Read Central Asmat AEMAWIRISAS 7 Bible Online

AEMAWIRISAS 7 - Central Asmat bible

AEMAWIRISAS 7

¹E Allah atakam mamtaw tugas ipic awut masirin, jonow atowporefen. “E atawmes atakam, atakamnak open?” Inim aeefen.

²Stefanus masirin, atep ajitefen. “Ducura, betiwa, aykuna. Jen pajiey. E darak juwas Abraham, e Mesopotamia capinmi aemapef, e akatnakut Allah, aramat ipic bipu afomisefen. E Abraham e Haran capinmi jiwis batuwos opok arawen.

³Allah e Abraham atakamam aotawefen. ‘Or, e ojowowam, e ocapinmiam, bakan mamjiey. Oram e aporomtamcey capinmi mamjisosey.’ Inim aeefen.

⁴Aramat ipic masirin, e Kasdim ow capinmi bakan ajief, wunam e Haran capinmi aemapefen. Abraham aricipicam damir aafefen. Damir aafef masirin, Allah, e Abraham, e aemapmokom capinmi, jiwis atuwumosomefen.

⁵E jofay nat, Allah a capinmi e Abraham batetam opok cowok arawen. Ar capinmi kanimnakapam batetam opoken. Bare, e Abraham jiwi opoken. Allah nat, e atayi aeefen.

⁶Allaham atakam e aramat ipic aotawefen. ‘Orurpis jewey capinmi aemapcemes. E jewey ow, e orurpis kerja a bwemtam jirmec kow ajirimcemes. Aram e orurpis, tahun empat ratus ajiwar ajurusumawarcemes.

⁷Dor ara nat, e orurpis kerja bwemtam jirmec kow ajirimcemes samat, siksa bwem, atakam asakamtiwcimin. Asep ara masirin, e orurpis e capinmi bakan ajicemes. Aram arasan dor asicimcemenes.’ Allah inim aeefen.

⁸Allaham sunat aturan e Abraham atatitamefen. E sunat bwem, ‘Dar e Allah atayi aeforowas, ji aecomom,’ inim baporomtamas ara. Bare, Abraham e Ishak ajimefen. Ishak umur bar delapan ajiwar aemamesef, Abraham e jiwi sunat aemtiwefen. E Ishakam Yakub ajimefen. E Yakub masirin, e dasamat ji aeremfes ow dua belas ajiwar ajimefen.”

⁹“E dasamat ji aeremfes ow nat, e Yusuf icim afesfesen. Inimas ar aramat ipic wun ow samat atetamfes, wunam uang ajititfesen. E ow samat masirin, e Yusuf, Mesir capinmi ajisomosfesen. Allah nat, aramat ipic akac aemefen.

¹⁰Allaham aramat ipic e ajurusemefas takas, ajortewefen. Wunam e Yusuf e Mesir raja ipic juwas Firaun bipu aememef, Allah, aturan atakam, bi binip umutonam, e Yusuf atetamefen. E Firaun masirin, e Yusuf e Mesir capinmi ow takasam, e raja cem pok takasam, inim urus bwem ipic atewemefen.

¹¹Barewen. Jofay ara, e Mesir capinmi takasam, e Kanaan capinmi takasam, amos pok kanimnakas arawen. Ow arke ajurusemfesen. Darafasam amos opok aemapfesen.

¹²Yakub masirin, atakam jen ajiefen. ‘E Mesir capinmi amos pok awames.’ Inim atakam jen ajiefen. Jen ajief masirin, aramat ipic e darafas erasan atewosomefen. Er e Mesir capinmi bapnak ajisosfesas arawen.

¹³E capinmi aojisosfes masirin, Yusuf atakam e arepcewesam, arewecam, aotawefen. ‘Dor Yusuf ara.’ Inim aeefen. Inimas ara, e Firaun, Yusuf asamat, atakam jen ajiefen.

¹⁴Bare, Yusuf, atakam e aricipic atewosomefen. ‘Diwi. Oram, dajowow takasam, arasan mamenawey.’ Inim aeefen. E ow, tujuh puluh lima ajiwar arawen.

¹⁵Bare, e Yakub e Mesir capinmi ajisosefen. Erasan aramat ipicam, darafasam, damir aaffesen.

¹⁶Ow masirin, e damir ow, Sikem capinmi ajisomosfes, wunam erasan awuapomfesen. Bap ara, Abraham, e awerem asan, e Hemor atiperes, uang ajititefen.

¹⁷Bare, Allah, e capinmi, Abraham arurpis batetam atayi faknakut aeefen. E capinmi atetamcow jofay, bare sotop aenawefen. E darafasam, ow samat awut, e Mesir capinmi kayimin akakayiemfesen.

¹⁸Ay Mesir capinmi raja ipic nat, asitefen. E raja ipic e Yusuf amsom opoken.

¹⁹E raja, e dasamat ow tot aotefen. Aram e darafas ajurusumefen. Ar e darafas, esepen jiwi, cesen bajisjimirapom, jirmec kow ajirimefen. Er e jiwi damir bafas arawen.

