Read Central Asmat ROMA 2 Bible Online

ROMA 2 - Central Asmat bible

ROMA 2

¹Car kawey dosa atakam asakamtiwmokom owa. Car kawey ow adosa atakam asakamtiwcokom, car, “Dor dosa opok,” inim atakam bwemotawtotor asan opok. Car kawey ow adosa atakam asakamtiwcokom, e nat, inim dosaam aemcokom, bare, car carop dosa atakam asakamtiwcomokom ara.

²Allah, e inim pok bwem ow, adosa atakam asakamtiwcow, ar atakamnak aotawcema. Dar takas inimas apormom ara.

³Ca nat, e kawey ow adosa atakam asakamtiwmokomas, inim dosaam aemamokom. E cabi binip nat, “Allah, dar dosa atakam basakamtiw opok aemcemarow.” Car inim bi binip arawe?

⁴Allah ow serow ipic ara. Aram ow bajurusum sarim opok ipic ara. Aram jak jirow ipic ara. Inimas apormokom ara, car aramat ipic bifan aranew? Allah nat, car dosa bak bapayemtotor akat aema. Inimas ar serow car aemaman. Inimas camsom opoknew?

⁵Asep jofay ara, Allah, dosa jak amop aememcema. Aram, ow asalah, atakamnak asakamtiwcema. Eras aemcow jofay, aramat ipic bajurusum awutut car aemceman— car jen fak apormar ara. Caram dosa bak bapayap pwicak apormar ara.

⁶Allah, bare, ow takas aemawirisas amatam aemcema.

⁷Wun ow, akatas aemawarmes. E ow, Allah, ar ow akat atakam botaw, akat aemames. Aram, Allah ar basicim, akat aemames. Aram Allah jiwnenak batameawaras, ar batetam, akat aemames. Allah, bare, e jiwnenak batameawaras e ow atetamcema.

⁸Wun ow nat, arop pok cowok atawnimatmes. Aram e akatas aotpemosomames, wunam e pwicakas ajamkawimes. Bare, Allah jak amop emcom, e ow ajurusumcema.

⁹E fasias bwem ow ajurusemcemes. Aram dam asesak aemapcemes. E Yahudi ow eras bap aemcemes. E Yahudi opok owam eras aemcemes.

¹⁰Allah nat, e akatas bwem ow, atakam akat aotawcema. Aram e ow asicimcema. Ar jak akatam e ow atetamcema. Ar eras e Yahudi ow bap aemcema. Aram eras e Yahudi opok owam aemcema.

¹¹Allah, ow takas awcawor apormar ara.

¹²E wun ow nat, Allah Jirmec momom opok. E ow dosa aemames, wunam daniwis aemapcemes. Bare, ar e Jirmec momom opok ara. E wun ow nat, e Jirmec aomomames. E ow dosa aemames, wunam Allah, e ow dosa, e Jirmec jipu, atakam asakamtiwcema.

¹³Allah, e aJirmec jen, desen baji ow, ow tarowat atakam basakamtiw opok. E nat, ar e aJirmec ji bwe ow, ow tarowat atakam asakamtiwcema.

¹⁴E Yahudi opok ow, e Jirmec momom opok. E nat, ar e Jirmec jipuas bwem bi binip arma aceceremamesnew, ar e akatasam, e pwicakasam, bwem amsom, inim aporomames.

¹⁵E ow aemamesas e Jirmecas e ajak aman awames, inim aporomames. Wun jofay e ow bi binip ara, “E aemeyas akat ara,” inim bi binip aceceremtotormes. Wun jofay masirin, “E aemeyas salah ara,” inim bi binip aceceremtotormes. Inimas e ow jak aman atakam, “E Jirmec e ow jak aman awames,” inim aporomtotormes.

¹⁶E Allah, e asmat curuw bi binip aceceremamesas, dosa epen atakam asakamtiwcema. E inim atakam asakamtiwcow jofay, ow inimas cowok aemcemes. Bare, Allah e Kristus Yesus, inim atakam basakamtiw aeremtewef. E aotawcimin Atakam Akat, inim atakamam ara.

¹⁷Car ara nat, ucimaram? “Dar Yahudi ow ara. Dar e Jirmec ban ton ara. Allah daras ara,” inim aemokom. Bare, carma atawsicimamokom ara.

¹⁸Bare, car e Allah akat apormaras camsom. Caram e Jirmec atakam amememfokom. Inimas car e akatas bweremtew camsom ara.

¹⁹Caram inim bi binip aceceremamokom: “Dar manmok kapi ow ban fe bajimomat ow inim cimin araman. Dar e bi binip jiwic ow bi binip umuton batetam ow araman.

²⁰Dar e jen ow mamememapom ow araman. Dar e mamemem opok ow mamememapom ow araman. Dar Allah Jirmec aomomamom. Inimas dar atakam takas namsom. E atawcomom atakam, bare anakatut ara.” Inim bi binip aceceremamokom.

²¹Car kawey ow amememapomamokom. Carma nat, mamemem opok open? Caram acacapiomamokom, “Osom arapok,” inim aemokom. Ca nat, osom open?

²²Car atakam aotawmokom, “Cen osom arapok. Cemen osom arapok.” Inim aemokom. Ca nat, inimas bwem open? Car ēco bifan afayomamokom. Ca nat, e ēco cem pok osom open?

²³Car atakam aotawmokom, “Dar Allah Jirmec aomomamom araman,” inim aemokom. Ca nat, e Jirmec aopowmokom. Inimas ara, ow Allah pwicak atakam atawmes.

²⁴E Alkitab atakam ara, “E aemamokomas pwicak ara. Inimas e Yahudi opok samat, Allah pwicak atakam atawmes.” Inim aema.

²⁵Car Allah Jirmec ji aemokom aranew, e sunat aemfokomas, bare akat ara. Ca nat, e Jirmec aopowmokomnew, e sunat aemfokomas desen cowok ara.

²⁶E sunat opok ow nat, e Jirmec ji aeces, bare Allah, e ow, sunat tayir ow inim awcawor aporcema.

²⁷E car Yahudi ow, e Jirmec buku aomomamokom. Caram sunat tayir. Ca nat, e Jirmec aopowmokom. E sunat opok ow nat, e Jirmec ji aeces, ar e cadosa, atakam asakamtiwcemes.

²⁸Bare, e Yahudi anakat ow, e Yahudi cimin memem ow opok. E sunat anakat, e dam picin basakamosomas opok.

²⁹E Yahudi anakat ow nat, e jak aman Yahudi ow ara. Ar e jak aman sunat ow ara. Bare, Allah Roh, ow, Yahudi ow anakat aemapomama. E Jirmec buku nat, ow, Yahudi ow anakat bwememapom asan opok. Allah e Yahudi ow anakat asicimama. Asmat ow nat, e ow basicim opok aemames.