Read Central Asmat ROMA 11 Bible Online

ROMA 11 - Central Asmat bible

ROMA 11

¹Dor jonow batowmin. Allah, e arow aotpemefnew? Ar inimas opok! Doram Israel ipic ara. Dor Abraham urpis ara. Dor Benyamin samat ipic ara.

²Allah, arow botpem opok. Ametnak ara, Allah, e ow aeremtawefen. Ca nat, e Alkitab aman e Elia atakam camsom opoknew? Aramat ipic, e Israel e atakam fak Allah aotawefen:

³“Tuhan. E ow, e oratakam botaw ow, acatiwfes. Aram, e opok jis bafamtam jowse arke afakamfes. Dor cowok aeketemof ara. E nat, aram do bacatiw aempormenes.” Inim aeefen.

⁴Allah nat, ucimas atep ajitef? “Dor ow tujuh ribu ajiwar aereremapomof. E ow, e ēco juwas Baal bipu jine onok baneyotap opok cowok.” Allah inim aeefen.

⁵Wowam inim cowok ara. Ow bimis awamces. Allah e ow asan akat mami batetam aemef. Inimas ar e ow aereremtawef.

⁶Aramat ipic, e ow pok akat aemfes aporef, wunam aereremtawef, inim aranew? Inimas opok. Ar asan akat e ow mami batetam aemef. Inimas ar e ow aereremtawef. Allah, ow, pok akat bwem epen batakampor, wunam e ow bwereremtaw, inimas aemef ayaw, bare ar asan akat e ow mami bwemtetam opok.

⁷Inimas ara, e ow ucim inimaram? E Israel ow, e apowporfesas batew opok aemfes. E Allah aeremtawef ow bimis nat, eras atawfes. Allaham, e wun ow jen fak aemapomef.

⁸E Alkitab atakam ara, “Allah e ow bi binip sumu aemapomef. Aram e ow manmok jiwic cimin aemapomef. Aram e ow jen biri cimin aemapomef. Wow ajiwaram, e ow inim inim aemapmes.” Inim aema.

⁹Daudam atakam aotawefen: “E ow pokbwi aances, Allah e ow jerat bakemop inim cimin baemcow. Aram e ow siso baneykomop inim cimin baemcow. E ow baneykarawuamesces. Allah e ow pomatam baemcow.

¹⁰E ow manmok jiwic baemapces. Ar pok bwemporasin. Ow pok jutur batew jimas bajiriney inim cimin, asan pwicak baemapces.” Daud inim aeefen.

¹¹Dor jonow batowmin. E Israel ow pok bwey aapomotfes, ar aneykarawuamesfes. Inimas ar bwemosit asan opoknew? Aram aositcemes araman. Ar dosa aemfes. Inimas Alla, e Israel opok ow, ajortewma. Er e Israel ow icim bafesemapomas ara.

¹²E Israel ow dosa aemfes. Inimas a capinmi samatin samatin asan akat aemapmes. E Israel ow asan pwicak aemapfes. Inimas e Israel opok ow asan akat aemapmes. E nat, e Israel ow takas Kristus ajamkawikurumces, bare e Israel opok owam asan akatnakut aemapcemes.

¹³Bare, dor atakam e car Israel opok ow aotawmin ara. Tuhan dor atakam e Israel opok ow botaw atewosomfan. Doram e tugas akat cowok apormin ara.

¹⁴Er e dosamat icim bafesemapomas ara. Inimas dor e dosamat wun ow, ajortewcimin openow.

¹⁵Allah e Israel ow aotpemef ara, aramat ipic e wun samatin samatin takas ajowow atewemef. Aramat ipic, e Israel ow aotewetcow, er e ow aojaworsitces inim cimin akatnakutas ara!

¹⁶Ow, e bap amos daci, Allah atetamces, bare e amosbwey epcomam, Allah aras ara. Wunam, ow, os bimi Allah atetamces, bare e os oam Allah aras ara.

¹⁷E Israel ow, saitun os o anakat inim cimin ara. Car Yahudi opok ow masirin, wasan saitun os o inim cimin ara. Bare, Allah e wun saitun os o anakat ajakamef, wunam wasan saitun os o, e anakat os cawipu aatamapomef inim cimin ara. E os cawi capi, e os o anakatam, e aatamapomef os oam, e takas ajiwuwutometef. Inimas e wasan saitun os o, akatipic aemapef. Bare, car Yahudi opok ow, Allah e Israel ow asan akat atetamamaras, akac aomomamokom ara.