²⁰Bare, e jofay ara, Musa ajisamesefen. Allaham e jiwi akat aporefen. Pir mamincop ajiwar, arisepes e jiwi e acem aman ajumatfesen.

²¹Ar masirin, e Musa, umuton asan ajiwtewapomfesen. Firaun apores nat, e jiwi atewetef, wunam atiwnak cimin ajumatefen.

²²Owam, e Mesir ow aratakamam, acescuwasam, e Musa amememtamfesen. E Musa masirin, atakam fak ipicam, kerja fak ipicam, aememefen.”

²³“Ar umur tahun empat puluh ajiwar aememef, aramat ipic e ajowow bi bapor, inim bi binip aceceremefen. Ajowow e Israel ow arawen.

²⁴Barewen. Jofay ara, Mesir ipic, Israel ipic ajurusumefen. Musa inimas aporef masirin, ar e Israel ipic akac aemefen. Aram bic ajiefen. Bare, ar e Mesir ipic acatiwefen.

²⁵Musa abi binip ara, ‘Allah dor a dojowow darop capinmi bojisos bajaromat ipic atewemfan. Dojowowam inimas amsom.’ Inim bi binip aceceremefen. E nat, ajowow inimas amsom opoken.

²⁶‘Ajofay ara masirin, aramat ipic ajowow ipic jamnuk owen mamcam aporefen. Musa masirin, e ipic jamnuk owen bakoromem jec awuefen. Aram atakam aotawefen. Tiperesa. Car samat cowkon. Ca nat, ucimas aamjursumamokom.’ Inim aeefen.

²⁷E ajowow ipic ajurusumef ipic nat, e Musa aotpemefen. ‘Or dakepala ipicam, dajiman baf ipicam, ca tewemfan?

²⁸To ara, or e Mesir ipic acatiwfem. Oram do bacatiw aemenemnew?’ Inim aeefen.

²⁹Musa inim atakam jen ajief ara, aram omar ajisosefen. Ar masirin, e Midian capinmi, jewey ipic aemapefen. Erasan ar ower jiwi jamnuk ajimefen.”

³⁰“Aramat ipic erasan tahun empat puluh ajiwar aemapef, wunam ar fa epcom os kari, sos afayef aporefen. Malaikat cowokam e jismak komen aman, Musa bipu afomisefen. Er sikon juwas Sinai sotop, cem opok asan arawen.

³¹Musa e malaikat aporef masirin, junum awutnakut aeefen. Aram sotop ameremef, wunam manmok fak acimakamomefen. Aram Tuhan atakam jen ajiefen.

³²‘Dor e orafas arAllah ara. Dor Abrahamam, Ishakam, Yakubam, arAllah ara.’ Inim aeefen. Bare, e Musa omar dam tetete aeefen. Inimas ar erasan manmok botiw opoken.

³³Tuhan masirin, atakam e Musa aotawefen. ‘Ewamcem asan, karow asan ara. Inimas e sandal basumtewey.

³⁴Dor e dosamat, e Mesir capinmi ajurusemawiris aporawiru. Doram e biwan aatamawiris jen ajiawiru. Dor masirin, a bajortew aneyey. Oram dey. Dor or e Mesir capinmi atewosomcimin.’ Tuhan inim aeefen.”

³⁵“Bap ara nat, e Israel ow, e Musa aotpemfes, wunam atakam aotawfes, ‘Or kepala ipicam, jiman baf ipicam, ca tewemfan?’ Inim aefesen. Allah nat, e ipic e ow akepala ipicam, abajortew ipicam, atewemefen. Bare, Allah, malaikat eras atakam Musa botaw, jirmec ajirimefen. Er Musa e fa epcom os kari aman aporef malaikat arawen.

³⁶Bare, e Musa e ow e Mesir capinmi bakan bajios, bap ajaromosefen. Aram junum bweas e Mesir capinmiam, e Laut Meraham, aemefen. Aram e Junum bweas, cem opok asan tahun empat puluh ajiwar aemawirien.

³⁷E Musaam atakam e Israel ow aotawefen. ‘Allah, e cajowow ipic cowok, aratakam botaw ipic, dor cimin atewemcema.’ Inim aeefen.

³⁸E Musa, e cem opok asan ajarewsifes ow, akac aememfesen. Bare, ar e darafas akac aememfesen. Aram e malaikat e sikon juwas Sinai op akac aememfesen. E malaikat masirin, atakam Musa aotawefen. Bare, Allaham e jiwne atakam e Musa atatitamefen. E atakam bare daras arawen.

³⁹Darafas nat, aramat ipic aratakam ji bwe pwicak arawen. Aram e Musa aotpemfesen. Aram e Mesir capinmi bofasi akat arawen.

⁴⁰Aram atakam Harun aotawfesen. ‘Or allah mamincop bakenemapomtamcarowey. E allah mamincop dar bap bajaromatcarowos. E jipic juwas Musa bap ajaromatforow. Dar masirin, e Mesir capinmi arakac bakan ajiosfom. E ipic nat, ucim pok emefnew? Dar namsom opok.’ Inim aefesen.

