Read Central Asmat AEMAWIRISAS 25 Bible Online

AEMAWIRISAS 25 - Central Asmat bible

AEMAWIRISAS 25

¹Barewen. Festus e propinsi ajarapefen. Bar mamincop aemapef masirin, ar kota Kaisarea bakan ajiosef, wunam Yerusalem ajisosefen.

²Erasan ara, e Allah atakam mamtaw tugas ow awutam, e Yahudi kepala owam, Paulus salah ara, inim atakam e Festus aotawfesen.

³Aram janim fak e Festus aanimfesen. “Or ow e Paulus e Yerusalem batowotnaw jirmec mamjirimey.” Inim aefesen. Bap ara, ar e Paulus e bowsec bacatiw at aefesen.

⁴Festus nat, atep ajitefen. “Paulus e Kaisarea penjara cem awap. Doram erasan sarimnakap aojisoscimin.

⁵Inimas ara, e carownucur ow, dor akac bajarcenes. E ipic salah aemefnew, e ow e salah atakam arma baotawces.” Inim aeefen.

⁶Barewen. Festus, bar delapan ajiwarnew, bar sepuluh ajiwarnew, erasan aemapef, wunam Kaisarea ajisosefen. Ajofay ara masirin, ar e ow boworpor asan afiwapefen. Aram ow Paulus batowomiw jirmec ajirimefen.

⁷Paulusam erasan ajaremef ara, e Yerusalem ewenawfes Yahudi ow, Paulus fumi aamcirimemfesen. Aram Paulus salah arke atakam atawfesen. E atakam nat, fwe opoken.

⁸Bare, e Paulus atep arma ajitefen. “Dor e Yahudi jirmecam, e Kaisar jirmecam, bopow opok. Doram e Allah cem pwicak bwem opok.” Inim aeefen.

⁹Festus nak, jak akat e Yahudi ow bemapom aemefen. Inimas ar jonow Paulus atowporefen. “Or Yerusalem baysos, wunam dor erasan, e atakam atawmes salah or boworpor, akat open?” Inim aeefen.

¹⁰Paulus nat, “Dor, Kaisar, ow boworpor asan aememamin. Ar do boworpor asan anakat arara. Dor salah e Yahudi ow bwem opok. Oram inimas omsom.

¹¹Dor pemerintah atakam aopowofnew, wunam pemerintah do bacatiw aememamesnew, bare doram e pemerintah do bacatiw arapok, inim janim manim opok. E nat, awapes ow do salah atakam aotawmenes. E atakam, suw atakam aranew, ow, dor awapes ow ban ton bwemotasimtam asan opok. Bare, dor Kaisar arma do boworpor janim aanimamin.” Inim aeefen.

¹²E Festus masirin, aratakam mamsakam ow, atakam aamtawfesen. Atakam aamtawfes masirin, e Festus atep ajitefen. “Or Kaisar aramat ipic, or boworpor, janim aanimamem. Bare. Oram Kaisarpu ajisoscemem.” Inim aeefen.

¹³Barewen. Bar mamincop aemapfes ara, raja Agripaam, Bernikeam, kota Kaisarea ajarapfesen. Aram Festus atakam akat mamtaw jaki ajitfesen.

¹⁴Ar erasan bar arke aemapfes, Festus, Paulus atakam, e raja aotawefen. “Feliks jipic cowok arasan penjara cem aman bakan ajiosef.

¹⁵Doram Yerusalem aemapof, e Allah atakam mamtaw tugas ow awutam, e Yahudi ownucur owam, e ipic salah atakam aotawfenes. Aram dor e ipic siksa atakam basakamtiw janim aanimfenes.

¹⁶Dor masirin, atakam e ow aotawof. ‘Ow, jipic cowok salah atakam aotawcesnew, Roma pemerinth e ipic e ow basarimotasimemtam opok aemcomom. Salah atakam botaw owam, e salah ipicam, biamnuk batakamemamtewces. Inimas e salah ipic, e salah atakam botaw ow, atep ajitcema. Dar Roma pemerintah inim cowok ara.’ Inim aeof.

¹⁷E owam arasan ajarewsiapfes. Ajarewsiapfes masirin, kamor opok aemof. Dor e ow boworpor asan afiwapof, wunam e ipic batowomiw jirmec ajirimof.

¹⁸E ipic salah atakam aotawfes owam asitfes. E atakam aotawfes salah nat, e dobi binip aceceremofas awcawor opok.

¹⁹Ar aragama atakam aamtawfes. Aram damir aafef ipic juwas Yesus atakam aamtawfes. Paulus atakam, ‘E Yesus, bare aojaworsitef,’ inim aeef.

²⁰Do nat, inimas boworpor nomsom opok. Inimas ara, dor e ipic jonow atowof. ‘Or Yerusalem baysos, wunam erasan dor or boworpor, aket open?’ Inim aeof.

²¹E Paulus nat, janim aanimfan. ‘Pemerintah manmok do batiwcan. E Kaisar, e dosalahnew, atakam arma basakamtiwcow.’ Inim aeef. Dor masirin, ow jirmec ajirimof. ‘Car awamec ipic manmok mamtiwey. Dor e ipic Kaisarpu atiwirimcey jofay ajiwara.’ Ini aeof.” Festus inim atakam e Agripa aotawefen.

²²E Agripa masirin, atakam Festus aotawefen. “Dor aramat ipic atakam botaw, jen dorma baji akat ara.” Inim aeefen. Festus masirin, “Bare, or to aramat ipic atakam botaw, jen ajicemem.” Inim aeefen.

²³Barewen. Ajofay ara, Agripaam, Bernikeam, e ow barewsiap cem afiwapfesen. Ar raja aturan epcom afiwapfesen. E tentara kepala owam, e kota ownucur owam, akac afiwapfesen. E Festus masirin, jirmec ajirimef, wunam ow Paulus atowomiwfesen.

²⁴Festusam atakam aotawefen. “Raja Agripa. Awapokom owa. Car awamec ipic apormokom ara. E arasan Yahudi ow takasam, e Yerusalem Yahudi ow takasam, e ipic salah, inim atakam dor aotawfenes. ‘E ipic damir baafcow.’ Inim atakam afakaytawfenes.

²⁵Do nat, e ipic, damir baf salah bwem opok aporof. Aram Kaisar, ar salahnew arma boworpor, janim aanimfan. Inimas dor e ipic, Kaisarpu batiwirim, atakam asakamtiwof.

²⁶Do nat, e ipic atakam fwe bapor opok. Inimas dor e ipic atakam fwe surat e Kaisar bwemetam asan opok. Bare, dor e ipic awapokom ow takas bipu atowotnawmin. Raja Agripa. Doram e ipic e obipu a takam towotnawmin. Or e ipic aoworporcem, doram e atakam fwe jen ajicimin. Dor masirin, e atakam surat Kaisar aetamcimin.

²⁷Dor penjara bemap ipic batiwirim, wunam asalah atakam fwe opok, bare pwicak ara.” E Festus inim aeefen.