Read Central Asmat AEMAWIRISAS 5 Bible Online

AEMAWIRISAS 5 - Central Asmat bible

AEMAWIRISAS 5

¹Jipic cowok nat, juwas Ananias arawen. Arem juwas Safira arawen. Aramat ipic, acapinmi, uang juw auwumtewetefen.

²E wun uang arop atewetefen. Ar e wun uang masirin, e atakam botaw batewosom ow atetamefen. Aremam inimas amsom arawen.

³Petrus nat, atakam aotawefen. “Ananias. Iblis e ojak aman ucimas sarimfiwan? Or e capinmi auwumteweterem uang, wun aotasimapomaterem. Inimas or suw atakam Roh Kudus aotawerem.

⁴Amet ara, e capinmi uang buwumtewet opok aemapawirim, e capinmi oras araman. Wunam e capinmi uang auwumteweterem, e uang oras araman. O jopom inimas bwem atakam asakamtiwerem? Or e suw atakam asmat ow botaw opok. Or e suw atakam Allah aotawerem.” Inim aeefen.

⁵Bare, Ananias inim atakam jen ajief cowok masirin, aneyjuamesef, wunam damir aafefen. Inim atakam jen ajifes ow takas masirin, omar awutnakut aefesen.

⁶Barewen. Ay ow e cem afiwfes, wunam e damir ipic, picin manam ajikfesen. Ar atowomisfes, wunam awuapomfesen.

⁷Bare, arem jam mamincop ajiwar aemapef masirin, e cem afiwefen. Aram e armipic damir aafef bapor opok aemefen.

⁸Petrus masirin, atakam e cowoc aotawefen. “Atakam botawcan. Car e capinmi uang juw auwumtewetorokom, inim uang aranew?” Inim aeefen. E cowoc masirin, “Owo, inim uang araman.” Inim aeefen.

⁹Petrus masirin, “Ca jopom ormipiccin, e Roh Tuhan bwempor, atakam aamsakamorokom? Ormipic wuapomeres ow e cesen awamces. Aram or atowomiscemenes.” Inim aeefen.

¹⁰Bare, e cowoc Petrus bweypu asarimneyjuamesef, wunam damir aafefen. E ay ow masirin, e cem afiwfesen. Ar e cowoc damir aafef aporfes, wunam cesen atowomisfesen. Ar armipiccin jow afirimapomfesen.

¹¹Bare, Yesus basicim barewsi ow takasam, e inim atakam jen ajifes ow takasam, omar awutnakut aefesen.

¹²Barewen. E atakam botaw batewosom ow junum bweas arke e ow bipu aemfesen. E Yesus basicim ow takasam Salomo cemko ajarewsia ajimpesen.

¹³E mami owam, e ow asicimfesen. E nat, aram e ow cowkon bemap omar aefesen.

¹⁴E Tuhan basicim owam kayimin akakayiemfesen. Er owerowam, cepesam, arkenakut arawen.

¹⁵Inimas ara, ow, dam ow arke e bokot jofpu atowomisfes, wunam e arisi bwes asan tonam, e atepen tonam, atatiwfesen. Ar, Petrus erasan ajrcow, e jipir e dam ow dam ton boporneyames, inim jak aseremomfesen.

¹⁶E Yerusalem jamam samat ow arkeam aenawfesen. Aram e dam owam, e jak aman dat afiwa aefes owam, atowocenfesen. Bare, e ow takas ajaworemfesen.

¹⁷Barewen. E Allah atakam mamtaw tugas ipic awutam, e amamkawi ow takasam, asitfesen. Aram takas Saduki mamkawi ow arawen. Bare, ar icim awutnakut afesfesen.

¹⁸Aram e atakam botaw batewosom ow ban akimomfes, wunam e pemerintah penjara aman atiwimfesen.

¹⁹Iram ara nat, Tuhan malaikat, e penjara jimasap apayimef, wunam ar e atakam botaw batewosom ow atowomisefen. Aram atakam aotawefen.

²⁰“Caram cey. E Allah cem mamfiwemey. E ay jiwneas atakam takas e ow mamotawkurumey.” Inim aeefen.

²¹Bare, e atakam botaw batewosom ow, e atakam jen ajifes, wunam e Allah cem tamnakap afiwemfesen. Aram atakam amememtamfesen. Bare, e Allah atakam mamtaw tugas ipic awutam, e amamkawi ow takasam, aenawfesen. Ar e atakam mamsakam owam, e Israel ownucur ow takasam, aaramsimfesen. Ar masirin, ow, e penjara aman aemapfes atakam botaw batewosom ow batew, jirmec ajirimfesen.

²²E polisi ow nat, e penjara ameremfesen. Aram e atakam botaw batewosom ow abi opok aporfesen. Ar masirin, aofasifes, wunam atakam aotawfesen.

²³“E penjara cem jimasap takas kunci faknakut apororom. E manmok batiw owam e jimasap takas cesen aememeres apororom. E nat, e jimasap apayimorom, e cem aman, ow opok cowok apororom.” Inim aefesen.

