Read Central Asmat AEMAWIRISAS 9 Bible Online

AEMAWIRISAS 9 - Central Asmat bible

AEMAWIRISAS 9

¹Barewen. Saulusam jokmen atakam awutut e Tuhan mamkawi ow aotawa ajiawirien. Aram e ow bacatiw atakam aotawa ajiawirien. Aramat ipic masirin, e Allah atakam mamtaw tugas ipic awut bipu ajisosefen.

²Ar surat kuasa janim aanimefen. Ar e surat kuasa, e kota Damsik sembahyang cem takas kepala ow batetam aememefen. Inimas erasan ara, Saulus, e Tuhan bokot bacowojar owerownew, cepesnew, aporcow, aramat ipic e ow ban bakimom ara. Aram e ow manam bajikapom, wunam Yerusalem bajisomosom ara. Inim surat kuasa janim aanimefen.

³Bare, Saulus e Damsik ajarefen. Damsik sotop inim ajaref masirin, onam op sereas awutnakut afumi asarimseremnemefen.

⁴Bare, aramat ipic cenes aneyjuamesef, wunam atakam jen ajiefen. “Saulus. Saulus. Or dor jopom ajurusumamenem?” Inim atakam jen ajiefen.

⁵Saulus masirin, “Tuhan. O cam?” Inim aeefen. Aramat ipic masirin, “Do Yesus ara. Dor e ajurusumamenem ipic ara.

⁶Or ara nat, basitey. E kota aman apiwey. Ow, e aemcemas, atakam or aotawceman.” Inim aeefen.

⁷E Saulus akac ajarfes owam, atakamin jen ajifesen. Ar ow bi bapor opok cowoken. Inimas ar junum awutnakut aefesen. Aram jokon cowok ajiemfesen.

⁸Bare, Saulus asitefen. Aram manmok terey aememef, e nat, aram bwempor asan opok cowok arawen. Ow masirin, aramat ipic ban fe e kota Damsik ajijimomiwfesen.

⁹Bar mamincop ajiwar, aramat ipic, manmok bwemtiw asan opoken. Ar amosam, bwiam, ban opok cowok arawen.

¹⁰Barewen. E Damsik ara, Yesus mamkawi ipic juwas Ananias aemapefen. Aramat ipic pok cowok desen aporefen. Tuhanam, atakam, aramat ipic aotawefen. “Ananias.” Inim aeefen. Ananias masirin, “Tuhan. Dor awamcey ara.” Inim aeefen.

¹¹Tuhan masirin, “Oam basitey. E bokot jof juwas Tarowat mamjisosey. Or masirin, Yudas cem mamojisosey. Erasan kota Tarsus ipic juwas Saulus jonow mamtowporey. Aramat ipic janim dor aanimaman.

¹²Aram jipic cowok juwas Ananias esen aporma. Ananias ban e aramat ipic dam ton atatiwma. Er e amanmok bateremtamas ara. Inim pok desen aporma.” Tuhan inim aeefen.

¹³Ananias masirin, “Tuhan. Dor e ipic aemefas, atakam arke jen ajia aeof. Wun orow tarowat e Yerusalem aemapmes. E ipic, jokmenas e ow aomefen. Doram inim atakam jen ajiof.

¹⁴E Allah atakam mamtaw tugas ow awut, e ipic, e or asicimamenes ow, manam bajiktiw, atakam aamsakamfes.” Inim aeefen.

¹⁵Tuhan nat, atakam e Ananias aotawefen. “Bare. Oram baysosey. Dor e ipic, e dojuwas, e Yahudi opok samatam, e raja owam, e Israel owam, atakam botaw aeremtewof.

¹⁶E ipic kerja dor aemtamceman. Inimas aram ajurusemcema. Doram eras aramat ipic aporomtamcimin.” Inim aeefen.

¹⁷Bare. Ananias ajisosefen. Ar e cem afiwef, wunam aban Saulus dam ton atatiwefen. Aram atakam aotawefen. “Saulus. Or dojowow ipic ara. Or e bokotpu arasan aenawfem, Tuhan Yesus masirin, e obipu afomisfan. Aramat ipicam dor arasan atewenamaman. Er e omanmok batereyas ara. Eram Roh Kudus or momomkurumas ara.” Inim aeefen.

¹⁸Bare, enampa cimin pokk Saulus e amanmok ewkorneyefen. Amanmok masirin, aotereyemefen. Saulusam asitef, wunam ow, aramat ipic bwi abwimfesen.

¹⁹Aramat ipic masirin, amos aemenef, wunam fak aoememefen. Bare, aramat ipic e Damsik capinmi Yesus mamkawi ow, bar mamincop cowkon ajamememefen.

²⁰Aramat ipicam Yesus atakam e sembahyang cem aman akan acacapiomefen. “Yesus Allah atiw ara.” Inim aeefen.

²¹E aratakam jen ajifes ow takas junum aefesen. Aram jonow atowporfesen. “Ewamec ipic e Yerusalem Yesus basicim ow ajurusumef ipic aranew? Aram, e ow manam bajikapom, wunam e Allah atakam mamtaw tugas ow awut abipu batowom aenawef ipic aranew?” Inim aefesen.

