Read Central Asmat AEMAWIRISAS 15 Bible Online

AEMAWIRISAS 15 - Central Asmat bible

AEMAWIRISAS 15

¹Barewen. Yudea capinmi ow e Antiokia ajaremfesen. Aram atakam e Yesus mamkawi ow amememtamfes. “Ametnak ara, Musa sunat bwem adat atatitamefen. Ow car sunat bwemtiw opok aecan, Allah car bajortew opok ara.” Inim aefesen.

²Paulusin Barnabas nat, e ow atakam awutnakut aamtawfesen. E Yesus mamkawi ow masirin, atakam aamsakamfesen. Ar Paulusam, Barnabasam, e wun owam, Yerusalem baysos, wunam e atakam botaw batewosom owam, e ketua owam, e sunat atakam jonow batowpor, inim atakam aamsakamfesen.

³Bare, e Yesus basicim barewsi ow e ow atewosomfesen. E bowsec ara, ar Fenisia capinmiam, Samaria capinmiam, akorfisfesen. Erasanam ara, ar e Yahudi opok samat ajarewemfesas, atakam e ow aotawfesen. Inimas ar e Yesus mamkawi ow, jak akatnakut aemapomfesen.

⁴Bare, aram Yerusalem ajaremfesen. E Yesus basicim barewsi owam, e atakam botaw batewosom owam, e ketua owam, e ow atowomiwfesen. E ow masirin, e Allah aemefas takas, atakam atawfesen.

⁵E wun Yesus mamkawi ow nat, e Parisi ow ajamkawifesen. E owam asitfes, wunam atakam aotawfesen. “E ow sunat baemces. Eras e Musa Jirmec jipu ara.” Inim aefesen.

⁶E atakam botaw batewosom owam, e ketua owam, eras atakam mamsakam ajarewsiapfesen.

⁷Aram atakam jirow aamtawfesen. Atakam jirow aamtawfes masirin, Petrus asitef, wunam atakam aotawefen. “Dojowow akatonokom. Ametnak ara, Allah dor e cawowoc aeremtewfan. Ara e Atakam Akat e Yahudi opok samat botaw aeremtewfan. Er e owam Yesus basicimas ara. Car inimas camsom.

⁸Bare, Allah ow ajak amanas takas amsom. Ar e Yahudi opok samat owam atatef. Aram inimas aporomtamef. Inimas ar e Roh Kudus e owam atetamef. Ar e Roh Kudus dar atetamforow inim awcawor ara.

⁹Aram, ‘E Yahudi samat aropas ara. E Yahudi opok samat aropas ara,’ inim baji opok. E owam Yesus asicimfes. Inimas Allah e ow jak aman dosa akokoromosomef.

¹⁰Inimas ara, car Allah bwempor aemamokom, ucimasam? Car jutur pok e Yesus mamkawi ow sey ton atatiwmokom. E nat, caram, carafasutmaram, e pok bwemtew asan opok.

¹¹Tuhan Yesus dar mami ajortetamcemarow. Ar e owam mami ajortetamcema. Dar inim atakam asicimamom ara.” Petrus inim aeefen.

¹²Barewen. E ow arke takas jokon cowok ajiapfesen, Barnabasin Paulus, e Allah aemefas, atakam e ow aotawfesen. Bap ara, Allah afakas e ipic jamnuk atetamefen. Inimas ar e junum bweas e Yahudi opok samat bipu aemfesen. Aram inim atakam e ajarewsiapfes ow aotawfesen.

¹³E ipic jamnuk inim atakam aotawkurumfes masirin, Yakobusam atakam aotawefen. “Dojowow akatonokom. Doratakam jen pajiey.

¹⁴Allah e Yahudi opok samat bajom opok aemef. Ar e wun Yahudi opok ow, amamkawi ow memem aereremtawef. Simonam eras atakam atawor.

¹⁵E ametnak atakam botaw owam, inim atakam cowok tulis aeapomfes:

¹⁶‘Tuhan atakam, Ow eras aemkurumces, aofasicimin. Dor Daud aneypupuamesef cem aoeapomcimin. Dor e daniwis cem aoeapomcimin. Dor e cem aotawkenemapomcimin.

¹⁷Inimas e wun ow takas Tuhan apowcemes. Er e dorow memem ajateof Yahudi opok samat ow ara.’

¹⁸Tuhan inim atakam atawmar ara. Aram tareynakut inim atakam atawawiri.” E ametnak Allah atakam botaw ow inim atakam tulis aeapomfesen.

¹⁹“Bare, e wun Yahudi opok samat ow, bin afirimames, wunam Allah ajamkawimes. Dobi binip ara, dar e ow bajurusum arapok.

²⁰Wunam dar surat e ow batiwirimamoc. E surat atakam, ‘Ow, pok, ēco bipu atatitamcemes. Inimas ar e ēco asicimcemes. Bare, car e pok memem arapok. Caram cen cemen osom arapok. Tana cowoc cen ban arapok. Bisatiw cemen ban arapok. Es epcom damir aafef binatang das memen arapok. Esam memen arapok.’ Inim surat batiwirimamoc.

