Read Central Asmat ROMA 15 Bible Online

ROMA 15 - Central Asmat bible

ROMA 15

¹Dar Kristus mamkawi fak ow, e mamkawi fak opok ow, mamkawikurum mamememapomji. Daram darop jak akatas jipu bwem arapok.

²E nat, dar aporsipor, e Kristus dar akac mamkawi ow, jak akat bemapomji. Dar e ow asan akatas bwemji. Eras e ow Kristus mamkawi fak bemapomas ara.

³Kristus, bare arop jak akatas bwem opok aemawiri. E nat, er e Alkitab atakam jipu ara: “E ow cemew atakam or aotfan ara, bare ar cemew atakam dor aotfenes.” Inim aema.

⁴E ametnak surat aeapomfes atakam takas, bare dar mamememtamas ara. E Alkitab atakam, dar jak jirowam, jak fakam, bemapomas ara. Inimas dar jirey Allah bwe ara.

⁵E jak jirowam, jak fakam, inim atetamcemar Allah, bi binip cawor car batetamcan— e Yesus Kristus amememtamawirias jipua.

⁶Inimas, car bi binip caworam, atakam cowkonam, Allah asicimcomokom ara. Aramat ipic, e Yesus Kristus daTuhan, arAllaham, aricipicam, ara.

⁷Bare, Kristus asan akat car atewtotorfan. Caram caramaman, ow asan akat mamtewtotorey. Eras bwem, bare Allah basicimas ara.

⁸Bare, dor atakam car aotawmin ara, Kristus e Yahudi samat ow akerja bwemtam ipic aememef. Eras aemef ara, Allah suw ipic opok baporomas ara. Er, Allah, e atayi darafasut aeef jipu bwemas ara.

⁹Erasam, e Yahudi opok ow, e Allah basicim ara— e ow Allah ow serow ajiomef aporfes ara. Bare, er e Alkitab atakam jipu ara: “Inimas ara, dor e Yahudi opok ow aman, or asicimcimin. Dor, or basicim so aecimin.” Inim aema.

¹⁰E wun atakam masirin: “Car Yahudi opok owa. Car, e Allah aeremtawef ow cowkon, jak akat ememey.” Inim aema.

¹¹Wunam: “Car Yahudi opok ow takasa. Caram Tuhan basicimey. E samat takas, aramat ipic basicimces.” Inim aema.

¹²Wunam, Yesaya atakam ara: “Isai urpis ipic aenawcema. Allah, aramat ipic, e Yahudi opok ow jirmec bajirim, atewemcema. E owam aramat ipic jirey aecemes.” E Alkitab inim aema.

¹³Allah car jirey a bwe, inim bi binip atetamcemar ipic ara. Caram aramat ipic asicimamokom. Inimas aramat ipic, jak akatam, asan akatam, car batetamcan. E Roh Kudus masirin, e jireyas kayimin car akakayimtamawarceman.

¹⁴Dojowow akatonokom. Dor car ow akatnakut aporkurumamin ara. Caram e akatas bwem camsomnakut aporkurumamin ara. Caram caramaman atjen bamow camsom aporkurumamin ara.

¹⁵Do nat, awames surat wun atakam, jak fak epcom aotawmin ara. E atakam, bi binip car bacomomtamas ara. Bare, Allah inim tugas akatipic dor atetamfan. Inimas dor atakam fak car aotawmin.

¹⁶E atetamfan tugas ara, Kristus Yesus kerja bwemtamas ara. Doram Allah atakam mamtaw, inim tugas aemamin. Dor masirin, e Allah aotawef Atakam Akat, e Yahudi opok ow aotawmin. Inimas dor e ow Allah atetamcimin. Ar ow pok Allah bacatiwtamas inim cimin atetamcimin. Allah, e ow, e pok inim cimin, akat aporcema. E Roh Kudusam, e ow, ow tarowat aemapomama.

¹⁷Kristus Yesusam dor akac aememaman. Inimas e Allah kerja aemtamawiruas, bare akat ara.

¹⁸E aemawiruas nat, Kristus dor akac aemawirumas ara. Inimas er Kristus aemawirias ara. Dor masirin, inim atakam cowok car botaw jak fak aememamin. Bare, e Yahudi opok ow, e aemawiruas aporawiris. Aram e atakam aotawawiruas, jen ajiawiris. Aram e junum bweas aemawiru aporawiris. Allah Roham, e afakas dor atetamawirin. Inimas e Yahudi opok ow, Kristus atakam ji aefes. Bare, dor Yerusalem capinmi ajaremof, wunam Ilirikum capinmi ajiwar aamorjiof, dor e Kristus Atakam Akat acacapiomkurumof.

²⁰Dor e Atakam Akat, e Kristus atakam jen baji opok ow botaw, jak aseremomawiru. Dor, cem, kawey ow ajirimapomfes fasis ton bweapom inim cimin, bwemasin.

²¹Er e Alkitab atakam jipu ara: “Ow, e aramat ipic atakam, e ow botaw opok aemawiris. E ow nat, e aramat ipic atakam jen ajicemes. E atakam jen baji opok ow, jen ajikurumcemes.” Inim aema.

²²Inimas ara, dor bar arke car bajarpor aea aeof. Do nat, ca bwemjarpor asan opok.

²³Wow nat, dor arasan kerja emeemkurumof. Doram tahun arke, e cabi bapor, jak aseremomawiru.

²⁴Inimas ara, dor Spanyol capinmi ajircey, dor pir mamincop asan akat jaki car bajit aemin. Doram car wun ow e Spanyol capinmi akac bajar akat aemin.

²⁵Do nat, Yerusalem bin ajiomamin. Doram wow e bowsec ara. Dor uang, e erasan ow tarowat batetam atowomamin.

²⁶E wun Yerusalem ow tarowat, bare pok opok ara. Er masirin, e Makedonia owam, e Akaya owam, uang, e ow sey baseyetam inim atakam arma aamsakamfes.

²⁷Bare, ar e atakam arma aamsakamfes ara. E Yahudi ow, e Kristus atakam, e Yahudi opok ow amememtamfes. Inimas e Yahudi opok ow, e Yahudi ow amatam baji akat ara. Ar e ow pok batetamces.

²⁸E dor wow tugas ara, e uang, e Yerusalem ow batetam atowomtamamin ara. Dor e aaramsimfes uang e Yerusalem ow atetamcey, dor Spanyol capinmi ajircimin. Do nat, cacapinmiam asetayapcimin.

²⁹Dor car ajarporcey ara, dor Kristus e atetamamarow asan akat, atakam atowominawcimin.

³⁰Dojowow akatonokom. Dar e Yesus Kristus daTuhan asicimamom ara. E Roh Kudusam damos mamjiom jak atetamforow. Inimas dor janim fak car aanimamin. Car Allah asan akat dor batetam, janim fak mamanimey. Doram eras car akac janim Allah aanimcimin.

³¹E Yudea capinmi Kristus atakam bopow ow, dor bajurusum arapok. Wunam, e Yerusalem tarowat ow, e atowomircimin uang, jak akat epcom batewces. Inim janim Allah mamanimey.

³²Inimas ara, Allah akat aporcow, dor jak akat epcom, car ajarporcimin. Doram jaki carasan ajitcey, dor asan akat, ses aancimin.

³³Allah, jak akat atetamcemarow. Aramat ipicam car akac baemcan. A atakam, bare atakamnak ara.