Read Central Asmat ROMA 12 Bible Online

ROMA 12 - Central Asmat bible

ROMA 12

¹Dojowow akatonokom. Allah saw akat awutnakut aomforow apormin ara. Inimas ara, dor inim janim fak car aanimamin ara. E cadam Allah mamtetamtotorey. E cadam, bare tetakay pok Allah batetamas ara. E cadam, aramat ipic kerja bwemtamam, aramat ipic jak akat bemapomtamam, e aramat ipic inim mamtetamtotorey. Inimas bwem, bare Allah basicimnakas ara.

²Car awames capinmi ow aemamesas mamkawi arapok. E nat, Allah ay binip car batetamtotorcan. Ar masirin, ay jakam atetamceman. Inimas ara, car e Allah akat apormaras camsom aemcomokom. E Allah akat apormaras, bare akatas ara. Aram e aramat ipic ji bweas ara. Aram akatnakutas ara.

³Allah asan akat dor atetamfan. Inimas ar akerja bwemtam ipic atewemfan. Dor inimas apormin ara masirin, inim atakam car takas aotawmin. Car carma basicim arapok. Ca nat, bi binip pimicim mamceceremey. Allah wun ow, jirey a bwe awut inim, bi binip atetamef. Aram wun ow jirey a bwe kanim inim, bi binip atetamef. Car masirin, e Allah car atetamtotorfan jirey bweas, awut inimnew, kanim inimnew, inim jipu bi binip pimicim mamceceremtotorey.

⁴Bare, ow kamtaram, sopam, manmokam, epcom. E aporsiporasam arop pok bwemas ara.

⁵Daram inim ara. Dar ow arke ara. Dor Kristus cowkon ajamkawimom. Inimas dar dam cowok inim cimin ara. Daram ow cowkon ara.

⁶Allah, kerja a bwemtam cescuwas, dar aporsipor, mami atetamforow. Bare, dar e cescuwas desen momom arapok. Allah, aratakam botawtam cescuwas dar atetamforownew, dar e jirey aramat ipic aemomas jipu, atakam botawtamji. Dar jirey awut aemomnew, dar atakamam fak botawtamji.

⁷Allah, dar ow pok bwemtam cescuwas atetamforownew, dar ow pok bwemtamji. Allah, ow mamememapom cescuwas dar atetamforownew, bare dar ow mamememapomji.

⁸Ar atjen ow bow cescuwas dar atetamforownew, dar atjen ow bowji. Ar pok kawey ow baseyetam cescuwas dar atetamforownew, dar e pok ban kumit baseyetamji. Ar jirmec bajirim cescuwas dar atetamforownew, daram kerja fak bwemji. Ar ow asan akat bom cescuwas dar atetamforownew, dar eras jak akat epcom bwemji.

⁹Car ow damos bajiomnew, pir bwe arapok. E jursumecas bifan mamfayomey. E akatas mamemawarey.

¹⁰Car damos mamamjiomey— ducur cowkon jiwi awcawora. “Ow, wun ow basicimces. Aram do basicim arapok.” Inim atakamnak mamotawtotorey.

¹¹Kerja faka. Car besem bemap arapok. Tuhan kerja bwemtam, tetakay ememey.

¹²Car Tuhan jirey aemokom. Inimas jak akat ememey. Ajurusemcokom, jak jirow ememey. Janim Allah mamatamanimawarey.

¹³Ow tarowat asan pwicak aemapces, e capok sey e ow mamseyetamey. E jaki ow, e cacem mamtowomiwey.

¹⁴Allah, asan akat, e car ajurusumaman ow batetam, janim mamanimey. Allah, e ow bajurusum, janim manim arapok.

¹⁵Ow jak akat aememces, caram jak akat akac ememey. Ow bwec abwecces, caram bwec akac mambwecey.

¹⁶Caram bi binip cawora. “Dor ow akat ara. E wun ow pwicak ara.” Inim bi binip arapok. Caram e pwicak ow damos mamjiomey. “Nomsom takas,” inim bi binip arapok.

¹⁷Ow, pwicakas car aemcan, pwicakas amatam e ow boem arapok. Caram ow takas e akat apormesas jipu mamemey.

¹⁸Damos ow takas mamamjiom akat aporcokomnew, bare damos ow takas aamjiomey.

¹⁹Dojowow akatonokom. Caram pwicakas amatam baji arapok. Allah e pwicakas amatam arma bajicow. E Alkitab aman, Tuhan inim atakam atawma: “E pwicakas amatam baji, bare doras ara. Bic dorma ajicimin.” Tuhan inim aema.

²⁰Ca nat, e Alkitab inim atakam ji mameey. “E cajewew ow amosto aemapces, amos mamtetamey. Bwito aemapces, bwi mamatetamey. Inimas aemcokom, e ow namke akayapcemes.” E Alkitab inim aema.

²¹E pwicakas car bakumimosom arapok. Ow, pwicakas car aemcannew, akatas amatam e ow mamjiey.