Read Central Asmat AEMAWIRISAS 27 Bible Online

AEMAWIRISAS 27 - Central Asmat bible

AEMAWIRISAS 27

¹Bare. Pemerintah dar Italia capinmi bajir atakam asakamtiwfes. Atakam asakamtiwfes masirin, ar Paulusam, wun penjara aman aemapfes owam, tentara komandan ipic juwas Yulius, atetamfes. Yulius, Kaisar atentara ipic cowok ara.

²Bare, daram kota Adramitium kapal ajamuwfom. E kapal e Asia capinmi jopir kota arke bajir aemseef. Daram anajuwfom. Kota Tesalonika ipic cowok juwas Aristarkusam akac aemfom. E kota, Makedonia capinmi kota ara.

³Ajofay ara, dar kota Sidon asetayfom. E Yuliusam asan akat Paulus aomef. Inimas ar, Paulus ajowow bi bapor basowku, acuw opok. Aram e ow pok Paulus bafafaytam acuw opok.

⁴Bare, daram erasan ewnajuwfom. Dar fo aoworomfom aporfom, wunam wōw juwas Siprus e fo opok poman amesenfom.

⁵Dar masirin, Kilikia capinmiam, Pamfilia capinmiam, aokorsakayfom, wunam, Likia capinmi kota juwas Mira ajirtayfom.

⁶Erasan ara, e tentara komandan ipic, kota Aleksandria kapal aporef. E kapal Italia capinmi bajir aemseef. Inimas aramat ipic dar e kapal asomumforow.

⁷Bar mamincop ara, dar kamornakap aimirfom. Da nat, kota Kenidus sotop, asan pwicak asisikayifom. E fo aoworomforow, inimas dar e bin ajiapfom asan bwemimir asan opok. Bare, dar wōw juwas Kreta e fo opok poman fwikin amesenfom. Daram jopir bas juwas Salmone aokorsakayfom.

⁸Dar e fwikin sotop, asan pwicak amesenfom. Bare, dar asan juwas “Kapal Asan Akat” atayapfom. E asan kota Lasea sotop ara.

⁹Daram bar arke erasan aemsefom. E Amos Pok Bamase Jofayam, bare emcaofefom. (E fo bwiam emcaenawef.) Inimas e jicupum bojir asan pwicak ara. Paulus inimas aporef, wunam atjen e ow aowef.

¹⁰“Awamcokom owa. Dar aojircom, asan pwicak aemsecomom. A kapal pokam, a kapal anakatam, bare afakaysecema. Asmat owam damir aafcemes.” Inim aeef.

¹¹E nat, e tentara komandan ipic, e kapal jurumudi aratakamam, e kapal kapten ipic aratakamam, jen ajief. Ar Paulus atakam jen baji opok.

¹²E kapal batayap asan, e jufu bwi pir mamincop inim bwemseawar, asan pwicak ara. E kapal kerja ow arke inimas aporfes, wunam bonajuw atakam aamsakamfes. Aram Feniks bajirtayporen. Feniks, e wōw juwas Kreta kapal batayap asan ara. Ar fo awut opok asan. Inimas ar e jufu bwi pir mamincop inim bwemseawar asan akat ara.

¹³Bare. Fo kanim e jicowoc iwinawef. E kapal ow masirin, e bonajuw atakam aamsakamfesas, akat inim arawen. Inimas ar angker ajijimtawfes, wunam Kreta fwikin sotop amesenfes.

¹⁴E nat, jon awutut e wasan ewneyef. E jon juwas “Emariw Fo” ara.

¹⁵E jon e kapal akurumef. Dar e kapal, e fo boworom, emporfom opok. Inimas e fo afufumomirforow.

¹⁶Dar masirin, wōw kanim juwas Kauda e fo opok poman amesenfom. Daram e kapal sekoci asan pwicak aemseef aporfom. E kapal kerja ow masirin, e sekoci e kapal op ajijimtometemfes. E jonam awutnakut ara. Inimas e kapal kerja ow jec jak asakayfes. Bare dar e sekoci e kapal op asan akat atewapomfom. E kapal kerja owam, somen, kapal bak aman afimtewfes, wunam manam ajiktewfes. Erasan ara, bisin asan juwas Sirtis ara. Ar e kapal e bisin ton basimtiw omar aefes. Inimas ar e opnakut kain layar asurumnemfes. Bare, ar e fo e kapal bafufumomir atetamfes.

¹⁸E jonam bakari opokut. Ajofay ara masirin, e kapal ow, e kapal pok, bwi ajimirsampumfes.

¹⁹Jowon ara masirin, ar e kapal perkakas ban arma ajimirsampumfes.

²⁰Bar arke ara, dar e jopokam, e bayaram, bwempor asan opok. E jon awutam bakari opokut. Dar masirin, “Bare, dar damir aafcomom.” Inim aefom.