¹⁸Inimas ara, “Dar akat ara. E ajakamef os o, bare pwicak ara,” inim bi binip arapok. Car carma batawsicim arapok. Ca nat, os o cowok ara. Car e os bimi fak botop opok. E os bimi nat, car fak aotopman.

¹⁹Car wun ow nat, “Allah e os o anakat ajakamef, er dor e cawi bartamapomas ara,” inim aetotorcomokom openow.

²⁰E atakam, bare atakamnak ara. E Israel ow Kristus basicim opok aemfes. Inimas Allah, e ow, ajakamef inim cimin ara. Ca nat, Kristus asicimamokom ara. Inimas car inim akajiremamokom. Ca nat, eras carma batawsicim arapok. Caram pimicima.

²¹Allah, e os o anakat bweremapom opok aemef. Bare, aram car bweremapom opok aemceman.

²²Jakaperey. Allah, ow, asan akat atetamcemar ipic ara. E nat, aram jokmen aememcemar ipic ara. Ar e dosa ow, jokmen aomcema. Ar nat, asan akat car atetamceman— car Kristus amesomawarcokom ara. Ca nat, Kristus bamesomawar opok aemcokom, Allaham car asakamosomcema.

²³E Israel owam ajarewemces, wunam ar Kristus asicimces, bare Allah e ow aoartamapomcema inim cimin ara. Allah, bare fak ara. Inimas ar e ow boartamapom asan araman.

²⁴E car Yahudi opok ow, wasan saitun os o inim cimin ara. Allah, car ajakamfan, wunam car, saitun os anakat cawi aartamapomfan inim cimin ara. E nat, wasan saitun osam, saitun os anakatam, bare awcawor opok. Inimas e Allah aemefas, bare amanut ara. E Israel ow nat, saitun os anakat inim cimin ara. Inimas Allah e bap ajakamef saitun anakat os o, e acawi boartamapom, bare ton cowok ara.

²⁵Dojowow akatonokom. Dor, car, amannakut atakam jen baji akat aemamin. Car, “Namsom takas,” inim bi binip baceceremasin. E aman atakam inim ara: E wun Israel ow jen fak aememfes. E jen fak nat, batamemawaras opok. E Allah aereremtawef Israel opok ow takas, Allahpu aenawomces, bare e Israel ow jen fak boemem opok aemcemes.

²⁶Allah masirin, e Israel ow takas ajortewcema. E Alkitab atakam ara: “E Bajortew ipic Sion ewenawcema. Ar, e Yakub arurpis afasias aemosomcema.

²⁷Dor e ow dosa akokoromosomcimin. Eras e atayi aeofas jipu ara.” Allah inim aeefen.

²⁸Bare, e Israel ow, e Atakam Akat aotpemfes. Inimas ar Allah ajewew aememfes. Eras nat, car asan akat batetamas ara. Bare, ametnak ara, Allah, e ow aeremtawefen. Ar masirin, wow e ow damos ajiomama. Allaham inimas bwem, atayi e Israel ow arafasut aeefen. Inimas ara, ar e ow damos ajiomama.

²⁹Bare, Allah ay bi binip bacecerem opok aemama. Ar e ajateef ow, botpem opok aemama. Aram e atetamefas botew opok aemama.

³⁰Bap ara, e car Yahudi opok ow, Allah atakam aopowfokom. E Yahudi ow masirin, Allah atakam aopowfes. Inimas wow, Allah, ow serow car ajiomaman.

³¹E Israel ow, Allah atakam aopowfes. Inimas Allah serow car ajiomfan. Inimasan ara, ar e Israel ow serow aojiomcema.

³²Allah, ow takas aratakam bopow atetamef. Er e ow asep jofay serow bajiomas ara.

³³Allah, bare asan akatnakut, ow atetamama. Abi binip umutonnakut ara. Aram amsom takasut. E Allah aratakam basakamtiwas, bare amannakut ara. Ow eras amsom bwemem asan opok. Owam, e Allah aemamaras amsom bwemem asan opok.

³⁴E Alkitab atakam ara: “Allah abi binip amsom ow cam? E atjen Allah bow ow cam?

³⁵‘Dar pok Allah batakamtetam. Inimas aramat ipic wun pok dar amatam atetamcemarow.’ Inim bi binip ow cam?” Inim aema.

³⁶Bare, Allah pok takas akenemapomefen. E pok takas, aramat ipic ban ton awamses. Er takas aras ara. Bare, dar Allah basicimawarmoc. A atakam, atakamnak ara.