Read Central Asmat AEMAWIRISAS 20 Bible Online

AEMAWIRISAS 20 - Central Asmat bible

AEMAWIRISAS 20

¹Barewen. E jiwusan akarimtiwfesen. Jisuwan akarimtiwfes masirin, Paulus e Yesus mamkawi ow ajateef, wunam atjen aowefen. Ar masirin, “Do bare. Do baysos.” Inim aeefen. Bare, ar Makedonia capinmi ajisosefen.

²Ar e capinmi takas acowojarefen. Aram atjen awutut e ow aowef, wunam Yunani capinmi ajaremefen.

³Ar pir mamincop ajiwar erasan aemapefen. E Yahudi ow nat, aramat ipic bacatiw atakam atawfesen. Paulus, Siria capinmi bajir aememef, aram e atakam jen ajiefen. Ar masirin, atakam asakamtiwefen. “Ajircey, Makedonia capinmi atakamcowojarcimin.” Inim aeefen.

⁴E Paulus ajamjarfes ow, kota Berea ipic juwas Sopater ara. (Aramat ipic Pirus atiw ara.) Kota Tesalonika ipic jamnuk juwas Aristarkusam, Sekundusam, ara Derbe ipic juwas Gayus ara. Timotius ara. Asia capinmi ipic jamnuk juwas Tikikusam, Trofimusam, ara. Inim ow arawen.

⁵E ow nat, bap atakamjirfes, wunam kota Troas ayatapfesen. Ar erasan da manmok afeforowos.

⁶Dar masirn, kota Filipi aemapfom. Dar e Bibit Opok Roti Pokbwi acifom, wunam anajuwfom. Dar e bowsec isi lima ajiwar aemsefom, wunam Troas asetayfom. Erasan ara, dar e ow biamnuk aemamtewfom. Daram e Troas isi tujuh ajiwar aemapfom.

⁷Bare, Hari Minggu ara, daram perjamuan memen ajarewsiapfom. Paulus masirin, atakam e ow aotawef. Ar to tam baysos aememef, inimas ar atakam iramnak ajiwar atatiwef.

⁸E owam pelita arke e ajarewsiapfom op kamar aman atawtopomfes.

⁹Ay ipic juwas Eutikus jendela op aemapef. Paulusam atakam jirownakut atawef. Inimas e ipic isi manmok awutnakut aemapef. Ar masirin, isi apwitapef, wunam e opnakut kamar aewjuneyef. Owam e ipic atewfes, bare damir emcaafef.

¹⁰E Paulus nat, cenes aneyef. Aram e ipic dam ton aemamesef, wunam becer ajipiramesef. Aram atam aotawef. “Car jak pwicak arapok. Aramat ipic awames.” Inim aeef.

¹¹Paulus masirin, e opnakut kamar aoaptometef, wunam e amos akokomtawef. Aram, e wun Yesus mamkawi owam, e amos akac aanfes. Paulus masirin, atakam jopufa aememef. Ar atakam jirow e ow aotawef, wunam ajisosef.

¹²E ow, e ay ipic tetakay atewfes. Bare, arama jak akat aememfes.

¹³Bare. Dar e kapalpu bap atakamjisosfom, wunam anajuwfom. Daram kota Asos ajirfom. Bap ara, Paulus atakam aotawforow. “Bare, car e Asos mamtakamjirey. Dor masirin, e Asos camow aemcimin.” Inim aeforow. Daram, “Bare, dar e Paulus e Asos batowomuw ara.” Inim aefom.

¹⁴Bare, daram e Paulus e Asos biamnuk aoemamtewfom. Daram aramat ipic atowomuwfom, wunam kota Mitilene ajirfom.

¹⁵Daram erasan ewnajuwfom, wunam ajofay wōw juwas Kios awumin aemsefom. Jowan masirin, wōw juwas Samos asetayfom, wunam atojowan kota Miletus asetayfom.

¹⁶Paulusam atakam asakamtiwef. “Dar e Efesus basetay arapok. Dor e Asia capinmi jirownakut bemap pwicak. Dor Yerusalem sarim bajir akat ara. Hari Pentakosta bwenaw opok dor e Yerusalem bajarem akat ara.” Inim aeef.

¹⁷Paulus e Miletus aememef, ar ow jirmec ajirimef. “Car Efesus mamjisosey. E Yesus basicim barewsi ow aketua ow bayte.” Inim aeef.

¹⁸Bare, e ketua ow Pauluspu aenawfes. Aenawfes masirin, aramat ipic atakam e ow aotawef. “E Asia capinmi bap ajarapof jofay, dor car akac aemapfom. E aojisosof jofay ajiwaram, dor car akac aemapawirum.

