Read Central Asmat AEMAWIRISAS 4 Bible Online

AEMAWIRISAS 4 - Central Asmat bible

AEMAWIRISAS 4

¹Barewen. Petrusam, Yohanesam, atakam e ajarewsiemfes ow amememtamfesen. “Yesus aojaworsitef. Inimas e damir owam aojaworsitcemes.” Inim aefesen. Aram atakam aotawfes ara, e Allah atakam mamtaw tugas owam, e Allah cem polisi kepala ipicam, e Saduki owam, aenawfesen. Aram e atakam aporfesen. Inimas jak amop aememfesen.

³E ow masirin, e atakam botaw batewosom ipic jamnuk ban akimomfesen. Ar jo jiwic aporfes, inimas e ipic jamnuk penjara cem aman ajiwtewapomfesen. Ar ajofay ajiwar, e penjara cem aman aemapfesen.

⁴E Petrusin Yohanes aratakam jen ajifes ow aman, wun ow arke Yesus asicimfesen. E asicimfes ow kayimin akakayiemfesen. Aram owerow takas, lima ribu ajiwarnew aememfesen.

⁵Barewen. Ajofay ara, e Yahudi kepala owam, e ownucur owam, e Allah Jirmec mamememtam owam, Yerusalem ajarewsiapfesen.

⁶E Allah atakam mamtaw tugas ipic awut juwas Hanasam, Kayafasam, Yohanesam, Aleksandaram, e Allah atakam mamtaw tugas ipic awut asamat ow takasam, erasan ajarewsiapfesen.

⁷Aram e atakam botaw batewosom ipic jamnuk, e wasec asumemfes, wunam jonow atowporfesen. “E aemfokomas, e fakas, ca tetamfan? E aemfokomas jirmec ca jirimfan?” Inim aefesen.

⁸Bare, e Roh Kudus e Petrus aomomkurumefen. Inimas Petrus e ow atep ajitefen. “Kepala owam, ownucur owam, awapokom ara.

⁹Dar e japow ipic asan akat aomfom. Car masirin, e ajaworemef fakas, wow jonow dar atowpormarowokom.

¹⁰Bare, e Nasaret ipic juwas Yesus Kristus afakas, e japow ipic ajaworomtewef. Car, e Yesus, salib os op acatopomfokom. Allah nat, e ipic aojaworomsumutumef. Bare, e ipic afakas, awamec japow ipic ajaworomtewef. Car awamcokom ow takasam, Israel ow takasam, inim atakam jen pajikurumey.

¹¹E Alkitab atakam ara: ‘E ca cem bweapom ow, ek cowok pwicak aporfokom, wunam e ek aeremtiwfokom. E ek nat, cem ek penting awutnakut aemamesef.’ Inim aema. E ek, bare Yesus ara.

¹²Wun ipic asmat ow bwemjortew asan opok. Allah, wun awames capinmi ipic, asmat bajortew ipic batewem opok.?” Petrus inim aeefen.

¹³Petrusam, Yohanesam, jak fak ow arawen. Ar ara nat, sekolah bwe awut opoknakap ow arawen. Ar mami ow cowok arawen. E atakam mamsakam ow inimas aporfes, wunam junum aefesen. Ar e ipic jamnuk, Yesus ajamkawiawiris ow aporfesen.

¹⁴E ajaworemef ipicam e ipic jamnuk cowkon aememfesen. E owam inimas aporfes masirin, ar atep bwemjit asan opoken.

¹⁵E ow e ipic jamnuk e atakam mamsakam ow asan bafis jirmec ajirimfesen. Ar masirin, aramaman jonow aamtowfesen.

¹⁶“Dar e ipic jamnuk ucim pok emcom? Atakamnak ara, ar junum bweas awutnakut aemfes. E Yerusalem ow takasam, inim atakam jen emcajifes. Daram inimas bwempacin asan opok.

¹⁷Dar e ipic jamnuk Yesus atakam wun ow bootaw acuw aatmoc. Wun ow e atakam jen bajiasin.” Inim aefesen.

¹⁸Bare, e ow, e ipic jamnuk ajatefes, wunam atakam aotawfesen. “Car e Yesus atakam bootaw arapok. Car e atakam wun ow momememtam arapok.” Inim aefesen.

