Read Central Asmat AEMAWIRISAS 18 Bible Online

AEMAWIRISAS 18 - Central Asmat bible

AEMAWIRISAS 18

¹Barewen. Eras aemkurumfes, Paulus kota Atena ewjisosef, wunam kota Korintus ajaremefen.

²Erasan ara, ar Yahudi ipic juwas Akwila bi aporefen. E ipic Pontus capinmi ajisamesefen. Jepen ara masirin, Klaudius, e Yahudi ow takas, e kota Roma bafis, jirmec ajirimefen. Inimas ara, Akwila aremcin Italia capinmi ewenawfesen. Arem juwas Priskila arawen, Paulusam jaki e ow cem ajitefen.

³Akerjaas cowkon aporef, inimas ar e ow cem aemapefen. Aram kerja cowkon aemfesen. Ar picin cem bakenemapom ow arawen.

⁴E Jo Ses Ban Join, Ses Ban Join, Paulus e sembahyang cem aman, atakam aotawawirien. Ar Yahudi owam, Yunani owam, Yesus basicim atakam aotawporawirien.

⁵E Silasin Timotius, Makedonia capinmi ewenawfesen. Aenawfes ara, Paulus e Yesus atakam acacapiomawiri cowok arawen. “Yesus, e Allah Aeremtewef Ipic ara.” Inim atemen e Yahudi ow aatamawirien.

⁶E ow nat, e atakam aopowfesen. Aram cemew atakam aotawfesen. Inimas ara masirin, Paulus e apakaian apapacimef, wunam atakam faknakut aotawefen. “Car neraka afiwapcokom, caram carma. Bare, dor atakam car emcaotawey. Bare, dor wow e Yahudi opok owpu ajisosmin.” Inim aeefen.

⁷Aramat ipic masirin, erasan ewjisosef, wunam Allah basicim ipic juwas Titus Yustus acem afiwapefen. E cemam, e sembahyang cemam, jipamnuk aotomamtiwfesen.

⁸E sembahyang cem kepala ipic juwas Krispusam, acem owam, Tuhan asicimfesen. Korintus ow arkeam e atakam jen ajifes, wunam Tuhan asicimfesen. Ar Tuhan asicimfes masirin, ow e ow bwi abwimfesen.

⁹Barewen. Iram ara, Paulus pok cowok desen aporefen. Tuhanam atakam Paulus aotawefen. “Or omar arapok Atakam mamotawey. Jokon bajiem arapok.

¹⁰Doram or akac aemamin. Ow or bwememsokom asan opok. A kota ow arke, bare, dras apormin ara.” Tuhan inim aeefen.

¹¹Bare Paulus erasan pir delapan belas ajiwar aemapawirien. Aram Allah atakam e ow amememtamawirien.

¹²E nat, Akaya capinmi gubernur ipic juwas Galio aememef, e Yahudi ow, Paulus botpem awarimsitfes cowok arawen. Aram Paulus e boworpor asan atowomiwfesen.

¹³Aram atakam aotawfesen. “E ipic, ow Allah basicim, arop atakam jipu ajomtamama. E atakam nat, e Musa Jirmec atakam jipu opok.” Inim aefesen.

¹⁴E Paulusam atakam bataw aemef. E nat, e Galio, atakam e Yahudi ow, bap aotawefen. “E ipic salah aemefnew, jokmenas aemefnew, bare dor caratakam jen baji araman.

¹⁵E nat, e atakam aamtawmokomas, pok juwas atakam aamtawmokom. Ow juwasam atakam aamtawmokom. Caragama jirmecam atakam aamtawmokom. Inimas ara, dor eras, atakam basakamtiw pwicak.” Inim aeefen.

¹⁶Aramat ipic masirin, e ow e boworpor asan aotewerisimefen.

¹⁷E ow takas masirin, e sembahyang cem kepala ipic juwas Sostenes ban akimomfes, wunam ar aramat ipic, e boworpor asan, omop aaffesen. E Galio nat, inimas bapor opok cimin aemapefen.

¹⁸Barewen. Paulus e Korintus isi arke aoemapefen. Ar masirin, atakam e Yesus mamkawi ow aotawefen. “Do bare. Do baysos.” Inim aeefen. Aramat ipic masirin, Siria capinmi bajir anajuwefen. E Priskilaam, e Akwilaam, akac anajuwfesen. Bap ara, Paulus kota Kengkrea aememef aram atayi Allah aeefen. Inimas ar kus fin wakan aakefen.

¹⁹Bare, e ow kota Efesus asetayfesen. (Asep jofay, Paulus e Priskilaam, e Akwilaam, erasan bakan ajiosefen.) Asetayfes ara masirin, Paulus sembahyang cem afiwefen. Aram e Yahudi ow atakam aamtawfesen.

²⁰E owam e Paulus, erasan jirow pwiciri boemap, janim aanimfesen. Paulus nat, pwicaken.

²¹Aramat ipic masirin, “Do bare. Do baysos. Allah akat aporcow, dor car aofasiomcimin.” Inim aeefen. Bare, aramat ipic Efesus ewnajuwefen.

²²Ar masirin, kota Kaisarea asetayefen. Asetayef masirin, asowkuefen. Ar e Yesus basicim barewsi ow, selamat atakam aotawef, wunam kota Antiokia ajisosefen.

²³Ar erasan isi arke aemapef, wunam aojisosefen. A Galatia capinmiam, Frigia capinmiam, acowojarefen. Erasan ara, ar jak fak e Yesus mamkawi ow takas aemtamefen.

²⁴Barewen. Yahudi ipic juwas Apolos kota Efesus ajinawefen. Ar kota Aleksandria ajisamesef ipic arawen. Aram atakam cescuw ipic arawen. Aram, e Alkitab atakam amsom takasut arawen.

²⁵Bap ara, ow e ipic Tuhan bokotpu atakam emcamememtamfesen. Aramat ipicam, e Yesus atakam, fak aotawefen. E atakamam tarowat aotawefen. E nat, aramat ipic, Yohanes abwi babwimas cowok amsom arawen.

²⁶Aramat ipic, e sembahyang cem aman atakam jak faknakut aotawefen. E Priskilain Akwila nat, aramat ipic aratakam jen ajifes, ar e ipic e acem atowomiwfes, wunam Allah bokotpu, atakam, aramat ipic aotawkurumfesen.

²⁷Bare, e Apolos, Akaya capinmi bajir, atakam atawefen. E Yesus mamkawi ow masirin, “Bare. Akaya capinmi ajirey.” Inim aefesen. Aram e Akaya capinmi Yesus mamkawi ow, e Apolos acem batowomiw, surat aetamfesen. Bap ara, Allah, asan akat, e wun Akaya ow atetamefen. Inimas bapam ara, e ow Yesus asicimfesen. Bare, Apolos e Akaya asetayef ara, ar e ow Yesus mamkawi fak aemtamefen.

²⁸Aramat ipicam, e Alkitab atakam umuton aotawkurumefen. “Yesus, e Allah Aeremtewef Ipic ara.” Inim aeefen. Inimas ar e Yahudi ow, e ow arke bipu, atakam amatinkumimosomefen.