¹⁹Dor bwec manem epcom, Tuhan kerja aemtamawiru. Doram dorma batawsicim opok. E Yahudi owam, dor bajurusum atakam aamsakamawiris. Inimas dor ajurusemawiru.

²⁰Bare, Allah, asan akat ca bom aememama. Doram e asan akat atakam car bacukumom opok cowok. Caram inimas camsom. Bare, dor e atakam, e ow arke bipuam, e cacem amanam, acacapiomawirin. Doram e atakam car amememtamawirin.

²¹Dor atjen e Yahudi samat owam, e Yahudi opok samat owam aowawiru. ‘E cadosa bak mampayemtotorey. Allah mamjamkawiey. E daTuhan Yesus mamsicimey.’ Inim aeawiru.

²²Bare, dor wow Roh Kudus atakam ji aemin. Inimas dor Yerusalem ajisosmin. Dor e Yerusalem ow aemcenesas, nomsom opok.

²³E nat, e kotain kotain ajisosof ara, e Roh Kudus atakam aotawa aefan. ‘Ow manam or ajikapomcemenes. Oram ajurusemcemem.’ Inim aea aefan.

²⁴Bare, Tuhan Yesus, kerja a bwemtam, jirmec ajirimfan. E kerja ara, e Allah e asan akat atetamcemaras Atakam Akat botaw ara. Bare dor e kerja bwemkurumtiw akat ara. Inimas dor damir aranew, tetakay mememnew, bare awcawor ara.”

²⁵“Bare. Dor e carasanin asanin ajisosawiru, dor Allah Pemerintah atakam car aotawawirin. E nat, car e dobi bopor opok aemcomokom.

²⁶Inimas ara, dor atakam umuton car botaw: wun ow jismak asan afiwapces, e salah arma ara.

²⁷Dor e Allah at aetiwefas, atakam ca bacukumom opok cowok.

²⁸Bare, e aemcokomas pimicima. Caram e Allah mamkawi ow takas manmok mamtiwey. E Roh Kudus car e ow abap ow memem aeremtawtotorfan. Bare, car e Allah basicim barewsi ow manmok mamtiwey— domba manmok batiw ow e adomba manmok atiwcemes inim cimina. Bare, Allah atiw ares airirineyef. Inimas e ow Allah aras ara.

²⁹Doram ajisoscey ara, wasan jokmen juwur, e cawowoc aememcemes. Aram e Allah mamkawi ow saw akat bwem opok aemcemes.

³⁰Wun caramaman ow asitemcemes, wunam suw atakam atawcemes. Ar e Yesus mamkawi ow a mamkawi atakam ajomtamcemes.

³¹Inimas ara, caram manmok faka. Bare tahun mamincop ajiwar, jokam, iramam, dor atjen car aowtotorawirin. Doram bwec manem epcom, atjen car aowtotorawirin. Caram inimas binip manim arapok.

³²Bare, dor ca Tuhan ban ton atetamamin. Aramat ipicam asan akat car aomceman. Caram e asan akat atakam ji aecokom, asan akat aememcomokom. Aramat ipic car a mamkawi fak, bi binip atetamceman. Aram asan akat e ow tarowat aomcema. Inimas ar eras aomceman.

³³Bare, dor ow uangnew, pakaiannew, basinom opok aemawiru.

³⁴Dor dorop pok dorma aemawiru. Doram e dor akac aemawirinis ow, pok afafaytamawiru. Caram inimas camsom.

³⁵E pok takas aemawiru, dor kerja fak aemawiru. Dor car inim jipu bacowoy aporomtamawirin. Daram kerja fak, wunam pok e dam pwicak ow bafafaytam, inimas bwemji. Ametnak ara, Tuhan Yesusam atakam atawefen. ‘Ow pok kawey ow atetamces, aram jak akatnakut aememcemes. E nat, ow pok atewetces, aram jak akat kanim inim aememcemes.’ Inim aeefen. Bare, daram e atakam binip manim arapok.” Paulus inim aeef.

³⁶Inim atakam aotawef masirin, aramat ipicam, e ow takasam, jine opok aneyotapfes, wunam janim Allah aanimfes.

³⁷E ow masirin, bwec awut abwecfes. Aram Paulus becer ajipirfes, wunam ak aafoptotorfes.

³⁸Ar Paulus e ow bi bopor opok atakam aporfes, inimas jak pwicaknakut aememfes. Bare, aram aramat ipic, e kapalpu akac aneyfes.