¹⁹E Petrusin Yohanes nat, atep ajitfesen. “Allah, dar caratakam ji bwe, wunam aratakam bopow, inimas akat open? Bi binip carma ceceremey.

²⁰Dar ara nat, e aporawirum pokam, e jen ajiawirum atakamam, kawey ow atakam botaw, bwemkorompim asan opok.” Inim aefesen.

²¹E ipic ajaworemef, bare junum bweas arawen. Aram umur tahun empat puluham, wun tahun bokayimam, inim ajiwar arawen. E ow arke eras aporfesen. Inimas Allah asicimfesen. E atakam mamsakam ow masirin, e ow omar aefesen. Inimas ar e ipic jamnuk desen jokmen atakam aotawfes, wunam asurumfesen. Aram e ipic jamnuk bwemjurusum asan opoken.

²³E ow, e Petrusam, Yohanesam, asurumfes ara, e ipic jamnuk ajowowpu ajisosfesen. Wunam, ar e Allah atakam mamtaw tugas ow awutam, e ownucuram, e otawfes atakam, ajowow aotawfesen.

²⁴E ow inim atakam jen ajifes masirin, bi binip cawor, janim Allah aanimfesen. “Tuhan. Or e onam opam, e capinmiam, e jicupum bwiam, e pokin pokin takasam, akenemapomkurumfem.

²⁵Or darafas ducur ipic juwas Daud, atakam botaw, jirmec ajirimfem. Aram okerja bwemtam ipic ara. E Roh Kudusam, e Daud, inim atakam bi binip atetamefen: ‘E Yahudi opok samat, ucim jokmen atakam atawfes? E owam, ucim atakam desen aamsakamfes?

²⁶A capinmi raja ow jewew at aetiwfes. A kepala owam ajarewsiemfes. Ar e Tuhanam, e Aeremtewef Ipicam, owec bamo aememfes.’ Daud inim aeefen.

²⁷Atakamnak ara, Herodesam, Pontius Pilatusam, e Yahudi opok samatam, e Israel ow takasam, awames kota ajarewsiemfes. Aram Yesus bajurusum at aetiwfes. Bare, Yesus, e okerja bwemtam ipic tarowat ara. Or e ipic aeremtewfem.

²⁸E ow, e bap atakam asakamtiwfemas bwem, ajarewsiemfes. Bare, or fak ipic ara. Oram inimas bwem akat aporfem. Inimas ara, inim atakam basakamtiw, bare oras araman.

²⁹Tuhan. Wow ara, or e atawmes jokmen atakam aporey. Oram e okerja bwemtam ow, e oratakam botaw, jak fak mamtetamey.

³⁰Oram, e ofakas mamporomey, wunam dam ow mamjaworomtawey. E okerja bwemtam ipic tarowat, bare Yesus ara. Or aramat ipic afakas mamtetamcarowey. Inimas dar junum bweas aemcomom.” E Yesus mamkawi ow inim janim aanimfesen.

³¹Inim janim aanimfes masirin, e ajarewsiapfes cem awawarimefen. Roh Kudusam e ow aomomkurumefen. E ow masirin, Allah atakam, jak fak epcom aotawfesen.

³²E Yesus asicimfes ow takas bi binip cowok aomomfesen. E ow, “A pok doropas ara,” inim baji opok cowok arawen. E nat, e pok takas cowkon aomomfesen.

³³E atakam botaw batewosom ow, e Tuhan Yesus ajaworsitefas, atemen faknakut aatamfesen. Allaham e ow asan akat cowok atetamefen.

³⁴E ow aman, pok opok ow, bare opok cowok arawen. Capinmi aramat ow takasan, cem aramat ow takasam, eras uang auwumtewa ajiawirisen. Aram e uang atewa ajiawiris,

³⁵wunam e atakam botaw batewosom ow bweypu atatiwa ajiawiris. E batewosom ow masirin, e uang, e pok opok ow aseyetama ajiawiris.

³⁶Lewi ipicam cowok juwas Yusuf inimas aemefen. Ar Siprus capinmi ajisamesef ipic arawen. E atakam botaw batewosom ow, e ipic, wun juwas Barnabas aamfesen. “Barnabas” daratakam juw buwumtew, “Ow jak fak bwem ipic” arawen.

³⁷Aramat ipicam capinmi aomomefen. Aram e capinmi, uang auwumtewef, wunam e uang e atakam botaw batewosom ow bweypu atatiwefen.