Read Central Asmat ROMA 13 Bible Online

ROMA 13 - Central Asmat bible

ROMA 13

¹Allah, awamces pemerintah aporsipor memem, atakam asakamtiwef. Ar e pemerintah takas atewemtotoref. Inimas ara, ow takas e pemerintah atakam ji baeces.

²E pemerintah atakam bopow ow, e Allah atewemefas aopowmes. Inimas bwem ow ajurusemcemes.

³Akatas bwem ow, e pemerintah omar arapok. E pwicakas bwem ow nat, omar ara. Car pemerintah omar opok bemap akat open? Bare, akatas mamemey. E pemerintah masirin, car asicimceman.

⁴E pemerintah, Allah kerja bwemtam ow ara. Ar carasan akat kerja aemtamames. E nat, pwicakas aemcokomnew, omar mameey. Ar senjata momom, desenas opok. Ar Allah kerja bwemtam ow ara. Inimas ar e Allah siksaas, e pwicakas bwem ow, aemtamcemes.

⁵Inimas ara car pemerintah atakam ji mameey. E pemerintah atakam ji bwe, car bajurusemasinas cowok arapok. Er e cajak aman atakam ji bweasam ara.

⁶Inimas ara, car e pemerintah jirmec ajirimames uang, e pemerintah atatamamokom. E pemerintah owam inim kerja fak aemames ara, ar Allah kerja aemtamames.

⁷E pemerintah jirmec ajirimamesas mamtetamey. E jirmec ajirimames uang jukpiri mamtetamey. E owam mamsicimkurumey.

⁸Ow pok car atetamfannew, wunam car pok botetam atakam e ow aamsakamfokomnew, bare e pok mamotetamkurumey. Owam damos mamjiomkurumey. E damos ajiomames ow, e Allah Jirmec ji aemes.

⁹Allah e wun jirmec ara: “Cen osom ecem. Cemen osom ecem. Tana cepes cen ancem, Bisatiw cemen ancem. Dawam, sanawam, catiwcem. Osom ecem. Kaweyas sinomcem.” Inima. A jirmec takasam, e wun jirmec takasam, bare jirmec cowokut awcawor ara. E jirmec cowok ara: “Or damos orma ajiomamem. Inim damos ajiomamem cimin, e kawey ow mamjiomey.”

¹⁰E kawey ow damos ajiomames ow, pwicakas e ow bwem opok aemcemes. E kawey ow damos ajiomames ow, e Allah Jirmec takas ji aemes.

¹¹Car eras takas mamemkurumey. Bare, car e wow aemapmom jofay camsom ara. E car isi bajit jofay, bare emeenawor. E Yesus Kristus asicimfom jofay ara, e Allah ajortewcarow jofay sotop opok inim aemamesef. Wow nat, e jofay, bare sotop ara.

¹²Jo, bare emejorowesma. E jo bapuken ara. Inimas ara, dar e sereas baemamoc. Er e Iblis bakumimosomas ara.

¹³Dar e sereas aman aemapmom ow ara. Inimas akatas baemamoc. Daram jursumec pokbwi bwem arapok. Jokmen bwi ban jayicam arapok. Cen cemen osomam arapok. Jursumecasam bwem arapok. Owenam arapok. Icimam arapok.

¹⁴E nat, e Tuhan Yesus Kristus mantem car batiwcan. E cadosa jak basinomas jipu bwem, bi binip bocecerem arapok.