Read Central Asmat ROMA 14 Bible Online

ROMA 14 - Central Asmat bible

ROMA 14

¹E Kristus basicimfak opok owam mamtewey. Caram, e ow abi binip aceceremamesas, atakam mamtaw arapok.

²Wun ow abi binip ara: “E pok jukpiri memenas ara.” Inim bi binip aceceremames. E Kristus basicimfak opok ow nat, das memen opok aemcemes.

³E das aemencemes ow, e das memen opok ow bifan arapok. Wunam, e das memen opok ow, e das aemencemes ow, dosa atakam basakamtiw arapok.

⁴Car, kawey ow akerja bwemtam ow dosa bwem, atakam basakamtiw arapok. E kerja aramat ipic, e ow aemamesas akatnew, pwicaknew, inim atakam arma asakamtiwcema. E ow nat, akatas aemcemes. Tuhan, bare fak ara. Ar e ow akatas bwem, inim fakas batetam asan araman.

⁵Wun ow abi binip ara: “Inim jofay, bare awut ara. E wun jofay, bare awut opok.” Inim bi binip aceceremcemes. Wun ow masirin: “E jofay takas bare awcawor ara.” Inim bi binip aceceremcemes. Bare, ow aporsipor, eras, atakam arma basakamtiwtotorces.

⁶Ow, “Dar e jofay, jofay awut aemapcomom,” inim aeces, ar eras, Tuhan basicim, aemcemes. E das aemencemes ow, terima kasih atakam Allah aotawcemes. Inimas ar Tuhan basicim, das aemencemes. E das memen opok owam, eras Tuhan basicim aemcemes. Aram terima kasih atakam Allah aotawcemes.

⁷Tetakay aememcom, er ow dar basicimas opok. Damir aafcom, eram ow dar basicimas opok.

⁸Tetakay aememcom, er ow Tuhan basicimas ara. Damir aafcom, eram ow Tuhan basicimas ara. Tetakay aememcomnew, damir aafcomnew, bare dar Tuhan aras ara.

⁹Kristus e tetakay aememames ow aTuhan memem, inim jak aseremomef. Aram e damir aaffes ow aTuhan memem, inim jak aseremomef. Inimas ar damir aafef, wunam aojaworsitef.

¹⁰Ca nat, e wun Yesus mamkawi ow, dosa atakam asakamtiwmokom ucim inimaram? Car e wun Yesus mamkawi ow bifan afayomamokom ucim inimaram? Dar takas Allah bipu aememcomom. Aramat ipic masirin, e dadosa, atakam asakamtiwcema.

¹¹E Alkitab aman, Tuhan atakam aotawefen: “E atawmin atakam, atakam anakatnak ara. Bare, ow takas e dobipu jine onok aneyotapcemenes. Ow takasam, atakam umuton aotawcemes: ‘Ewamec ipic Allah ara.’ ” Inim aecemes. Tuhan inim aeefen.

¹²Inimas ara, dar aporsipor, e aemawirumas, atakam umuton Allah aotawtotorcomom.

¹³Inimas ara, “Or dosa aefem,” inim atakam mamtaw baanimtiwmoc. E nat, inim atakam mamsakamtiwey: “Dar pwicakas bwem arapok. E dar akac Yesus ajamkawimes ow, dosa bwemasin.” Inim atakam mamsakamtiwey.

¹⁴Dor Tuhan Yesus ajamkawimin. Inimas, e memen pok jukpiri, dosa pok opok nomsom ara. E nat, ow, inim bi binip aceceremces: “E pok dosa pok ara,” inim aeces, wunam ar e pok aances, bare dosa aecemes.

¹⁵E pok aanmokom ara, e car akac Yesus mamkawi ow, jak pwicak aemapomamokomnew, bare car damos e ow bajiom akarimtiwmokom. E pok aanmokom ara, e Kristus damir aaftamef ow, Kristus mamkawi bakorompimas arapok.

¹⁶Car inim bi binip aceceremamokom openow: “E aemamomas bare akat ara.” Inim aemokom openow. E nat, wun ow, car eras bwem dosaas inim aranew, bare car eras boem arapok.

¹⁷Allah dar aomomamarow. Inimas dar e aanmom pokam, bwiam, bi binip awut arapok. Da nat, ow tarowat memem bi binip awut akat ara. Dar Allahcin damos mamjiomam, jak akat batowopam, inim bi binip awut akat ara. Er takas, e Roh Kudus atetamamaras ara.

¹⁸Allah e Kristus inim kerja bwemtam ow, ow akat aporcema. Asmat owam e ow asicimames.

¹⁹Bare, dar e kawey owcin damos baamjiomporawarmoc. Daram ow, Kristus mamkawi fak bemapom baamporawarmoc.

²⁰Car e pok jukpiri memen akat apormokomnew, ca nat, ow Allah mamkawi bakoromtiw arapok. E memenas takas, bare akat ara. E nat, ow, wun ow pok memen aporces, wunam dosa aemces, bare e pok memen ow, pwicakas aemames.

²¹Car das aancokomnew, anggur bwi aancokomnew, wunas aemcokomnew, wunam e aemcokomas e car akac Yesus mamkawi ow dosa aemapomcokom, bare e pok bwem arapok. Car e pok bwem opok aemcokom, bare akat ara.

²²Car, “E pok jukpiri memen dosa opok,” inim bi binip aceceremcokomnew, eras atakam Allah cowok mamotawey. Wunam, “E wun pok memen dosa ara,” inim bi binip aceceremcokomnew, erasam atakam Allah cowok mamotawey. Caram eras atakam asmat ow botaw arapok. Ow, e abi binip jipuas aemces, wunam eras bwem dosa opok aporces, bare e ow, asan akat ow ara.

²³Ow pok aances, e nat, bi binip arke aceceremces, bare ar e pok ban, akatasnew, dosaasnew, baporkurum opok aemcemes. Inimas Allah, e pok ban, dosa ara, inim atakam asakamtiwcema. Ow pok aemces, e nat e pok bwem akatasnew, pwicakasnew, baporkurum opok aemces, aram dosa aemcemes.