²²Saulus e atawef atakam, fak kayimin akakayimtawefen. Aram atakam umutonnakut, e Damsik aemapfes Yahudi ow, aotawefen. “Yesus, e Allah Aeremtewef Ipic ara.” Inim aeefen. E ow masirin, atep bwemjit asan opoken.

²³Isi arke ara masirin, e Yahudi ow, e Saulus bacatiw, atakam aamsakamfesen.

²⁴Saulus nat, e atakam aamsakamfesas, jen ajiefen. E ow jokam, iramam, e kota fumi ek pagar jimasap takas, manmok atiwapfesen. Ar Saulus bacatiw aemfesen.

²⁵Iram nat, Saulus amamkawi ow, aramat ipic atewfesen. Ar aramat ipic ek pagar jof afimisimfes, wunam tem ese aman cenes atewnemfesen.

²⁶Bare, Saulus Yerusalem ajisosefen. Ar e Yesus mamkawi ow ajamkawiemporefen. E ow nat, ar omar aefesen. Ar Saulus, Yesus mamkawi pir aeef inim arawen.

²⁷Barnabas nat, aramat ipic atawef, wunam e atakam botaw batewosom ow bipu atowocenefen. Aram atakam e ow aotawefen. “A Saulus e bokotpu ajaref, ar Tuhan bi aporef. Tuhanam atakam aramat ipic aotawef. Aramat ipicam e kota Damsik aememef, ar Yesus atakam umutonnakut acacapiomef.” Barnabas inim aeefen.

²⁸Barewen. Saulus e ow e Yerusalem asan takas akac ajarfesen. Aram Tuhan atakam umutonnakut acacapiomefen.

²⁹Aram e Yunani atakam Yahudi ow, atakam aamtawfesen. E ow nat, Saulus bacatiw aemfesen.

³⁰E Yesus mamkawi ow inim atakamam jen ajifesen. Inim atakam jen ajifes masirin, ar Saulus e kota Kaisarea ajisomosfes, wunam aramat ipic kota Tarsus atewosomfesen.

³¹Bare, e Yudea capinmiam, e Galilea capinmiam, e Samaria capinmiam, e Yesus basicim barewsi ow takas bojurus opok aemapfesen. Ar Yesus fak ajamkawifesen. Aram Tuhan omar aefesen. E Roh Kudusam jak fak e ow atetamefen. Inimas Yesus basicim ow, arke kayimin akakayiemfesen.

³²Barewen. Petrus e asanin asanin acowojarefen. Jofay ara, aram e Lida capinmi tarowat ow bipu ajisosefen.

³³Erasan, aramat ipic jipic juwas Eneas biamnuk aemamtewefen. E ipic, japow ipic arawen. Tuhan delapan ajiwar ar e tepen ton bwemsit asan opoken.

³⁴Bare, Petrus atakam e ipic aotawefen. “Eneas. Yesus Kristus or ajaworomsumutumaman. Basitey. Otepen batawkenemapomey.” Inim aeefen. Bare. Aramat ipic asarimsitefen.

³⁵E kota Lida aemapfes ow takasam, e Saron capinmi aemapfes ow takasam, aramat pic aporfesen. Aram bin afirifes, wunam Tuhan ajamkawifesen.

³⁶Barewen. Kota Yope ara, Tuhan mamkawi cowoc juwas Tabita aemapefen. (Yunani atakam, ajuwas “Dorkas” arawen. E juwas “Dorkas” daratakam juw buwumtew, “rusa” ara.) E cowoc aemawirias akatnakut arawen. Aram pok opok ow, pok atatamawirien.

³⁷Jofay ara, e cowoc dam ajowef, wunam damir aafefen. Ow masirin, e damir cowoc bwi abwimtiwfesen. Bwi abwimtiwfes masirin, op kamar atomettatiwfesen.

³⁸E Yesus mamkawi ow nat, “E Petrus, Lida capinmi awap,” inim atakam jen ajifesen. Aram Lida ase opok aporfes, wunam jipic jamnuk, e Petrus bayte, atewosomfesen. “‘Sarim mamenawey,’ e Petrus inim mameey.” Inim aefesen.

³⁹Bare, Petrus asitef, wunam e ow akac ajarfesen. Erasan ajaremef masirin, ow, aramat ipic, e op kamar atowotometfesen. E fwisma cepesam, afumi aamwiciremfesen. Aram e Dorkas, e tetakay emapawiri, e akekemawiri bajuam, pakaianam, takas aporomtamfesen.

⁴⁰Petrus nat, e ow takas, cesen bawarimwis, jirmec ajirimefen. Ar masirin, jine onok aotapef, wunam janim Allah aanimefen. Aram e damir cowoc bin afiromef, wunam atakam aotawefen. “Tabita. Basitey.” Inim aeefen. E cowoc masirin, manmok atiwtereyefen. Ar Petrus bi aporef, masirin asitapefen.

⁴¹Bare, Petrus e cowoc ban atewef, wunam asumutumemefen. Ar masirin, e tarowat owam, e fwisma cepesam, ajateefen. Aram e cowoc, tetakay, e ow aporomtamtotorefen.

⁴²E kota Yope ow takasam inim atakam jen ajifesen. Owam arke Tuhan asicimfesen.

⁴³Bare, Petrus bar arke e Yope aemapefen. Ar binatang picin kerja ipic juwas Simon acem aemapefen.