Read Central Asmat AEMAWIRISAS 3 Bible Online

AEMAWIRISAS 3 - Central Asmat bible

AEMAWIRISAS 3

¹Barewen. Jofay ara, Petrusam, Yohanesam, Allah cem ajisosfesen. Er e jam tiga sembahyang arawen.

²Erasan ar, ow, japow ipic atowomfes aporfesen. E ipic jak aman ewomisef, ar japow arawen. Join aatamfafayawiri e ow e ipic e Allah cem jimasappu, inim atewapoma ajiawirisen. E jimasap juwas “Akat” ara. E japow ipic masirin, e Allah cem bafiw ow, uang janim aanima ajiawirien.

³Aramat ipic, e Petrusam, e Yohanesam, e Allah cem afiwfes aporef, wunam uang janim aanimefen.

⁴Petrusam, Yohanesam, e ipic manmok atiwemfesen. Atakamam aotawfesen. “Manmok da tiwcarowey.” Inim aefesen.

⁵E japow ipic masirin, e ipic jamnuk manmok atiwapefen. Ar e ow pok a batetam, inim arawen.

⁶E Petrus masirin, atakam aotawefen. “Dor uang opok cowok awamcey ara. E awomceyas nat, or atetamamin. Bare, Yesus Kristus e Nasaret ipic ara. Aram odam baworomtam fakas aomomamar ara. Inimas oram bajarey.” Petrus inim aeefen.

⁷Petrus masirin, e japow ipic e ban bo ajimomef, wunam asumutumefen. Bare, e japow ipic, e kamtaram, e bwey komanam, fak asarimememefen.

⁸Aram asopiemef, wunam acowojarefen. Ar masirin, e Petrusam, e Yohanesam, e Allah cem akac afiwfesen. Aram ajarefen. Aram asosopiefen. Aram Allah asicimefen.

⁹Bare, e ow takas, e ipic ajarefam, Allah asicimefam, inim manmok atiwemfesen.

¹⁰Ar e ipic, e Allah cem jimasap juwas “Akat,” uang janim aanima ajiawiri ipic aporfesen. Aram e ipic, e aemefas aporfes wunam junum awut aefesen. Aram okon aaknamifesen.

¹¹E ipic e Petrusam, e Yohanesam, becer ajipirefen. E ow takasam, e ipic mamincoppu asarimsayenfesen. E asan, cemko juwas “Salomo” arawen. Bare, e ow takas junum awutnakut aefesen.

¹²Petrus inimas aporef masirin, atakam aotawefen. “Awamcokom Israel owa. Car awamec ipic e aemamaras, ucim junumam? Car ucim manmok dar atiwmarowokom? Car e darop fakasnew, e darop akatasnew, e ipic ajaworomtewmom, inim ara openow.

¹³Allah, Abrahamam, Ishakam, Yakubam, darafas ducuram, bare arAllah ara. E Allaham akerja bwemtam ipic op asimtomtemtamef. E ipic Yesus ara. Caram e ipic Pilatus aotasimemtamfokom. Pilatus masirin, e ipic basurumtam atakam asakamtiwef. Ca nat ipic Pilatus bipu apacinfokom.

¹⁴E ipic, bare tarowatam, atakam, ara. Ca nat, aramat ipic apacinfokom. Car masirin, Pilatus sanaw bwetiw ipic cowok, car basurumtam, janim aanimfokom.

¹⁵Wunam car e jiwnenak batetam ipic acatiwfokom. Allah nat, e ipic aojaworomsumutumef. Daram eras manmok atiwfom.

¹⁶Bare, a japow ipic e Yesus asicimama. Inimas Yesus e ipic jak aemtamama. Caram e ipic manmok atiwmokom ara. E ipicam camsom ara. Ar Yesus asicimama. Inimas Yesus e ipic dam tarowat e cabipu aemtamama.”

¹⁷“Awamcokom owa. Caram, e cakepala owam, jen aememfokom. Inimas car e pwicakas e Yesus aemfokom. Dor inimas apormin ara.

¹⁸Ametnak ara nat, Allah, atakam, e aratakam botaw ow, aotawefen. ‘E Aeremtewof Ipic ajurusemcema.’ Inim aeefen. E owam inim atakam kawey ow aotawfesen. Jepen ara masirin, Allah e atakam aotawefas jipu aemkurumef.

¹⁹Inimas caram dosa bak mampayemtotorey. Caram Allahpu mamfasienawey. Allah masirin, e cadosa akokoromosomtamceman.

²⁰Inimas Tuhan jak akatasam atetamceman. Aram Yesus aotewnemcema. Ametnakam ara, ar aramat ipic aeremtewefen.

²¹Yesusam e onam op atakamemapcema— Allah e pok takas, ayas aoemcow jofay ajiwara. Bap ara, Allah inim atakam, aratakam botaw tarowat ow, aotawefen. E ow masirin, inim atakam kawey ow aotawfesen.

²²E Musaam inim atakam aotawefen. ‘Bare, Allah caTuhan ara. Aramat Ipic, aratakam botaw ipic, car atewenamtamceman. Doram Allah atakam botaw ipic ara. E ipicam dor inim awcawor aememcema. Aram cajipic ara. Bare, caram aratakam takas jen mamjikurumey.

²³Wun ow e Allah atakam botaw ipic atakam ji bwe opok aemcemes. Allah masirin, e ow e Allah arow aman apakapimosomcema.’ Musa inim aeefen.

²⁴E ametnak Allah atakam aotawfes ow takas, e wow apormomas, bare atakam emcaotawfesen. E bap atakam botaw ipic juwas Samuel arawen. E wun atakam botaw ow masirin, asep arawen.

²⁵Bare, car e Allah atakam botaw ow arurpis ara. Allaham atayi e darafas ow aeefen. Ar atakam Abraham aotawefen. ‘E orurpis sin asiawarces ow, asan akat, e samat aomcemes.’ Inim aeefen. E atayi aeefas, bare carasam ara.

²⁶Bare, Allah, akerja bwemtam ipic ajaworomsumutumef. Aram aramat ipic car e cadosa bak bafirim atewnemef. Eras car asan akat batetamas ara.” Petrus inim aeefen.