Read Central Asmat AEMAWIRISAS 28 Bible Online

AEMAWIRISAS 28 - Central Asmat bible

AEMAWIRISAS 28

¹Bare, dar asan akat asowkufom. E wōw aemapfes owam atakam aotawforowos. “Awap wōw juwas Malta ara.” Inim aeforowos.

²E owam asan akat dar aomforowos. Bare, te aneyef. Dar masirin dam jufu aememfom. E ow inimas aporfes masirin, jismak atowokomtamforowos. Aram asan akat aemforowos.

³Paulusam jis acamimomef, wunam e jis atowokomef. Jis atowokomef ara, amer jis aman aewfisef. E amer e jis amop aporef ara. Bare, e amer Paulus ban sis aatef.

⁴E wōw aemapfes owam e amer Paulus ban bamatapitep aporfes, wunam atakam aamtawfes. “Ewamec ipic sanaw bwetiw ipic ara openow. Ar e jicupum bwi damir baf opok aemef. E nat, e allah juwas ‘Bic Baji Aramat Ipic’ e ipic acatiwcema.” Inim aefes.

⁵Paulus nat, e amer apacapimosomef. E ameram jismak aman aneyamesef. Paulusam bajurusem opok cowok.

⁶E ow nat, e Paulus ban pupunew, damir baneyjuamesnew, manmok atiwfes. Ar manmok jirow pwiciri atiwfes, e nat, Paulus bajurusem opok aporfes. Inimas e ow ay bi binip aceceremfes, wunam atakam aotawfes. “Ewamec ipic, allah ipic ara.” Inim aefes.

⁷Wun capinmiam asepok aemamesef. E capinmi aramat ipic juwas Publius ara. Ar e wōw kepala ipic ara. Aramat ipic asan akat dar atowomiwfosom. Daram isi mamincop acem aamsesfom.

⁸Publius aricipic nat, dam aemamesef. Aram es as arawen. Paulus, aramat ipic kamar afiwef, wunam janim Allah aanimef. Aram ban aramat ipic dam ton atatiwef, wunam ar e ipic ajaworomtewef.

⁹Inimas aemef masirin, e wōw dam ow takas aenawa aefes. Paulusam e ow ajaworomtawa aeef.

¹⁰E owam, pok arke mami atetamforowos. Daram banajuw aememfom, ar e bowsec memenas takas atetamforowos.

¹¹Dar erasan pir mamincop aemapawirum, wunam kota Aleksandria ewinawef kapal ajamuwfom. E kapal e Malta jufu bwi aemseawiri. E kapal cimen kapal juwas asuk wow epcom. E asuk wow “Allahamnuk” ara.

¹²Bare, dar kota Sirakusa asetayfom, wunam erasan isi mamincop aemsefom.

¹³Daram aonajuwfom, wunam kota Regium asetayfom. Ajofay ara, fo e jicupum ajinawef. Dar masirin, bar jamnuk aemsefom, wunam kota Putioli asetayfom.

¹⁴Dar erasan Yesus mamkawi ow biamnuk aemamtewfom. Aram dar acem jaki isi tujuh ajiwar bwisit janim aanimforowos. Bare, dar erasan ewjisosfom, dar kota Roma ajaremfom.

¹⁵E Roma Yesus mamkawi owam, daratakam jen emcajifes. Ar masirin, asan juwas Pasar Apiusam, Pasanggrahan Tigaam, erasan da batew aenawfes. Paulus, e ow bi aporef aram terima kasih atakam Allah aotawef. Aram jak fak aememef.

¹⁶Bare. Dar Roma ajaremfom, pemerintah e Paulus arop cem bemap atetamfes. Aram tentara ipic cowok, aramat ipic manmok batiw jirmec ajirimfes.

¹⁷Bar mamincop ara masirin, Paulus e Yahudi kepala ow ajateef. E ow ajarewsiapfes ara, Paulus atakam aotawef. “Betiwa. Aykuna. Dor e dajowow salah bwem opok. Doram e darafas siin asimom pok cey bopow opok. E nat, Yerusalem aememof, e ow ban akimomfenes, wunam ar e Roma pemerintah aotasimemtamfenes.

¹⁸E pemerintah owam aoworporfenes, wunam dor basurum akat aefes. Ar dor damir baf salah bwem opok aporfes ara.

¹⁹E Yahudi ow nat, inimas pwicaken. Inimas ara, ‘Kaisar arma baoworporcan,’ inim janim aanimof. E nat, e Yahudi ow dosamat ara. E janim aanimofasam, ‘E Yahudi ow salah ara,’ inim bajias opok.

²⁰Bare, Israel ow, jipic cowok jirey aemes. Doram e ipic jirey aemin. Inimas ara, ow rantai manam ajikapomfenes. Inimasam ara, dor cabi baporam, atakam ca botawam, inim janim aanimof.” Paulus inim aeef.

²¹E ow masirin, atakam Paulus aotawfes. “E Yudea ow, oratakam surat, dar batewenam opok. E dajowowam, oratakam pwicak, arasan batowominaw opok.

²²Da nat, e obi binip, aceceremamemas, atakam jen baji akat ara. E asanin asanin ow, e ajamkawimem agama atakam, pwicak atakam atawmes apormom ara.” Inim aefes.

²³E ow masirin, bojarewsiap jofay atakam Pauluscin aamsakamfes. Bare, e jofay aenawef ara, ow arke e Paulus aemapef cem aenawtotorfes. Paulus masirin, Allah Pemerintah, atakam fak, e ow aotawef. Ar atakam tam eworomsimopef, wunam porow joti aomopef. Ar Musa Jirmec surat atakamam, e Allah atakam botaw ow aeapomfes surat atakamam, aemtewef. Inimas ar e Yesus atakam, atakamnak ara, inim atakam e ow aotawporef.

²⁴E wun ow, inim atakam atakamnak aporfes. E wun ow nat, inim atakam basicim pwicaken.

²⁵Bare, e ow aojisosfes ara, aram atakam cawor opok aemfes. Bap ara nat, Paulus atakam e ow aotawef. “Roh Kudus, atakamnak, e Allah atakam botaw ipic juwas Yesaya aotawefen. Aramat ipic masirin, aratakam, e carafas aotawefen:

²⁶‘Oram inim atakam a ow mamotawey: “Caram atakam jen ajiawarcomokom, e nat car e atakam camsom opok aemcomokom. Caram manmok atiwawarcomokom, e nat, caram bapor opok aemcomokom.

²⁷Awapes ow jen opok ara. Aram ajen jof akapimfes. Aram amanmok akapimfes. Ar pok baporasin. Aram atakam jen bajiasin. Aram bi binip umuton batowom, wunam bin bafiriasin. Doram e ow dam baworomtawasin.” Inim atakam e ow mamotawey.’ Yesaya e Roh Kudus aotawef atakam inim atakam atawefen.

²⁸Inimas ara, Allah, ow e bajortew atakam botaw, e Yahudi opok ow, atewosomef. E Yahudi opok owam inim atakam jen ajikurumcemes.” Paulus inim aeef.

²⁹Paulus inim atakam aotawef masirin, e Yahudi ow ajisosfes. Aram atakam awut aamtawfes.

³⁰Bare. Paulus arop cem tahun jamnuk ajiwar aemapawiri. Aram, e cem aramat ipic, uang atetamawiri. Aram e jaki ow takas, e cem atowomiwawiri.

³¹Aram Allah Pemerintah atakam, acacapiomawiri. Aram Tuhan Yesus Kristus atakam, jak fak epcom, amememtamawiri. Owam ar e atakam botaw acuw opok.