Read Central Asmat AEMAWIRISAS 8 Bible Online

AEMAWIRISAS 8 - Central Asmat bible

AEMAWIRISAS 8

¹Saulusam e ow e Stefanus bacatiw akat aporefen. E jofayam, ow e Yerusalem Yesus basicim barewsi ow, awutnakut ajurusumfesen. E Yesus basicim ow masirin, e Yudea capinmiam, e Samaria capinmiam, apacayosfesen. E atakam botaw batewosom ow nat, bapacayos opok arawen.

²Tuhan mamkawi fak owam, e Stefanus awuapomfesen. Aram e Stefanus bwec awutut abwecfesen.

³Saulusam e Yesus basicim barewsi ow, awutnakut ajurusumefen. Ar e cemin cemin afiwa aeefen. Wunam owerowam, cepesam, ajijimomisa aeefen. Aram e ow penjara cem atawima aeefen.

⁴E apacayosfes ow nat, e Atakam Akat, e asan takas acacapiomfesen.

⁵Filipusam Samaria capinmi kota cowok ajisosefen. Ar e ow Kristus atakam aotawefen.

⁶E ow arke, e Filipus atawef atakam, jen cowok ajifesen. Aram e aemef junum bweas aporfesen. Ar masirin, aratakam jen ajikurumfesen.

⁷Erasan ow arke, e ajak aman, dat arawen. E datam jen awut ajifes, wunam e ow jak aman awarimfistotorfesen. Japow ow arkeam, jine kamwis ow arkeam, ajaworemfesen.

⁸Bare, e kota ow jak akatnakut aememfesen.

⁹Bap ara, jipic juwas Simon e kota aemapawirien. Aram dat epcom ipic arawen. E Samaria ow, e Simon aemawirias aporawiris, wunam junum awut aeawirisen. Aramat ipicam atakam aotawefen. “Dor ow awutut ara.” Inim aeefen.

¹⁰E kota ara, e awut ow takasam, e mami ow takasam, aramat ipic aratakam jen ajikurumfesen. E owam, “E allah juwas Fakperkampic a capinmi aneyef. Ar e Simon ara.” Inim aefesen.

¹¹Tareynakut ara, e ipic, e dat epcom junum bweas, e ow aporomtamawirien. Inimas ara, e owam junum awut aeawirisen. Aram aramat ipic atakam jen cowok ajiawirisen.

¹²Filipus nat, e Allah Pemerintah Atakam Akatam, e Yesus Kristus Atakam Akatam, e ow acacapiomefen. Ow masirin, e Yesus Kristus asicimfes owerowam, cepesam, bwi abwimfesen.

¹³E Simonam e Yesus Kristus asicimefen. Ow masirin, aramat ipic bwi abwimfesen. Aramat ipic bwi abwief, ar Filipus akac aemapawirisen. Ar e Filipus e junum bweas aemawiri aporawiri, ar junum awutnakut aeawiri.

¹⁴Barewen. E Samaria ow, e Allah atakam ji aefesen. E Yerusalem aemapfes atakam botaw batewosom ow, inim atakam jen ajifes, ar Petrusam, Yohanesam, e owpu atiwirimfesen.

¹⁵Petrusam, Yohanesam, erasan ajaremfes, er Allah e Roh Kudus e ow batetam janim aanimfesen.

¹⁶Bap ara, ow e ow bwi abwimfes, ar Tuhan Yesus juwas cowok ajiemfesen. Inimas e Roh Kudus e ow jak aman bafiwaptotor opoken.

¹⁷Bare, e Petrusam, e Yohanesam, ban e ow dam ton atatiwfesen. Atatiwfes masirin, e Roh Kudus e ow jak aman afiwaptotorefen.

¹⁸Bare, e atakam botaw batewosom ow, ban e ow dam ton atatiwfes ara, Allah, Roh Kudus e ow atetamefen. Simon inimas aporef masirin, ar uang e Petrusam, e Yohanesam, batetam aememefen.

¹⁹Aramat ipicam atakam aotawefen. “Car e fakas do tetamcan. Inimas ara, dor ban, ow dam ton atatiwcey, e Roh Kudus e ow jak aman afiwapcema.” Inim aeefen.

²⁰Petrus masirin, atakam e ipic aotawefen. “Oram bi binip aceceremamem, ‘Dor e Allah atetamcowas, uang baytit ara.’ Inim aemem. Inimas oram, e oruangam, e neraka mamfiwey.

²¹Or Allah atakam ji bwe opok. Inimas e Allah kerja bwemtam, bare oram arapok.

²²E aemamem pwicakas bak mampayemey. Oram janim Tuhan mamanimey. Aramat ipic e bi binip aceceremamem dosa akokoromosomtamceman openow.

