Read Central Asmat ROMA 1 Bible Online

ROMA 1 - Central Asmat bible

ROMA 1

¹Dor Paulus ara. Doram Kristus Yesus akerja bwemtam ipic ara. Bare, Allah, atakam botaw batewosom ipic atewemfan. Aram, e Aratakam Akat botaw, aeremtewfan.

²Ametnak ara, Allah, e Atakam Akat, e aratakam botaw ow, aotawefen. E ow masirin, e atakam, e Alkitab aman, tulis aeapomfesen.

³E atakam, Allah atiw atakam ara. Aramat ipic asmat ipic aememef, ar Daud urpis ajisamesefen.

⁴Bare, e atakam, Yesus Kristus atakam ara. Aramat ipic, daTuhan ara. Aram Allah ara. E aramat ipic, bare tarowatnak ara. Allah afaknakutas, aramat ipic aojaworomsumutumefen. Inimas Allah, e Yesus Kristus atiw ara, inim aporomtamefen.

⁵E Kristus aemefas, asan akat aemapomforow. Inimasam ara, Allah, dar atakam botaw batewosom ow kerjaas atetamforow. Er Kristus kerja bwemtamas ara. E kerja ara, e samatin samatin takas Kristus basicimam, aratakam ji bweam, inim atakam botaw ara.

⁶Caram a atakam jen ajifokom wun samat cowok ara. Allah, bare, car Kristus arow memem ajatefan.

⁷Inimas ara, dor a surat, e car Roma bemap oe, atetamamin. Allah, bare, damos car ajiomaman. Aram car atarowat ow memem ajatefan, Bare, daricipic Allaham, Tuhan Yesus Kristusam, asan akat car baomcan. Aram jak akat car batetamcan.

⁸A atawmin bapnak atakam inim ara: Car Yesus Kristus faknakut asicimamokom. E capinmiin capinmiin owam inim atakam jen ajifes. Inimas ara, dor terima kasih atakam e dorAllah aotawmin. E terima kasih atakam aotawmin, bare e Yesus Kristus aemefas ara.

⁹Join fafaymar, janim Allah aanimcey, dor car janim Allah aanimtamcimin. Allaham inimas amsom. Dor e aramat ipic atiw e Atakam Akat acacapiomamin. Inimas dor Allah kerja faknakut aemtamamin. Bare, tareynakut ara, dor jaki e cacapinmi bajit jak aseremomawiru. Allah akat aporcow, doram eras sarim inim aemcimin. Doram inimas janim aramat ipic aanimamin.

¹¹Dor e Allah Roh, asan akat car atetamcanas, atakam car botaw akat ara. Inimas dor, cabi bapor, jak aseremomamin. Car masirin, jak fak aememcomokom.

¹²E atawmin atakam ara, car dor Yesus basicimnak aporcokom, jak fak aememcomokom. Doram, car Yesus basicimnak aporcey, jak fak aememcimin.

¹³Dojowow akatonokom. Car e atawcey atakam baporkurum akat aemin. Dor jaki e cacapinmi bajit, atakam asakamtiwa aeof. Do nat, wow ajiwar e cacapinmi jaki bwemjit asan opok. Bare, doram Yesus mamkawi e ca wun ow mamemememapom akat aemamin— e wun Yahudi opok samat aemofas inim cimin ara.

¹⁴Tuhanam jirmec ajirimfan. Inimas dor, e Atakam Akat, ow takas botaw, akat aemamin. E Yunani owam ara. E wasan aemapmes owam ara. E sekolah awut aemawiris owam ara. E sekolah opok owam ara.

¹⁵Inimas ara, dor, e Atakam Akat, e Roma aemapmokom owam bacacapiom jak aseremomamin.

¹⁶Bare, dor e Atakam Akat botaw namke opok. E Atakam Akat, bare fak ara. Inimas Allah e Atakam Akat basicim ow ajortewcema. Ar e Yahudi ow bap ajortewma. Wunam, ar e Yahudi opok owam ajortewma.

