Read Central Asmat AEMAWIRISAS 21 Bible Online

AEMAWIRISAS 21 - Central Asmat bible

AEMAWIRISAS 21

¹Bare. Dar e ow bakan ajiapomfom. Daram anajuwfom, wunam wōw juwas Kos akan ajirfom. Ajofay ara masirin, wōw juwas Rodos asetayfom. Dar masirin aenajuwfom, wunam wōw juwas Patara aotayapfom.

²Daram Fenisia capinmi bajir kapal aporfom, wunam e kapal aojamuwfom.

³Dar e daban bo jamampu, wōw juwas Siprus aporfom. Dar masirin, Siria capinmi apijirfom. Apijirfom masirin, Kota Tirus atayapfom. Erasan e ow kapal pok capinmi bajukum asan ara.

⁴Daram Yesus mamkawi ow apowtewfom, wunam erasan bar tujuh ajiwar aemapfom. Roh Kudusam atakam bi binip e ow atetamef. E ow masirin, atakam Paulus aotawfes. “Or Yerusalem baysos arapok.” Inim aefes.

⁵E nat, e dar bojisos jofay aenawef ara, daram aojisosfom. E ow takasam, acepesam, ajiwiam, e kota cesen akac ajarforowos. Daram e jopir jine onok aneyotapfom, wunam janim Allah aanimfom.

⁶Daram selamat atakam aamtawfom, wunam e kapal ajamuwfom. E owam cem aojisosfes.

⁷Dar Tirus ewnajuwfom, wunam kota Tolemais aotayapfom. Daram erasan Yesus mamkawi ow selamat atakam aamtawfom, wunam e ow bar cowok akac aemapfom.

⁸Ajofay ara masirin, aojisosfom, wunam Kaisarea ajaremfom. Daram e Atakam Akat bacacapiom ipic juwas Filipus acem aemapfom. Bap ara, e Yerusalem ow, ow tujuh ajiwar aereremtawfes. E Filipus, e aeremtewfes ipic cowok ara.

⁹Aramat ipic atiperes tana cepes empat ajiwar ara. E cepesam Allah atakam botaw cepes ara.

¹⁰Daram erasan bar mamincop aemapfom ara, Allah atakam botaw ipic juwas Agabus, Yudea capinmi aewenawef.

¹¹Aram, e darasan aenawef masirin, aramat ipic Paulus asenem atewef. Aram arop bweyam, banam, manam ajikapomef, wunam atakam aotawef. “E Roh Kudus inim atakam aotawmar. ‘E Yerusalem ara, e Yahudi ow a asenem aramat ipic, inim manam ajikapomcemes. Aram aramat ipic e Yahudi opok samat aotasimemtamcemes.’ E Roh kudus inim aeef.” E Agabus inim aeef.

¹²Inim atakam jen ajifom, daram, erasan aemapfes owam, atakam fak Paulus aotawporfom. “Or Yerusalem baysos arapok.” Inim aefom.

¹³Paulus masirin, atep ajitef. “Ca ucimasam? E bwec abwecmokom ara, dojak pwicak aemamenokom. Ow dor manam ajikapomcenesnew, dor Tuhan Yesus damir baftamnew, bare akat ara.” Inim aeef.

¹⁴Daram atakam Paulus botaw emporfom opok. Inimas jokon ajiapfom. “Tuhan e akat aporcowas baemcow.” Inim aefom.

¹⁵Daram erasan aemapkurumfom masirin, daram pok atawkenemapomfom. Dar masirin, Yerusalem aojarfom.

¹⁶E wun kota Kaisarea Yesus mamkawi owam akac ajarfom. Ow dar Siprus ipic juwas Manason e acem memames, atakam aotawforowas. Inimas ar aramat ipicpu atowomforow. Aramat ipic Yesus tarey ajamkawiawiri ipic ara.

¹⁷Daram Yerusalem ajaremfom, e Yesus mamkawi ow jak akat epcom atowomiwforowos.

¹⁸Ajofay ara masirin, Paulusam, daram, Yakobuspu akac ajarfom. E ketua owam takas erasan aemapfes.

¹⁹Paulusam selamat atakam e ow aotawef. Selamat atakam aotawef masirin, ar e Allah e Yahudi opok ow aomefas takas, atakam e ow aotawef. Er e Paulus aemefas ara.

²⁰E ow inim atakam jen ajifes, aram Allah asicimfes Ar masirin, atakam Paulus aotawfes. “Paulus, darewec akatem. Yahudi samat ow arke Yesus asicimfes. E owam, Musa Jirmec ji faknakut aemes.

²¹Owam oratakam e ow emcaotawfes. E Paulus, atakam, e jewey capinmi aemapmes Yahudi ow, amememtamawiri. Car e Musa Jirmec biwitiwey. Caram cajiwi sunat bwem arapok. E Yahudi ow sin basiawaras ji boe arapok. E Paulus inim aeawiri E ow inim aefes.

²²Or arasan aenawfem, atakam jen ajicemesman. O nat, ucimaram?

²³Bare. Or e aotawmenom atakam ji bwe cowoka. Atayi Allah aefes ow empat ajiwar awapes.