²³Or icim awutnakut afesmem. Oram dosa atakam ji aekurumamem. Dor inimas apormin.” Petrus inim aeefen.

²⁴E Simon nat, atakam aotawefen. “Car janim Tuhan manimtamcan. E atakam atawmokomas dor bwemasin.” Inim aeefen.

²⁵Bare, e atakam botaw batewosom ipic jamnuk e Tuhan atakam atemen aatamfesen. Aram e Tuhan atakam e ow aotawfesen. Aotawkurumfes masirin, aram Yerusalem aojisosfesen. E bowsec ara, aram e Atakam Akat, Samaria capinmi samat arke aotawfesen.

²⁶Barewen. Tuhan amalaikat, atakam Filipus aotawefen. “Basitey. Bokot bip Yerusalem awames. E bokot cowok e wun bokot bip Gasa awames. Oram e bokot mamjisosey. E bokot, cem opok asan ara.” Inim aeefen.

²⁷Bare, e Filipus asitef wunam ajarefen. E bowsec ara, ar Etiopia capinmi pemerintah ipic awut biamnuk aemamtewefen. E ipic e Etiopia raja cowoc juwas Kandake arakat pok takas manmok batiwtam ipic arawen. Bap ara, e ipic Yerusalem ajisosefen.

²⁸E jofay ara, aramat ipic, arop capinmi bofasi, kereta aman aemapefen. Aram, e Allah atakam botaw ipic juwas Yesaya aeapomef buku baca aemapefen.

²⁹Roh Kudus masirin, atakam Filipus aotawefen. “Or e kereta sotopa. Oram e kereta akac jamjarey.” Inim aeefen.

³⁰Bare, Filipus e keretapu akukuosefen. Aram e pemerintah ipic, e Yesaya aeapomef buku baca bwem, jen ajiefen. Filipus masirin, jonow atowporefen. “E baca aemamemas, o nat, omsom?” Inim aeefen.

³¹E pemerintah ipic masirin, “Ow dor mamememtam opok aecenes, do nat, nomsom bwememem asan opok. O nat, dey. A capinmi ci jamkunawapey.” Inim aeefen.

³²E baca aemapef buku inim atakam ara: “Ow aramat ipic atowomosfes. Aram ow acatiwces domba jiwi inim cimin atowomosfes. Ow domba jiwi fin basesakamosom aeces, e domba jiwi jokon ajiemcemes. Aramat ipicam inim cimin jokon ajiemef. Ar atakam opok cowok.

³³Ow aramat ipic, jipic pwicak inim cimin aomfes. E salah atakam basakamtiw owam, aramat ipic atakam asakamtiwfes. E nat, ar suw atakam asakamtiwfes. Owam aramat ipic acatiwfes. Bare, e aramat ipic awaniemfes ow, jokmen awutnakut aememfes. Inimas owam e jokmenas, atakam bwemotawkurum asan opok.” Inim atakam baca aemapefen.

³⁴E pemerintah ipic masirin, atakam Filipus aotawefen. “Atakam botawcan. E Allah atakam botaw ipic, ca ipic atakamam? Arma atakamnew? Kawey ipic atakamnew?” Inim aeefen.

³⁵Filipus masirin, e baca aemef buku, atakam acowomtamefen. Ar e Yesus Atakam Akat, aramat ipic aotawefen.

³⁶Filipusam, e pemerintah ipicam, e kereta aman atatajarfesen. Aram bwi sotop atatajarfesen. E pemerintah ipic masirin, atakam aotawefen. “Bwi awse ara. Dor or bwi do babwim akat ara. Inimas acuw bat ow open?” Inim aeefen.

³⁷Filipus masirin, atakam aotawefen. “O nat, basicim anakatnew, bare or bwi babwim araman.” Inim aeefen. E pemerintah ipic masirin, “Yesus Kristus, Allah atiw ara. Dor aramat ipic asicimamin.” Inim aeefen.

³⁸E pemerintah ipic masirin, e kereta batukap jirmec ajirimefen. Bare, Filipusam, aramat ipicam, e bwi aneysefesen. Filipus masirin, e ipic bwi abwimefen.

³⁹Aram e bwi asowtometfesen. Asowtometfes masirin, Tuhan Roh, e Filipus ajisomosefen. E pemerintah ipicam, e Filipus bi bopor opoken. Aramat ipic nat, jak akat cowok arop aojisosefen.

⁴⁰Bare, ow, Filipus bi, kota Asdod aporfesen. Aramat ipic masirin, e samatin samatin takas ajarefen. Aram e Atakam Akat acacapiomefen. Bare ar e atakam e kota juwas Kaisarea ajiwar aotawefen.