¹⁷Allah, wun ow, ow tarowat ara, inim atakam asakamtiwcema. E Atakam Akat, bare e atakam ara. Allah e asicimames ow cowok, ow tarowat ara, inim atakam asakamtiwcema. Er e Alkitab atakam jipu ara: “Allah e asicimames ow, ow tarowat atakam asakamtiwcema. E owam jiwnenak aemcemes.” E Alkitab inim aema.

¹⁸Bare, ow dosa aemames. Aram fasias aemames. Inimas ar wun ow e Allah atakamnak jen bajikurum akekemames. Allaham e aemamesas bifan afayomama. Inimas ar bajurusumas e owpu atewnemcema. Aram eras aporomtamama.

¹⁹Ow, e Allah aemefas, umuton apormes. Allaham, eras, e ow umuton aporomtamawiri. Inimas aramat ipic e ow siksa aemcema.

²⁰E Allah a capinmi akenemapomef jofayam, wow ajiwaram, ow, Allah afakas bakari opok cowok, inim aporawiris. Aram, aramat ipic, Allah anakat ara, inim aporawiris. Ow, Allah ajipuas, manmok bwemtiw asan opok. E nat, ow e Allah akenemapomefas aporces, aram e ajipuas bapor asan araman. Inimas ara, e ow, e aemawiris dosa, bwempacin asan opok.

²¹E owam Allah amsom ara. E nat, ar, aramat ipic basicim pwicaken. Ar, “Or Allah anakat ara,” inim baji opok. Aram, terima kasih atakam Allah botaw opok. Abi binip nat, pwicak arew. A bi binip, fasiam, jiwicnakutam, arew.

²²E ow atakam, “Namsomnakut,” inim aefes. E nat, ar jennakut ara.

²³Aram e jiwne Allah basicim akoremfes, wunam ēco asicimfes. E ēco, e jiwne opok asmat ownew, soknew, e bwey ajijarmes poknew, e cupun ajijarmes poknew, inim awcawor ara.

²⁴Inimas ara, Allah, e ow aseremomfes jursumecas bwemawar, akoremef. E ow masirin, jursumecas aamames.

²⁵Ar e Allah atakamnak basicim pwicaken. Inimas ar suw atakam asicimfes. Ar e Allah akenemapomef pok asicimfes. Aram e pok atakam ji aefes. Ar nat, e pok akenemapomef ipic basicim opok. Aram aratakam ji bwe opok. Ow nat, aramat ipic baatamsicimawarces. Bare, a atakam, atakamnak ara.

²⁶Bare, Allah e ow e pwicakas bwem aporef. Ar masirin, e ow, e jak aseremomfes jursumecas bwemawar, akoremef. Bare, e ow acepes e amiwis jimwec bam opok. E cepes nat, aramaman jursumecas aamfes.

²⁷Amiwisam inimas aemfes. Aram jiwmec e acepes bam opok. E owerow, aramaman jak aamsinomfes. Ar jursumecas aamfes. Inimas ara, Allah, e ow ajurusumef. E ajurusumefas, e ow aemfes dosa jipu ara.

²⁸E ow, e Allah atakamnak, binip bacomom pwicaken. Inimas ara, Allah e ow e jursumec bi binip baceceremawar akoremef. Aram e ow e pwicakas bwemawar akoremef.

²⁹E ow, bare dosa jukpiri aemames. Aram fasias aemames. Aram kawey pok aseremomames. Aram kawey ow bifan afayomames. Aram icim afesmes. Aram daw acatiwmes. Aram owen aamomes. Aram suw atakam atawmes. Ar, kawey ow, pwicak ow, inim binip aceceremames. Aram kawey ow aemfesas, suw atakam ajomatmes.

³⁰Aram kawey ow pwicak atakam aotawmes. Aram Allah bifan afayomames. Ar arma atawsicimames. Aram ay dosa bwem bi binip awut aceceremames. Ar arisepes atakam aopowmes.

³¹Aram bi binip opok ara. Aram e atayi aefesas jipu bacowoy opok ara. Ar ow asan akat momom opok ara. Ar ow saw akat bom opok ara. Bare, ar inim ow ara.

³²Allah nat, atakam asakamtiwef. “Inim pok bwem ow, damir baafces.” Inim aeef. E owam inim atakam amsom. E nat, ar inim pok bwem bakorem opok. Aram, e kawey ow inim pok bwem, akat aemames.