inim aefesen.

¹⁸Inim atakamam aotawfes nat, e ow arke, e pok a mami bacatitamken arawen.

¹⁹Barewen. Wun Antiokia Yahudi owam, wun Ikonium Yahudi owam, aenawfesen. Ar e ow arke atakam aototomerfesen. E ow masirin, ek e Paulus dampu ajimirokopomfesen. Aram aramat ipic e kota cesen ajijimomisfesen. Aramat ipic damir emcaafef inim arawen.

²⁰E Yesus mamkawi ow nat, e Paulus fumi aamciremfesen. Aramat ipic masirin, asitef, wunam e kota aofiwefen. Ajofay masirin, ar Barnabascin kota Derbe ajisosfesen.

²¹Aram e Atakam Akat e kota ow acacapiomfesen. Aram ow arke Yesus mamkawi amememtamfesen. Bare, ar Listraam, Ikoniumam, Antiokiaam, aofasifesen.

²²Ar e Yesus mamkawi ow jak fak aemapomfesen. “Yesus basicim, bakarompim arapok. Dar takas ajurusemcomom. E nat, asep ara, dar Allah Pemerintah Asan afiwemcomom.” Inim aefesen.

²³Aram e Yesus basicim barewsi ow asanin asanin, ketua ow atewemfesen. Aram e ow janim Allah akac aanimfes, wunam amos pok amasefesen. Paulusin Barnabas masirin, e ow, e asicimfes Tuhan ban ton, atetamfesen.

²⁴Barewen. Aram Pisidia capinmi akorfisfes, wunam Pamfilia capinmi ajaremfesen.

²⁵Aram e Allah atakam e kota Perga ow aotawfes, wunam kota Atalia aojisosfesen.

²⁶Aram erasan kapal ewnajuwfes, wunam Antiokia ajirfesen. Bap ara, e Antiokia ow, e ipic jamnuk, Allah ban ton atetamfesen. Bapam ara, ar Allah, e ipic jamnuk, asan akat batetam, janim aanimfesen. E ipic jamnuk e Allah kerjaas emeemtamkurumfes, wunam e Antiokia ajirfesen.

²⁷Bare, aram Antiokia ajaremfesen. Antiokia ajaremfes masirin, ar e Yesus basicim barewsi ow aaramsimapomfesen. Ar Allah e arakac aemfesas afasimfesen. Allaham, e Yahudi opok samat, Yesus basicim bi binip atetamefas, inim atakam afasimfesen.

²⁸Bare, ar e Yesus mamkawi ow piw opok ajamemapfesen.