Read Central Asmat AEMAWIRISAS 17 Bible Online

AEMAWIRISAS 17 - Central Asmat bible

AEMAWIRISAS 17

¹Barewen. E Paulusin Silas kota Amfipolisam, kota Apoloniaam, akorfisfes, wunam kota Tesalonika ajaremfesen. Erasan Yahudi ow asembahyang cem aemamesefen.

²Bare, Paulus e cem afiwefen. Ar e asanin asanin Yahudi sembahyang cem inim cowok aema ajimepen. Bare, Ses Ban Jo mamincop ara, aramat ipic e Alkitab atakam e ow aamtawefen.

³Aram e Alkitab atakam umuton aotawefen. “Allah, e Aeremtewef Ipic bajurusum, at aetiwef. Aram e ipic bojaworsit at aetiwef. E acacapiomamin ipic juwas Yesus, e Allah Aeremtewef Ipic ara.” Inim aeefen. Aram inim atakam Alkitab ayat baca aemtamefen.

⁴E wun ow inim atakam, atakamnak aporfes, wunam ar e Paulusin Silas ajamkawifesen. Allah basicim fak Yunani ow arkenakutam, cepesnucur arkeam, e Paulusin Silas ajamkawifesen.

⁵E Yahudi ow nat, inimas bifan afayomfesen. Aram basorowjar jursumec ow atewfes, wunam e ow jokmenas bwem jipic bajitem atakam atawfesen. Bare, Yahudi owam, e jicop ajitemfes owam, e kota jisuwan awutnakut ajifesen. Aram e Paulusin Silas apowporfesen. Inimas ar Yason cempu ajisosfesen. Ar e ipic jamnuk cesen batowomis, wunam ow arke bipu batowocen, akat arawen.

⁶Bare, ar e ipic jamnuk bapowtew opoken. Ar masirin, a Yasonam, e wun Yesus mamkawi owam, e kota pemerintah ow bipu acajimtawfesen. Aram atakam afakaytawfesen. “A ow a capinmi asan takas ajurusumames. Aram arasan aenawfes.

⁷Yasonam e ow acem atowomiwef. E ow takas e Roma raja ipic jirmec aopowmes. Aram atakam aotawmes. ‘Wun raja ipic juwas Yesus awap,’ inim aemes.” E ow inim aefesen.

⁸E ajarewsiemfes owam, e kota pemerintah owam, inim atakam jen ajifes, aram jak pwicaknakut aememfesen.

⁹E pemerintah ow masirin, jirmec e Yasonam, e wun owam, ajirimfesen. “Car uang takamtetamcarowey. Dar masirin, car basurumtam ara.” Inim aefesen. Bare, e ow, e uang, e pemerintah ow atetamfesen. E pemerintah ow masirin, e ow asurumtamfesen.

¹⁰Barewen. Iram ara, e Yesus mamkawi ow, e Paulusin Silas, kota Berea asarimtewosomfesen. Erasan ajaremfes, ar Yahudi ow asembahyang cem afiwfesen.

¹¹E Berea ow nat, ow akat pwiciri. E Tesalonika ow masirin, pwicak pwiciri. Inimas e Berea ow, e atakam, jen akat ajifesen. Aram join join e Alkitab aoworporfesen. Ar e Paulus atawef atakam, atakamnak epen baporkurumen.

¹²Inimas ara, ow arke Yesus asicimfesen. Yunani ownucur arkeam, cepesnucur arkeam, Yesus asicimfesen.

¹³E Tesalonika Yahudi ow nat, “Paulus e Allah atakam, Berea ow aotawma,” inim atakam jen ajifesen. Ar masirin, erasan ajisosfes, wunam ar e ow arke jokmen memem, jak aseseremtamfesen.

¹⁴Bare, e Yesus mamkawi ow e Paulus e jopir asarimtewnemfesen. Silasin Timotius nat, e Berea cowok aemapfesen.

¹⁵E Paulus mametowoney ow, kota Atena ajiwar, akec ajarfesen. Paulus masirin, “Car e Silasin Timotius arasan sarimnakut bwenaw atakam mamotawey.” Inim aeefen. E ow masirin, aojisosfesen.

¹⁶Barewen. Paulus e ow Atena bwenaw manmok cowoctiwapefaw, ar e kota ēco arkenakut aporefen, inimas ar jak pwicak aemapefen.

¹⁷Inimas ara, ar e sembahyang cem aman, atakam e Yahudi ow aamtawfesen. Aram join join e kota ow barewsiap asan ajisosa aeef, wunam atakam e erasan aemapa aefes ow aamtawa aefesen.