²⁴E Allah cem polisi komandan ipicam, e Allah atakam mamtaw ow awutam, inim atakam jen ajifesen. Ar masirin, e atakam botaw batewosom ow, ocenak asan jisosfesnew, inim bi binip awut aceceremfesen.

²⁵Jipic cowok nat, aenawefen. Aram atakam e ow aotawefen. “E penjara atiwimfokom ow, e Allah cem aman awamces. Ar ow atakam amememtamames.” Inim aeefen.

²⁶Bare, e komandan ipicam, apolisi owam, ajisosfesen. Ar e atakam botaw batewosom ow atewfesen. E nat, ar e ow arke, ek adampu bajimir, omar aefesen. Inimas ar e atakam botaw batewosom ow serow atewfesen.

²⁷Aram e atakam botaw batewosom ow e atakam mamsakam ow bipu atowocenfesen. E Allah atakam mamtaw tugas ipic awut masirin, e ow aoworporefen.

²⁸“Dar car e jipic atawef atakam mamememtam, acuw awutnakut emeatfonom. Car ara nat, e caratakam, e Yerusalem takas emefufumomatfokom. Caram atakam aotawfokom, ‘E Allah atakam mamtaw tugas ipic awutam, amamkawi ow takasam, e Yesus acatiwfes.’ Inim aefokom.” E Allah atakam mamtaw tugas ipic awut inim aeefen.

²⁹Petrusam, e wun atakam botaw batewosom owam, atep ajitfesen. “Dar Allah atakam ji bwe akat ara. Dar asmat atakam ji bwe opok.

³⁰Car e Yesus os op atewtopomfokom. Inimas car aramat ipic acatiwfokom. Darafas arAllah nat, aramat ipic ajaworomsumutumef.

³¹Allaham, dosa bak bapayem bi binip e Israel ow batetam akat arawen. Aram e ow dosa bakokoromosomtam akat arawen. Inimas ar e Yesus e aban bo jamam atewemef.

³²Dar eras atemen aatamamom ow ara. E Roh Kudusam eras atemen batam ipic ara. Allaham, e Roh Kudus, aratakam ji bwe ow atetamef.” Inim aefesen.

³³E atakam mamsakam ow nat, inim atakam jen ajifesen. Bare, aram namcan awutnakut aatfesen. Ar e atakam botaw batewosom ow bacatiw atakam atawfesen.

³⁴E nat, Parisi ipic cowok juwas Gamaliel, Allah Jirmec mamememtam ipic arawen. Ow takas e ipic asicimawirisen. Bare, aramat ipic e atakam mamsakam ow bipu asitef, wunam, “E atakam botaw batewosom ow cesen kanimnakap batakamtowomisey.” Inim aeefen.

³⁵Ar masirin, atakam e atakam mamsakam ow aotawefen. “Awapokom Israel owa. Awamces ow aemcokomas pimicima.

³⁶Ametnak ara, Teudas asitef. Aramat ipic atakam, ‘Dor ow awutut,’ inim aeef. Owerowam empat ratus ajiwarnew, e ipic ajamkawifes. E nat, wun ow e ipic acatiwfes. Amamkawi owam takas apacayosfes. Bare, aram apakapiosfes.

³⁷Asep ara masirin, e Galilea ipic juwas Yudas asitef. Er e sensus aemfes jofay ara. Aramat ipic, ow arke a mamkawi acajimtawef. E nat, wun ow aramat ipicam acatiwfes. Amamkawi owam takas apacayosfes.

³⁸Dor masirin, a wow aemamesas, atakam, car botaw aemin. Car e ow bapakapiemey. Car e ow bwem arapok. E aratakamam, apok bwemasam, asmat ow aras aranew, arma apakapioscema.

³⁹E nat, er Allah aras aranew, car e ow bwemkumimosom asan opok. Caram Allahcin owec aamocomokom openow.” Gamaliel inim aeefen. Bare, e atakam mamsakam ow, aratakam jen ajifesen.

⁴⁰Ar masirin, e atakam botaw batewosom ow ajatefesen. Aram omop aaffes, wunam jirmec ajirimfesen. “Car e Yesus atawef atakam, bootaw opok cowoka.” Inim aefesen. Aram e ow amirimosomfesen.

⁴¹Bare, e atakam botaw batewosom ow, e atakam mamsakam ow asan afasiosfesen. Bap ara, Allah e atakam botaw batewosom ow, ow tarowat aporefen. Inimas ar e ow e Yesus kerja bwemtam, wunam bajurusem, inim jirmec ajirimefen. E atakam botaw batewosom owam inimas aporfesen. Ar masirin, jak akat aememfesen.

⁴²Aram join fafayawiri, e Allah cem amanam, e cemnak amanam, e Yesus Kristus atakam aotawa ajiawirisen. Aram e Atakam Akat acacapioma ajiawirisen.