Read Central Asmat ROMA 4 Bible Online

ROMA 4 - Central Asmat bible

ROMA 4

¹Bare. Dar wow e darak juwas Abraham atakam aotawmom. Aramat ipic awapom Yahudi ow darak ara.

²E Abraham akatas aemef, wunam Allah, e aramat ipic, jipic tarowat ara, inim atakam asakamtiwef aranew? Inimas aemefnew, bare e Abraham arma batawsicim asan araman. E nat, ar Allah bipu arma bwemtawsicim asan opok.

³E Alkitab atakam ara, “Abraham, Allah asicimef. Inimas Allah, aramat ipic, jipic tarowat ara, inim atakam asakamtiwef.” E Alkitab inim aema.

⁴Bare, pok bwemtam ipic, e agaji atewetcema. Ow nat, e gaji mami batetam opok. Aramat ipic, bare pok aemtamcema. Inimas e ow gaji e jipic atetamcema.

⁵Allah, bare, dosa ow, ow tarowat ara, inim atakam basakamtiw ipic ara. E Allah basicim ipic nat, Allah ar jipic tarowat ara, inim atakam basakamtitam, pok bwememtam asan opok. Ar nat, Allah asicimama. Inimas Allah, aramat ipic tarowat ara, inim atakam asakamtiwma.

⁶Daudam inim inim atakam aotawefen. Aratakam ara, Allah, ow, ow tarowat ara, inim atakam asakamtiwma. E owam pok Allah bwemtam opok ow ara. Bare, e owam jak akatnakut aememames. Daud era atakam aotawefen. E Daud atakam:

⁷“Allah, wun ow asalah, binip ajiosomef. Aram e ow adosa akokoromosomef. E ow, bare asan akat ara.

⁸Tuhan, e ow adosa bajucucumirawar opok aemama. Bare, e ow asan akat ara.” Daud inim aeefen.

⁹E asan akat, e sunat epcom ow cowok aras aranew? Opok. Ar e sunat opok owam aras ara. Bare, dor atakam car emcaotawen: “Abraham, Allah asicimef. Inimas Allah, aramat ipic, jipic tarowat ara, inim atakam asakamtiwef.” Inim emcaeey.

¹⁰Allah eras atakam ucim jofay asakamtiwefnew? Abraham sunat opok aememef, wunam Allah inim atakam asakamtiwef, inimas aranew? Ow e Abraham sunat bap aemtiwfes, wunam Allah inim atakam asep asakamtiwef, inimas aranew? Bare, Abraham sunat opok aememef, wunam Allah inim atakam asakamtiwef araman.

¹¹E Abraham sunat opok ememef, Allah, aramat ipic jipic tarowat ara, inim atakam asakamtiwefen. Asep ara masirin, ow e Abraham sunat aemtiwfesen. E sunat, Allah, e Abraham jipic tarowat ara, inim atakam bap asakamtiwef baporomas ara. Bare, e Abraham, e Allah basicim ow takas, arakut aememef. Allah, e sunat epcom opok owam, ow tarowat ara, inim atakam asakamtiwma.

¹²Ametnak ara, e darakut Abraham, e Allah bap asicimefen. Asep ara masirin, ow e Abraham sunat aemtiwfes. Wowam wun ow sunat epcom. E nat, aram Allah bap asicimfes. Ar e Abraham aemefas jipu cowok aemames. Inimas Abraham e ow arakut ara.

¹³Allah atayi Abraham aeefen. “Oram, orurpisam, awames capinmi takas atowomcomokom.” Inim aeefen. Allah e Abraham e Jirmec ji bwe aporef, wunam e atayi aeef aranew? Inimas opok. E Abraham nat, e Allah asicimefen. Allah masirin, aramat ipic, jipic tarowat ara, inim atakam asakamtiwefem. Allah inimas aporef, wunam e atayi aeefen.

¹⁴E nat, e Jirmec ji bwe ow, e Allah atayi aeefas atowomces ayaw, bare e Allah basicimas desenas ara. Wunam, e Allah atayi aeefasam, bare desenas ara.

¹⁵Allah e Jirmec bopow ow ajurusumcema. E nat, e jirmec opok asan, ow, Jirmec bwemopow asan opok.

¹⁶Abraham, Allah asicimefen. Inimas Allah e atayi aeefen. Eras, Allah, e Abraham urpis takas, mami atetamcowas baporomas ara. E mami batetamas nat, e Jirmec ji bwe ow aras cowok opok. Eram e Abraham, Allah asicimef inim cimin ow aras ara. E Abraham, bare dar takas darakut ara.

¹⁷Er e Alkitab atakam jipu ara. “Dor or samat arke arakut, inim atewemfin.” Allah inim aeefen. E atayi aeef ipic, bare Allah ara. Inimas e atayi, bare faknakut ara. Abrahamam e Allah asicimefen. E Allah, bare, e damir ow baworomsumutumtam ipic ara. Aram jirmec ajirimama. “E ji bwerem opokas, bare ji baeremces.” Inim aema. E Allah, inimas aemamar ipic ara.

¹⁸E Abraham, bare akmatnakut aememefen. Inimas ar jiwi bwemfimat asan opoken. Aramat ipic nat, jirey cowok Allah aeefen. Aram Allah asicimefen. Inimas ara, ar samat arke arakut aememefen. Er e Alkitab atakam jipu ara: “Orurpis bare arkenakut aememcemes.” E Alkitab inim aema.

¹⁹E jofay ara, Abraham arumur seratus tahun ajiwarnew arawen. Aram bi binip aceceremefen. “Dor akmatnakut ara. Dor jiwi bwemfimat asan opok. E Saraam, ema cowoc ara.” Inim bi binip aceceremefen. Aramat ipic nat, Allah fak asicimefen.

²⁰Ar Allah basicim bakorompim opoken. Ar e Allah atayi aeefas, binip arke opoken. Ar Allah asicimefen. Inimas jak fak aememefen. Aram, “Allah akatnakut ara.” Inim aeefen.

²¹Aram bi binip aceceremefen. “Allah faknakut ara. Ar e atayi aefanas aemkurumceman araman.” Inim aeefen.

²²“Allaham e Abraham a basicim aporefen. Inimas ar e ipic, jipic tarowat ara, inim atakam asakamtiwefen.”

²³Jipic cowok a atakam surat aeapomef. “Ar e ipic, jipic tarowat ara, inim atakam asakamtiwef.” Inim surat aeapomefen. E atakam nat, Abraham atakam cowok opok.

²⁴Aram daratakam ara. Bare, e Yesus, daTuhan ara. Allah, e Yesus aojaworomsumutumef. Daram e Allah asicimamom. Inimas ar, dar ow tarowat ara, inim atakam asakamtiwmarow.

²⁵Dar dosa ow ara. Inimas Allah, e Yesus, damir baf aotasimemtamef. Allaham, aramat ipic, aojaworomsumutumef. Er, dar ow tarowat ara, inim atakam basakamtiwas ara.