Read Central Asmat AEMAWIRISAS 24 Bible Online

AEMAWIRISAS 24 - Central Asmat bible

AEMAWIRISAS 24

¹Bare. Bar lima ajiwar masirin, e Allah atakam mamtaw ipic awut juwas Ananiasam, wun ownucur owam, pemerintah jirmec cescuw ipic juwas Tertulusam, erasan ajisosfesen. Ar e gubernur bipu aememfes, wunam Paulus salah atakam aotawfesen.

²Ow Paulus ajatefes, wunam e Tertulus, e Paulus salah, inim atakam aotawef. “Feliks akatnakutenem. Or jirmec akat ajirimawirim. Inimas dacapinmi ow asan akat aemapawirum. Oram bi binip epcom ipic ara. Inimas e wun asan pwicak aemapfomas, asan akat aomfarowem.

³Daram e dacapinmi asanin asanin inimas aporawirum. Dar masirin, terima kasih atakam or aotawmenom.

⁴Dor or a atawmin atakamnakap, asan akat jen bajipor, janim or aanimpormin. A atakam jipinnakap ara. Or dam jipi bemapasin.

⁵Bare, dar awamec ipic, ow bajurusum ipic aporfom. Aram e capinmiin capinmiin Yahudi ow, jokmen memem, atakam ajomtamawiri. Aram Nasaret atakam mamkawi ow akepala ipic ara.

⁶Aram e Allah cem pwicak bemapom aemporef. Dar masirin, aramat ipic ban akimomfom, wunam e darop agama Jirmec jipu boworpor, aemfom.

⁷E tentara kepala ipic juwas Lisias nat, awamec ipic, e daban acakemtewef.

⁸Aram, awamec ipic salah atakam aotawfes ow, e obipu bwenaw, jirmec ajirimef. Bare, oram e ipic orma aoworporcem, e aotawmom salah takas atakamnak aporcemem.” Tertulus inim aeefen.

⁹E Yahudi ow takasam, “Paulus salah ara. E atawmom atakam, bare atakamnak ara.” Inim aefesen.

¹⁰Bare. E gubernur ipic, atakam Paulus aotawefen. “Bare, oram atakam patawey.” Inim aeefen. Paulus masirin, atakam aotawefen. “Or tahun arke, jirmec a capinmi ow ajirimawirim. Dor eras apormin ara. Inimas e aemenes salah, e obipu atep bajit, akat aemamin.

¹¹Bar dua belas ajiwar aenawef, dor Allah basicim Yerusalem ajisosof. Oram inim atakam, atakamnak aporcemem.

¹²E Allah cem amanam, e sembahyang cem takas amanam, e kota wun asanam, dor ow atakam mamtaw opok. Doram ow jokmen memem, atakam bajomtam opok. Awapes ow dor inim pok bwem manmok batiw opok.

¹³E do salah atakam aotawmenes, aram fwe atakam bwemotaw asan opok.

¹⁴Do nat, inim atakam or aotawmin. Awamces ow, a ajamkawiminas suw agama arawen. Do nat, e darafas arAllah asicimamin. Bare, dor e Tuhan Bokot ajarmin. Dor e Musa Jirmec buku atakam takasam, e Allah atakam botaw ow tulis aefes buku atakam takasam, asicimamin.

¹⁵Awamces ow, e Allah aemcowas, manmok afemes. Doram eras manmok afemin. Bare, e damir aaffes ow tarowat takasam aojaworsitcemes. E damir aaffes ow fasi takasam aojaworsitcemes. Dar inimas manmok akac afemom.

¹⁶Inimas ara, dor e Allah bipu aemaminasam, e asmat bipu aemaminasam, tarowatnak bwem aatamempormin. Dor e aemaminas takas, jak bini opok aatamempormin.”

¹⁷“Dor tahun mamincop ajiwar ajisosawiru. Dor masirin, uang dosamat ow mami batetam aofasiof. Doram pok Allah bacatitam aofasiof.

¹⁸Dor inimas aemof ara, awapes ow, dor Allah cem aman aporfenes. Bap ara, doram e orom mememas upacara aemkurumof. Bare, doram ow arke aman opok. Jisuwanam opok.

¹⁹E nat, wun Asia capinmi ewenawfes Yahudi ow erasan aememfes. E ow e obipu arma batipem, bare akat ara. Aram e dosalah atakam atawmesas, atakam arma botaw, bare akat ara.

²⁰Wunam dor e atakam mamsakam ow bipu aememof, awapes ow, dosalah aporfenesnew, aram atakam baotawces.

²¹Bare, dor atakam cowoknakap aotawof. ‘Dor, e damir ow aojaworsitcemes, inim atakam asicimamin. Inimas a ow dor aoworporman.’ Inim aeof.” Paulus inim atakam aotawefen.

²²E Feliks nat, e Tuhan Bokot atakam amsomnakut arawen. Aramat ipicam, “Dar wow a atakam ajiwar cowok ara. E tentara kepala ipic juwas Lisia aenawcow, dor e osalah, atakam asakamtiwcimin.” Inim aeefen.

²³Aramat ipic masirin, jirmec, e komandan ipic ajirimef. “Or awamec ipic manmok mamtiwey. E nat, aramat ipic e cesen bajarnakap acuw arapok. Ajowow, pok a bafafaytam, acuw arapok.” Inim aeefen.

²⁴Barewen. Asep jofay ara, Feliks aremcin aenawfesen. Arem juwas Drusila arawen. Ar Yahudi samat cowoc arawen. Bare, e Feliks e Paulus ajateefen. Ar masirin, e Paulus e Kristus Yesus basicim atakam atawefas, jen ajiefen.

²⁵Paulus, ow tarowat memem atakamam, jak fak memem atakamam, Allah e aenawcow dosa atakam basakamtiw jofay atakamam, inim aotawefen. Feliks masirin, omar aeefen. “Oram baysosey. Asan akat aporcey, dor or aojatecimin.” Inim aeefen.

²⁶Aram, Paulus, uang, a batetam, akaten. Inimas ar Paulus bar arke ajatea aeefen. Aram atakam Paulus aamtawa aeefen.

²⁷Bare tahun jamnuk aemapfesen. Tahun jamnuk aemapfes masirin, Perkius Festus e Feliks, e gubernur tugas juw auwuemefen. Feliks nat, e Yahudi ow jak akat bomapom aememefen. Inimas ar Paulus, penjara cem aman, bakan ajiapomefen.