Read Central Asmat ROMA 10 Bible Online

ROMA 10 - Central Asmat bible

ROMA 10

¹Dojowow akatonokom. Dor e Yahudi ow bajorem, jak aseremomamin. Dor inimasam janim Allah aanimamin.

²E ow, kerja Allah bwemtam, akat aememames. E nat, e kerja bwemtamas amsomnak opok.

³Ar e Allah ow tarowat atakam basakamtiwasam, amsom opok. Aram ow tarowat arma memem aemporfes. Inimas ar, e Allah, ow tarowat atakam basakamtiwas, aotpemfes.

⁴Kristus, bare e Musa tulis aeapomef Jirmec, akarimtiwef. Inimas Allah e Kristus asicimames ow takas, ow tarowat ara, inim atakam asakamtiwma.

⁵Ow e Jirmec ji aeces, Allah e ow, ow tarowat ara, inim atakam asakamtiwcemarnew? Opoknew? Bare, Musa eras surat aeapomefen. “E Jirmec ji bwekurum ow, jiwne aememcemes.” Inim aeefen.

⁶E Alkitab nat, Allah e Kristus asicimames ow, ow tarowat ara, inim atakam basakamtiw, bare, inim atakam atawma: “ ‘E onam op ca tometcow?’ inim bi binip bacecerem arapok.” Inim aema. (Inim bi binip, Kristus awames capinmipu batowoney bi binip ara.)

⁷Wunam: “ ‘E damir ow asan ca neycow?’ inim bi binip bacecerem arapok.” E Alkitab inim aema. (Inim bi binip, e Kristus bajaworomsumutum bi binip ara.)

⁸E nat, e Alkitab atakam ara: “Allah aratakam, bare or sotop awames. Oram e atakam emeotawfem. Oram e atakam bi binip emececeremfem.” Inim aema. Inim atakam, e Kristus basicim acacapiomamom atakam ara.

⁹Or atakamnak aotawcem: “Yesus, bare Tuhan ara,” inim aecem, wunam or, Allah, e Yesus aojaworomsumutumef, inim atakam asicimcem, bare Allah or ajortewceman.

¹⁰Bare, ow Yesus asicimces, Allah, e ow, ow tarowat ara, inim atakam asakamtiwcema. Wunam, ar inim atakamnak aotawces, Allah e ow ajortewcema.

¹¹E Alkitab atakam: “E aramat ipic asicimames ow takas, namke opok aememcemes.” Inim aema.

¹²E Yahudi owam, e Yunani owam, bare awcawor ara. E taka aTuhan, bare cowokut ara. Aramat ipic, e janim ar aanimces ow takas, asan akat atetamcema.

¹³Bare, ow janim Tuhan aanimces, aramat ipic e ow ajortewcema.

¹⁴E aramat ipic basicim opok ow nat, janim e aramat ipic bwemanim asan opok. Wunam, e aramat ipic atakam jen baji opok ow, e aramat ipic bwemsicim asan opok.

¹⁵Wunam, ow, atakam botaw ow batewosom opok aemces, ow, aramat ipic atakam jen bwemji asan opok. Er e Alkitab atakam jipu ara: “Ow, e Atakam Akat atowotnawces, bare akat cowok ara!” Inim aema.

¹⁶Wun ow nat, e Atakam Akat, ji bwe opok. Yesaya atakam ara: “Tuhan. E aotawfom atakam asicimames ow, bare arke opok.” Inim aeefen.

¹⁷Bare, ow Kristus atakam aotawces, ow e atakam jen ajicemes. Wunam ar e Kristus asicimcemes.

¹⁸Do nat, jonow batowpor ara. E ow, e atakam jen baji opok open? Bare, jen emcajifes. E Alkitab atakam ara: “Ow, e atakam, e capinmi takas ow emeotawfes. Ow takas e atakam jen emejifes.” Inim aema.

¹⁹Doram jonow botow. E Israel ow e atakam amsom opoknew? Aram amsom araman. E Musa, e ajonow atowminas atep bap ajitefen. Ar Allah atakam aotawefen: “Dor, dorownak opok ajortewcimin. Car masirin, icim afescomokom. Dor jen ow ajortewcimin. Car masirin, jak amop aememcomokom.” Allah inim aeefen.

²⁰Yesayaam jak fak epcom, atakam aotawefen: “Allah inim atakam aotawma: ‘E dor bapowpor opok ow, bare atewfenes. Doram e jonow dor batow opok ow bipu ajisomof.’ ” Inim aeefen.

²¹Aramat ipic nat, Israel atakam aotawef. “Allah inim atakam aotawma. ‘Jo ajirowmar, dor e ow batew, ban ajoromamin. E ow nat, atakam bopow ow ara. Aram jen opok ow ara.’ ” Inim aeefen.