²¹Tareynakut e ow amos memen opok aemsefes. Paulusam e ow bipu aememef, wunam atakam aotawef. “Bare, dor car Kreta bajirpor arapok, inim atakam emeotawfin. Car doratakam jen ajifokom ayaw, dar inim asan pwicak bwemse opok ara. E pokam takas bafakayse opok ara.

²²Do nat, atjen car aowmin. Car jak faka. Awamcokom ow jipic cowok damir bwemaf asan opok. A kapal cowok afakaysecema.

²³Dor Allah aras ara. Doram Allah basicim ipic ara. Bare, iram ara, Allah amalaikat cowok, e dobipu aememesman.

²⁴Aram atakam aotawesman. ‘Paulus. Oram omar arapok. Oram Kaisar bipu aememcemem. Allah e janim aanimamemas atetamceman. Ar e kapal or akac waseokom ow takas, ajortewcema.’ Inim ajiesman.

²⁵Awamcokom owa. Dor Allah atakam asicimamin. E aotawesman atakam, bare inim cowok aemcema. Inimas ara, caram jak faka.

²⁶E fo nat, afufumomircemarow, wunam a kapal, wōw cowok e bisin ton asimtiwcema.” Paulus inim aeef.

²⁷Bare. E jon, isi empat belas ajiwar aatamsimapomef. E iram e jon e jicupum bwi juwas “Adria” afufumomirforow. Iramnak ara, e kapal kerja ow dar fwikin sotop inim arawen.

²⁸E ow masirin, somen jutur pok epcom, bwi ajururumpumfes. E bwi kaku, meter empat puluh ajiwar aporfes. Ase opok asan, ar e somen aojururumpumfes. E bwi kaku meter tiga puluh ajiwar aporfes.

²⁹Ar e kapal, ek ton basimtiw omar aefes. Inimas ar angker empat ajiwar e kapal ep atewpumfes, wunam e jo basarimpu janim aanimfes.

³⁰E nat, e kapal kerja ow, e kapal curuw bakorney aemfes. Inimas ar e sekoci bwi atewsemfes, wunam wun angker e kapal cimen bwi batewpum pir aefes.

³¹Paulus nat, atakam e tentara komandan ipicam, e tentara owam, aotawef. “A kapal kerja ow, a kapal op cowok memem opok aeces, car bwemjorem asan opok.” Inim aeef.

³²E tentara ow masirin, e sekoci somen apwikimfes. Inimas ar e sekoci apemosomfes.

³³Iram fak ara, Paulus, e ow takas, amos memen, atakam aotawef. “Car isi empat beas ajiwar manmok atiwapawirukum, wunam amos memen opok aemawirukum.

³⁴Inimas ara, dor atakam car botawpormin. Car amos pemeney. Er car bajoremas ara. Bare e cakus fin cowoknakapam bapakapios opok aemcema.” Paulus inim aeef.

³⁵Paulus inim atakam aotawef masirin, amos atewef. Aram e ow bipu, terima kasih atakam Allah aotawef. Ar masirin, e amos akomtewenef.

³⁶E ow takasam jak fak aememfes, wunam amos aemenfes.

³⁷Bare, e kapal ajamuwfom ow dua ratus tujuh puluh enam ajiwar ara.

³⁸Ow amos jak anapitemfes masirin, ar e gandum, bwi ajupumfes. Er e kapal dasas bwemas ara.

³⁹Bare. Jo apuef. E kapal kerja ow e fwikin amsom opok. E nat, jo minukum bisin epcom aporfes. Ar masirin, e kapal, e bisin ton basimtiwpor, atakam aamsakamfes.

⁴⁰Inimas ara, ar e angker somen takas apwipwikimfes, wunam e angker, bwi inim aemsemfes. Aram e kemudi somen asurumfes. Ar masirin, e kapal cimen kain layar op atewtopomfes. E fo masirin, e kapal, fwikinpu afufumomiref.

⁴¹Bare, e kapal, bwi jamnuk asan, bisin ton asimtiwef. E kapal cimenam bisin atamjukumtiwef. Aram bwemsijis asan opok. Inimas e wa awutut, e kapal ep afakamsemef.

⁴²E tentara owam inimas aporfes. Ar masirin, e penjara ow takas bacatiw atakam aamsakamfes. E ow bacucujir wunam baysosasin.

⁴³E tentara komandan ipic nat, e Paulus bajortew akat aemef. Inimas ar jirmec ajirimef. “Car e ow bacatiw arapok. E jitakam ow bwi batakamsopipuces.

⁴⁴E jitakam opok ow masirin, papannew, kapal os dasnew, ban baomoseces. Inimas fwikin bajirces.” Inim aeef. Inimas ara ow takas fwikin asan akat ajirtayfes.