²⁴E ow e Allah bipu orom, memem, inim upacara aeces, oram e upacara akac mamemey. Oram e ow upacara bwem uang, e upacara bwemtam ow mamtetamey. Inimas ow, e ow mamincop e kus fin wakan aakcemes. Ow or inimas bwem aporces, ar e wun ow oratakam atawfesas takas, suw atakam aporcemes. Aram or e Musa Jirmec ji aemem aporcemes.

²⁵Da nat, e Yahudi opok samat Yesus asicimfes owas, bare atakam emeamsakamfom, wunam e atakam surat emetetamfom. E surat atakam, Car, ow ēco bipu atatitamfes pok, memen arapok. Caram es memen arapok. Caram es epcom damir aafef binatang das memen arapok. Caram cen cemen osom arapok. Tuna cowoc cen ban arapok. Bisatiw ipic cemen ban arapok. Inim surat atetamfom.” Inim aefes.

²⁶Bare, Paulus e ow empat ajiwar atewef. Ajofay masirin, aram, e owam, e Allah bipu orom memem, upacara akac aemfes. Aramat ipic masirin, e Allah cem afiwef, wunam atakam e Allah atakam mamtaw tugas ipic aotawef. Ar e ow e orom aememkurumces jofay, atakam e ipic aotawefen. Bare, e orom mememkurum jofay, e ow aporsipor, pok Allah bipu batatitam jofay ara.

²⁷E orom aememkurumces jofay, bar tujuh ajiwar arawen. E bar tujuh ajiwar takas sotop aemapfes ara, Asia capinmi Yahudi ow, Paulus e Allah cem aman aporfes. E ow masirin, e ow arke pwicakas bwem ajomtamfes, wunam Paulus ban akimomfes.

²⁸Aram atakam afakaytawfes. “Awamcokom Israel owa. Akac emcarowey. Awamec ipic, e atakam e asanin asanin ow takas aotawawiri ipic ara. Aratakam, ‘E Israel ow pwicak ara. Musa Jirmecam pwicak ara. E Allah cemam pwicak ara.’ Inim aeawiri. Aram Yahudi opok samat ow a Allah cem atowomiwef. Inimas ar a karow asan pwicakas aemef!” Inim aefes.

²⁹(Bap ara, e ow e Efesus ipic juwas Trofimus e Paulus e kota akac ajarfes aporfes. Ar masirin, Paulus e ipic e Allah cem atowomiwef inim arawen. Inimas ar inim atakam atawfes.)

³⁰Bare. E kota ow takas inim atakam jen ajifes, wunam awarimsitfes. Aram asarimjarewsiemfes, wunam Paulus ban akimomfes. Aram aramat ipic e Allah cem cesen ajijimtowomisfes. Ow masirin, e jimasap takas asarimkapimapomfes.

³¹Bare, e ow arke e Paulus bacatiw aememfes. Inimas e Yerusalem ow takas jisuwan awutnakut ajifes. E tentara kepala ipicam eras jen ajief.

³²Aramat ipic mami tentara owam, komandan owam, asarimtewef, wunam e ow arkepu je aatfes. E ow arke, e tentara kepala ipicam, e tentara owam, aporfes. Ar masirin, e Paulus omop baf akariemfes.

³³E tentara kepala ipic masirin, Pauluspu ajisosef, wunam aramat ipic ban akimomef. Aram ow Paulus rantai jamnuk manam bajikapom jirmec ajirimef. Aram jonow atowporef. “Aramat ipic cam? Ucim pok emor?” Inim aeef.

³⁴E ow arke aman nat, wun ow arop atakam afakaytawfes. Wun owam arop atakam afakaytawfes. Aram jisuwan awutut aemfes, inimas e tentara kepala ipic e atakam fwe den apowporef. Aramat ipic masirin, tentara ow Paulus e tentara cem batowomiw jirmec ajirimef.

³⁵E ow arkeam Paulus fa asoromemfes. Aram atakam afakaytawfes. “Awamec ipic bacatiwey.” Inim aefes. E tentara ow, Paulus, e beworpopu atewfes. Aram e ow arke jokmen awut aporfes, inimas aram Paulus e bewerpo atowotometfes.

³⁷E tentara ow, e Paulus, e tentara cem batowomiw aememfes. E Paulus nat, atakam tentara kepala ipic aotawef. “Dor atakam o botawpor arapen?” Inim aeef. E tentara kepala ipic masirin, “Or Yunani atakam omsom open?

³⁸Bap ara, Mesir ipic, ow pemerintah botpem atakam ajomtamef. Ar masirin, jokmen ow empat ribu ajiwar, e cem opok asan, bap ajaramtamef. Or e ipic opoke?” Inim aeef.

³⁹Paulus masirin, “Do Yahudi samat ipic awamcey ara. Doram Kilikia capinmi kota juwas Tarsus ipic ara. Ow takas e kota amsom. Doram awamces ow atakam botaw.” Inim aeef.

⁴⁰E tentara kepala ipic masirin, “Bare, atakam botawey.” Inim aeef. Bare, Paulus e bewerpo op aememef, wunam ban awawarimef. E ow jokon ajiemfes ara. Paulus, Ibrani atakam e ow aotawef.