²¹Bare, tareynakut ara, ow e kotain kotain, Musa Jirmec atakam acacapiomawiris. E Ses Ban Jo takas, ow e sembahyang cem aman e Jirmec baca aemames.” Yakobus inim aeefen.

²²Barewen. E atakam botaw batewosom owam, e ketua owam, e Yesus basicim barewsi ow takasam, atakam aamsakamfesen. Ar aramaman ow batewem, wunam e ow e Paulusin Barnabas akac, e Antiokia batewosom, inim atakam aamsakamfesen. Ar Yudas aeremtewfesen. Awun juwas Barsabas arawen. Aram Silas aeremtewfesen. Bare, e ipic jamnuk e Yesus basicim ow akepala ow arawen.

²³Aram inim surat aeapomfes, wunam atiwirimfesen: “Car kota Antiokiaam, Siria capinmiam, Kilikia capinmiam, Yahudi opok samat Yesus mamkawi ow awapokom ara. Dar masirin, atakam botaw batewosom owam, ketua owam, awapom ara. Daram Yesus mamkawi ow ara. Dar Selamat atakam car aotawmenom.

²⁴Atakam jen ajifom ara, wun darow atakam car aotawfan. E atawfes atakam jen ajifokom, caram jak pwicak aememfokom. Caram bi binip arke aceceremfokom. Dar ara nat, e ow inim atakam car botaw, jirmec bajirim opok.

²⁵Bare, daram ajarewsiapfom. Ajarewsiapfom, daram bi binip cawor aceceremfom. Bare, dar atakam bajomattam ow aeremtawfom. E ow e Barnabasin Paulus carasan akac ajisoscemes. Bare, dar e Barnabasin Paulus damos awut ajiomamom.

²⁶E ipic jamnukam, e Yesus Kristus daTuhan kerja aemtamfes ara, aram poman bwey damir acemfes.

²⁷Bare. Dar Yudasin Silas car atewenamtamcemenom. Ar, e surat aemom atakam, arma car aotawceman.

²⁸E Roh Kudusam, daram, bi binip cawor aceceremamom. Inimas dar jutur pok e casey ton batatiw arapok aemom. Daram awames jirmec cawinak mamincop car ajirimamenom.

²⁹Bare, car ow, ēco bipu atatitamfes pok, memen arapok. Caram es memen araok. Caram es epcom damir aafef binatang das memen arapok. Caram cen cemen osom arapok. Tana cen ban arapok. Bisatiw cemen ban arapok. Car inim pok bwem opok aemcokom, car akat aemcomokom. Da bare. Dormomo.” Inim surat atetamfesen.

³⁰Barewen. Ar e ow atewosomfesen. E ow masirin, Antiokia ajisosfesen. Aram e Yesus basicim barewsi ow takas aaramsimtewfes, wunam e surat e ow atetamfesen.

³¹E ow e surat baca aemfes, wunam jak akat aememfesen. E surat atakam jak fak bemapomas aporfes arawen.

³²E Yudasin Silas, Allah atakam botaw ow arawen. Aram atakam jirow, e ow aotawfesen. Aram e Yesus mamkawi ow jak atakam, jak fakam, aemapomfesen.

³³Aram tarey pwiciri erasan aemapfesen. E Antiokia Yesus mamkawi ow masirin, e Yudasin Silas asan akat atewosomfesen. Bare, e Yudasin Slas e bap ar atewosomfes ow bipu, aojisosfesen.

³⁴E Paulusin Barnabas nat, e Antiokia aoemapfesen. Aram, wun ow arkeam, Tuhan atakam e ow amememtamfesen. Aram e Atakam Akat acacapiomfesen.

³⁶Asep jofay masirin, Paulus atakam Barnabas aotawefen. “Dey. Dar e Tuhan atakam acacapiomfom kota takas bojisosmoc. E Yesus mamkawi ow, asan akat epen bapormoc.” Inim aeefen.

³⁷Bare, Barnabas e Yohanes Markus batew aeefen.

³⁸Bap ara, Yohanes e Paulusin Barnabas e Pamfilia capinmi bakan ajiefen. Aram e kerjaas akac bwem opok. Paulus eras aporefen. Inimas ar Yohanes botew pwicaken.

³⁹E Paulusin Barnabas atakam awut aamtawfesen. Inimas aampakapifesen. Bare. Barnabas, e Markus atewef, wunam Siprus ajirfesen.

⁴⁰Paulus masirin, e Silas aeremtewefen. Aram ajisosfesen. E Yesus mamkawi owam, e ipic jamnuk, Allah ban ton atetamfesen.

⁴¹Paulus masirin, e Siria capinmiam, e Kilikia capinmiam, akorfisefen. Ar e Yesus basicim barewsi ow, jak fak aemapomefen.