⁴¹Bare, e jofay ara, ar sapi jiwi ēco akenemapomfesen. Ar masirin, pok e ēco bipu atatitamfesen. Aram e aban akenemapomfesas aporfes, wunam jimin acukufesen.

⁴²Allah nat, e ow bak apayemefen. Ar, e ow e onam op bayar takas basicim, bakan ajiefen. Er e Allah atakam botaw ow aefes surat atakam jipu ara. E surat atakam: ‘Awamcokom Israel owa. E cem opok asan tahun empat puluh ajiwar aemapawirukum, car e acatiwa ajimpokom binatang do batetam open?

⁴³Opok. Car e Molok picin cem, atowomosa ajiawirukum. Caram e carallah juwas Refan abayar ēco atowomosa ajiawirukum. Car e ēco akenemapomfokom, wunam e pok asicimfokom. Inimas ara, dor car e kota Babel e poman capinmi, jiwis atuwumosomcimin.’ ” E surat inim atakam ara.

⁴⁴“Bare, darafas e ow opok asan aemapawiris, aram picin cem cowok aomomfesen. E picin cem, ‘Allah arasan awap,’ inim baporomtamas arawen. Allaham e cem bakenemapom atakam Musa aotawkurumefen. E ow masirin, e cem, e Musa aporef pok ben awcawor cowok akenemapomfesen.

⁴⁵Bare, e darafasut e picin cem atowopfesen. Allaham e jowon samatin samatin aotewerosomefen. Wunam darafasut, e Yusakcin, a capinmi akac atewetfesen. E picin cem, e Daud ajitemef jofay ajiwar, a capinmi aemamesawirien.

⁴⁶Daudam takas aemefen. Inimas Allah, aramat ipic, asan akat atetamefen. E Daud masirin, Allah cemnak bweapomtam, janim aramat ipic aanimefen. E Allah, bare Yakub arAllah arawen.”

⁴⁷E nat, Solomo e Allah cem aeapomtamefen.

⁴⁸“E opnakut Allah nat, e asmat aeapomanes cem aman bemap opok. Bare, e Allah atakam botaw ipic atakam aotawefen:

⁴⁹‘Tuhan atakam aotawma. A onam op, doraja fa bemap asan ara. E capinmi masirin, dobwey botapom asan ara. Ca nat, ucim cem aeapomtamcenokom? Wunam, e doses ban asan, ucim asanaram?

⁵⁰A pok takas, do kenemapomof araman.’ Tuhan inim aema.” E Allah atakam botaw ipic inim aeefen.

⁵¹“Car ara nat, jen opok ow awapokom ara. E cajakam, e cajenam, Allah mamkawi amsom opok owas ara. Car e carafasut inim awcawor ara. Car e Roh Kudus aatamotpemamokom.

⁵²E carafasut, e Allah atakam botaw ow takas ajurusumfes. Wun ow atakam aotawfes. ‘E Tarowat Ipic aenawcema.’ Inim aefes. E carafasut nat, e ow acatiwfes. Caram e Tarowat Ipic e jokmen ow aotasimemtamfokom. Caram e ipic acatiwfokom.

⁵³Allah e aJirmec atatitamefen. Malaikatam e Jirmec atakam Musa aotawfesen. Bare, car e Jirmec aomomfokom, e nat, car e Jirmec ji bwe opokut aemamokom.” Stefanus inim aeefen.

⁵⁴Barewen. E atakam mamsakam ow, inim atakam jen ajifes, ar namcan awutnakut aatfesen. Aram sis kekeke Stefanus bipu aemfesen.

⁵⁵E Roh Kudus nat, e Stefanus aomomkurumefen. Stefanusam e onam op, manmok fak acimakamemefen. Aram Allah arakatnakutas aporefen. Aram Yesus, Allah e ban bo jamam memem, aporefen.

⁵⁶Aramat ipicam atakam aotawefen. “Jakaperey! Dor e onam op bawarayos apormin ara. Dor e Asmat Anakat Ajaworemef Ipic e Allah ban jo jamam memem apormin ara.” Inim aeefen.

⁵⁷E ow masirin, jokmen atakam afakaytawfesen. Ar ajen apwirimoptotorfesen. Aram Stefanus batew, je ajiramenfesen.

⁵⁸Aram aramat ipic e kota ajimomisfes, wunam ek e aramat ipic dampu ajimirokopomfesen. Eras manmok atiwfes ow masirin, apakaian, ay ipic juwas Saulus manmok batiwtam, e abweypu atatiwfesen.

⁵⁹Bare, e ow e Stefanus ek ajimirokopomfesen. Stefanusam janim Tuhan aanimefen. “Tuhan Yesus. E doranakat ipic batewey.” Inim aeefen.

⁶⁰Ar masirin, jine onok aotapefen. Atakamam afakaytewefen. “Tuhan. Or awamces ow adosa, bi binip bacomom arapok.” Aramat ipic inim atakam afakaytewef masirin, aram damir aafefen.