¹⁸E wun Epikuros atakam mamememtam owam, Stoa atakam mamememtam owam, atakam e Paulus aamtawfesen. Wun ow atakam aotawfes, “A suw ipic ucim atakam atawma?” Wun masirin, “Ar kawey allah atakam atawmar openow.” Inim aefesen. Ar Paulus, e Yesus atakamam, e bojaworsit atakamam, acacapiomef aporfes arawen.

¹⁹E ow masirin, e Paulus atewfes, wunam e atakam mamsakam asan juwas Areopagus, atowosfesen. Ar masirin, janim Paulus aanimfesen. “Dar e ay atakam atawmem jen bajikurum akat ara.

²⁰E atawmem atakam junum aemom. Dar e atakam, ucim atakamamnew, inim jen baji akat ara.” Inim aefesen.

²¹Join join e Atena owam, e erasan jaki ajitfes jewey owam, ay atakam takas atawawiris arawen. Aram ay atakam takas jen ajiwiris arawen. Ar wun pok bwem opoken.

²²Bare, Paulus e Areopagus asan e wasec asitef, wunam atakam aotawef. “Awapokom Atena owa. E pokin pokin aemamokom ara, car agama mamkawi fak ow apormin ara.

²³Dor arasan acowojarof ara, dor e asicimamokomas, manmok atiwjarof. Doram allah pok bacatiwtam asan aporof. E asanpu ara, asuk wow epcom pok aporof. ‘Ar e namsom opok allah aras ara.’ Inim atakam e asuk wow aporof. Bare, dor e camsom opok asicimamokomas, atakam car aotawmin.

²⁴Allah a capinmiam, a pokin pokinam, akenemapomefen. Bare, aramat ipic a onam opam, a capinmiam, aramat ara. Inimas ar asmat ow akenemapomames sembahyang cem aman bemap opok.

²⁵Asmat ow, aramat ipic, pok bwemfafaytam asan opok. Ar pok opok ipic inim cimin arapok. Aramat ipic nat, e jiwneam, e josesam, e pokin pokin takasam, e asmat ow takas, arma atatamama.

²⁶Aramat ipic asmat ipic cowok akenemapomefen. E samat takas masirin, e asmat ipic sin asifesen. Allaham, e ow, e capinmiin capinmiin apacamapomefen. Bap ara, ar e samat takas aporsipor basit jofay, asakamtiwefen. Aram e samat takas aporsipor banios jofay, atakam asakamtiwefen. Aram e samat takas aporsipor bemap asan, atakam asakamtiwefen.

²⁷Allah, e samat takas a bapowpor akat arawen. E ow, Allah aaramporces, aram aramat ipic atewcemes openow. Allaham inimas akat arawen. Inimas ar e samat takas akenemapomefen. E Allah nat, dar aporsipor dam sotop awamec.

²⁸E wun ow atakam atawfes, ‘Allah jiwne atetamamarow. Aram dam tetakayas atetamamarow. Inimas dar awamcom ara.’ Inim aefes. Bare er atakamnak ara. E caso batakjim owam inim atakam atawfes. ‘Dar aramat ipic atiperes ara.’ Inim aefes.

²⁹Bare, dar Allah atiperes ara. Inimas dar, Allah, mas pok inim cimin ara, inim bi binip bacecerem arapok. Daram ar perak pok inim cimin aranew, ek pok inim cimin aranew, inim bi binip bacecerem arapok. Dar, aramat ipic, asmat akenemapomef pok inim cimin ara, inim bi binip bacecerem arapok.

³⁰Bap ara, Allah, e asmat ow jen aemapawirisas, bapor opok cimin aemawiri. Wow nat, aramat ipic e asanin asanin ow takas dosa bak bapayem jirmec ajirimama.

³¹Bare, Allah, e ow takas adosa, atakam basakamtiw jofay, atakam asakamtiwef. Aram e dosa atakam basakamtiw ipic cowok atewemef. Aram inim atakam, atakamnak, ow baporomtam aememef. Inimas ar e ipic aojaworomsumutumef. Bare, e ipicam atakamnak jipu atakam asakamtiwcema.” Paulus inim aeefen.

³²E ow, e ipic bojaworsit atakam jen ajifes ara, wun ow uc aocfesen. Wun ow nat, “Asep jofay, dar or inim atakam botaw, jen aojicomom.” Inim aefesen.

³³Bare, Paulus, e ow bakan ajiosefen.

³⁴Wun ow nat, aramat ipic ajamkawiemfesen. Ar Yesus asicimfesen. E wun Yesus asicimef ipic juwas Dionisius arawen. Aramat ipic e Areopagus atakam mamsakam ow wun ipic cowok arawen. E wun Yesus asicimef cowoc juwas Damaris arawen. Wun owam arawen.