Read Central Asmat AEMAWIRISAS 22 Bible Online

AEMAWIRISAS 22 - Central Asmat bible

AEMAWIRISAS 22

¹“Ducura. Betiwa. Aykuna. E atep car ajitminas, jen pajiey.” Inim aeef.

²E ow, Paulus, Ibrani atakam aporfes, wunam jokon cowok ajiemfes. Paulus masirin, atakam aotawef.

³“Do Yahudi ipic awamcey ara. Do Kilikia capinmi kota juwas Tarsus ajisamesof, wunam awames kota aman sur aotemof. Gamaliel e darafas jirmec dor amememtamkurumawirin. Doram Allah Kerja fak bwemtam, akat aemawiru. Eras wow awapokom ow aemamokomas inim awcawor cowok.

⁴Doram awames agama mamkawi ow ajurusumawiru. Doram e ow acatiwa ajiawiru. Dor e owam, cepesam, manam ajikapoma ajiawiru, wunam penjara cem aman ajiwtewapoma ajiawiru.

⁵E Allah atakam mamtaw tugas ipic awutam, e atakam mamsakam ownucuram, inimas amsom. E ow, kota Damsik Yahudi ow batetam surat aetamfenes. Dor masirin, awames agama ow manam bajikapom, wunam Yerusalem siksa bwem batowomos, e Damsik ajarof.”

⁶“Ajarof. Ajarof. Bare, doram Damsik sotop inim ajaremof, wunam jok ara, onam op sereas awutnakut dofumi asarimseremnemef.

⁷Doram cenes aneyjuamesof, wunam atakam jen ajiof. ‘Saulus. Saulus. Ucim pok ajurusumamenem?’ Inim atakam jen ajiof.

⁸Dor masirin, atep ajitof. ‘Tuhan. O cam?’ Inim aeof. Aramat ipic masirin, atakam dor aotawfan. ‘Dor e Nasaret ipic juwas Yesus ara. Dor e ajurusumamenem ipic ara.’ Inim aeef.

⁹E dor akac aememfenes ow, e sereasin aporfes. Ar e ipic aotawfan atakam nat, jen bajikurum opok.

¹⁰Dor masirin, ‘Tuhan. Dor ucimas emcey?’ Inim aeof. Tuhan masirin, ‘Basitey. Damsik baysosey. Allah, e aemcemas takas, atakam emcasakamef. Erasan ara, or inim atakam jen ajicemem.’ Inim aeef.

¹¹E sereas nat, awutnakut ara. Inimas dor manmok petey aememof. E dor akac aememfenes ow masirin, ban fe atowomatfenes. Inimas dor Damsik ajaremof.”

¹²“Erasan ara, Musa Jirmec mamkawi fak ipic aemapef. E erasan aemapfes Yahudi ow takasam, aramat ipic asicimfes.

¹³Aramat ipicam dor sotop aenawomfan, wunam atakam aotawfan. ‘Saulus. Dojowow ipic akatem. Manmok batereyey.’ Inim aefan. Dor ara masirin, aramat ipic bi aporof.

¹⁴Aramat ipic masirin, Darafas arAllah, or e akat aporcowas, inim atakam jen baji akat arawen. Aram, or, e akerja bwemtam ipic tarowat, bi bapor akat arawen. Aram or e ipic arop bweyof atakam jen baji akat arawen. Ar or inimas bwem aeremtewfan.

¹⁵Or e aporfemasam, e jen ajifemasam, ow takas atemen aatamcemem.

¹⁶Or ucimas emaperem? Basitey. Oram Tuhan janim manimey, wunam ow or bwi babwimcenes. Tuhan e odosa bakokoromosomtamcan.” Inim aefan.

¹⁷“Bare. Doram Yerusalem aofasiof. Dor e Allah cem aman janim Allah aanimof, wunam pok desen aporof.

¹⁸Dor Tuhan aporof. Aramat ipicam atakam aotawfan. ‘Oram sarima. A Yerusalem bakan sarimjiosey. Awapes ow e doratemen aatamamemas jen baji pwicaken.’ Inim aeef.

¹⁹Dor ara masirin, ‘Tuhan. Dor sembahyang cem arke afiwawiru, wunam e or basicim ow, penjara cem aman ajiwtewapoma ajiawiru. Doram e ow omop aafa ajiawiru. Awapes ow inimas amsom.

²⁰Ow, e oratemen ipic juwas Stefanus acatiwfes, doram inimas akat aeof. Doram e aramat ipic acatiwfes ow apakaian, manmok atiwtamof.’ Inim aeof.

²¹Tuhanam atakam aotawfan. ‘Cey. Dor or e dawon opok Yahudi opok samatpu atewosomcimin.’ Inim aeef.” Paulus inim atakam aotawef.

²²Bare. E ow arke e Paulus atakam takas jen ajifes. E nat, ar e Yahudi opok samatpu baysos atakam atawef ara, e ow arke atakam afakaytawfes. “Awamec ipic mamcatiwey. Inim ipic tetakay boemem arapok!” Inim aefes.

²³Aram atakam awutnakut afakaytawfes. Aram apakaian apapacimtotorfes. Aram jif poros op ajimirsamtometemfes.

²⁴E tentara kepala ipic masirin, Paulus e tentara cem aman atowomiwef. Aramat ipic e Yahudi ow jokmen atakam awutnakut Paulus aotawfes aporef. Inimas ar atentara ow e Paulus omop baf jirmec ajirimef. Er Paulus, e aemef salah, boworporas ara.

²⁵Aram Paulus manam ajikapomfes. Paulus masirin, atakam e sotop aememef komandan ipic aotawef. “Dor Roma ipic ara. Owam dor salahnew, salah opoknew, inim batakamoworpor opok. Inimas car omop do baf, pemerintah jirmec jipu open?” Inim aeef.

²⁶E komandan ipic inim atakam jen ajief, ar e tentara kepala ipicpu aapenef. “Or ucim pok emcem. Awamec ipic Roma ipic ara.” Inim aeef.

²⁷E kepala ipic masirin, Paulus aenawomef, wunam atakam aotawef. “Atakam botawcan. Or Roma ipic arapen?” Inim aeef. Paulus masirin, “Dor Roma ipic ara.” Inim aeef.

²⁸E kepala ipic masirin, “Dor uang awutut Roma pemerintah atetamof, wunam Roma ipic aememof.” Inim aeef. Paulus masirin, “Dor ara nat, Roma ipic ajisamesof.” Inim aeef.

²⁹E Paulus boworpor aememfes ow inimas aporfes, wunam asarimotasienfes. E kepala ipicam, Paulus Roma ipic aporef, wunam omar aeef. Ar Paulus rantai manam emcajikapomef aporef ara.

³⁰Bare. Ajofay ara, ar Paulus asurumef. Aram e Yahudi ow, e Paulus salah ara, inim atakam atawfesas, jen bajikurumen. Inimas ar e Allah atakam mamtaw tugas ow awutam, e atakam mamsakam owam, barewsiap jirmec ajirimef. Ar masirin, Paulus e ow bipu atewemef.