Read Central Asmat AEMAWIRISAS 26 Bible Online

AEMAWIRISAS 26 - Central Asmat bible

AEMAWIRISAS 26

¹E Agripa masirin, atakam Paulus aotawefen. “Bare. E aemfemas, atakam botawcarowey.” Inim aeefen. E Paulus masirin, e sopmak ajoromef, wunam atep ajitefen.

²“E Yahudi ow, do salahen. Do nat, wow e obipu atep ajitmin. Inimas dor asan akat ara.

³Or e Yahudi pok ceyam, e Yahudi atakam autunumakakamamtawcemesas, bare omsom takas araman. Inimas ara, dor janim or aanimamin. Or e atawmin atakam jen baji, bare jak jirowa.”

⁴“Bare, e Yahudi ow takas e aemawiruas amsom takas. Jiwi kanim aememof, wunam ow awut aememamin, e aemawiruas takas amsom. Doram e dosamat capinmiam, e Yerusalemam, aemapawiru.

⁵Bare, Parisi ow daragama jirmec takas ji bwekurum ow ara. Doram Parisi ipic aemapawiru. Aram inimas aporawiris. Atakamnak akat aporces, aram inim atemen aatamcemes.

⁶Dor Allah e darafas atayi aeefas, jirey aemin. E Yahudi samat dua belas ajiwar takasam e Allah atayi aeefas, batewet aemes. Inimas ar jokam, iramam, Allah asicimames. Raja akatenem! Dor e Allah atayi aeefas jirey aemin. Inimas e Yahudi ow, do salah, atakam atawmenes. Inimasam ara, or do boworpor e obipu aememamin.

⁸Awapokom Yahudi owa. Car takas, ‘Allah damir ow bwemjaworomsumutum asan opok,’ inim atakam atawmokom, ucimaram?”

⁹“Bare. Doram ara. Ametnak ara dor, e Nasaret ipic juwas Yesus amamkawi ow, bajurusum awutnakut akat aporof.

¹⁰Dor Yerusalem ajisosof, dor inimas cowok aemof. E Allah atakam mamtaw tugas ow awut, dor e ow tarowat e penjara cem aman bajiwtewapom, akat aefes. Dor masirin, e ow tarowat penjara cem aman ajiwtewapomof. Wun ow, e ow bacatiw atakam aamsakamfes, doram inimas akat aeof.

¹¹Doram e ow e sembahyang cem takas aman ajurusumawiru. Doram e ow Yesus bapacin aemporof. Dor e ow bajurusum, jewey kotaam aamirimomatawiru.”

¹²“E Allah atakam mamtaw tugas ow awut, dor inimas bwem surat, aetamfenes. Aram inimas bwem jirmec ajirimfenes. Dor masirin, e ow bajurusum, kota Damsik ajarof.

¹³Raja akatenem. Jok ara, ajarof. Wunam onam op sereas awutnakut dofumiam, e akac ajarfenes ow afumiam, asarimseremnemef. E sereas, sere awut pwiciri. E jopok sereas nat, sere kanim pwiciri.

¹⁴Daram cenes aneyjuamesfom. Cenes aneyjuamesfom, dor atakam jen ajiof. E atakam, Ibrani atakam ara. ‘Saulus. Saulus. Or ucimas ajurusumamenem? Or orma ajurusumamem.’ Inim aeef.

¹⁵Dor ara masirin, ‘Tuhan. O cam?’ Inim aeof. Tuhan masirin, ‘Dor Yesus ara. Dor e ajurusumamenem ipic ara.

¹⁶O nat, basitey. Dor or dokerja bwemtam ipic atewemamin. Dor or e wow apormemasam, e or aporomtamciminasam, atakam kawey ow botaw ipic atewemamin. Inimas ara, dor e obipu umuton aemamin.

¹⁷Dor or Yahudi samatam, Yahudi opok samatam, atewosomcimin. Aram jokmen aememcemes. Do nat, or ajortewcimin.

¹⁸Oram e ow bi binip umuton atetamcemem. Er e ow e jiwicas bak bapayemas, wunam e sereaspu bin bafirias ara. Eram, e ow Iblis fakas bak bapayemas, wunam Allahpu bin bafirias ara. Inimas e ow dor asicimcenes, Allah e ow adosa takas, binip ajiosomcema. Allaham e ow e wun aereremtawef tarowat ow cowkon atewemcema.’ Yesus inim atakam dor aotawfan.”

¹⁹“Raja Agripa. Allah e pok desen aporofas onam op ewtewnemef. Doram e pok desen aporof atakam ji aeof araman.

²⁰Dor Damsik bap acacapiomof. Dor masirin, Yerusalemam, e Yudea capinmi asanin asaninam, e Yahudi opok samatam, acacapiomof. ‘Dosa bak mampayemtotorey. Allahpu bin mamfiriey. E dosa bak bapayemas jipu mamemey.’ Inim aea aeof.

²¹Inimas ara, e Yahudi ow e Allah cem aman ban akimomfenes. Ar do bacatiw aemfes.

²²Allah nat, wow ajiwar akac aemaman. Inimas ara, dor tetakay awamcey ara. Dor ow kanimam, ow awutam, atemen aatamamin. Bap ara, e Allah atakam botaw owam, e Musaam, e asep jofay aenawcesas, atakam aotawfes. Doram wun atakam opok. Dor e atawfes atakam cowok aotawmin.

²³E atawfes atakam ara, ‘E Allah Aeremtewef Ipic damir aafcema. Aram e bap atakam bojaworsit ipic aememcema. Inimas ar e sereas atakam, e Yahudi owam, e Yahudi opok owam, aotawcema.’ Inim aefes.” Paulus inim aeefen.

²⁴Paulus inim atep ajitef masirin, Festus atakam afakaytawefen. “Paulus. Or jayic ara. Or atakam arkenakut amememawirim. Inimas or jayic aemamem.” Inim aeefen.

²⁵E Paulus nat, atep ajitefen. “Festus akatenem. Dor jayic opok. E atawmin atakam, atakamnak ara. Aram bi binip epcom atakam ara.

²⁶A rajaam e atawmin atakam amsom takas. Inimas dor, jak fak epcom, atakam aramat ipic aotawmin. Bare, dor e atakam atawminas curuw asan bwem opok. Dor eras umuton asan aemawiru. Inimas ara, aramat ipic eras takas emeporefman.

²⁷Raja Agripa. Or e Allah atakam botaw ow aratakam, basicim open? Or asicimamem apormin ara.” Paulus inim aeef.

²⁸E Agripa masirin, atakam Paulus aotawefen. “Or, do Kristen ipic batewem, inim sarimnakap arapen?” Inim aeefen.

²⁹Paulus masirin, “Sarimnew, sarim opoknew. Do nat, janim Allah aanimamin. Oram, wow doratakam jen ajimenes ow takasam, dor cimin memem, inim janim aanimamin. E nat, ow rantai manam dor ajikapomfenes. Dor ow eras car bwem janim manim opok ara.” Paulus inim aeefen.

³⁰Bare. E rajaam, e gubernuram, e Bernikeam, e wun ow takasam, asitfesen.

³¹Aram aotasimemfes, wunam atakam aamtawfesen. “E ipic damir baf salah bwem opok. Aram penjara cem aman bemap salah bwem opok.” Inim aefesen.

³²Agripa masirin, atakam Festus aotawef. “E ipic, Kaisar ar boworpor, janim manim opok ayaw, daram a basurum ara.” Inim aeefen.