Read Central Asmat ROMA 5 Bible Online

ROMA 5 - Central Asmat bible

ROMA 5

¹Bare, dar Allah asicimfom. Inimas ar, dar ow tarowat ara, inim atakam asakamtiwef. Daram Allahcin damos aamjiomamom. Er e daTuhan Yesus Kristus aemtamforowas ara.

²Dar e Yesus asicimfom. Inimas aramat ipic a asan akat atetamforow. Bare, daram e asan akat aomomamom. Daram Allah arakatnakutas atowomcomom. Dar inimas namsom ara. Inimas dar jak akat aememamom.

³Wunam, ajurusemamom aranew, daram jak akat aememamom. Ajurusemcom, dar jak fak akakayimcomom apormom ara.

⁴Jak fak aememcom, Allah dar akat aporcemarow. Allah dar akat aporcarow, daram e Allah jirey aecomom.

⁵Dar inim jirey aemom ara, bare dar jak pwicak memem opok. Allah dar damos awut ajiomforow apormom ara. E Allah atetamforow Roh Kudus, inimasam aporomtamforow.

⁶Dar darma bwemjorem asan opok aemapfom ara, Kristus e awapom fasi ow bajortew damir aaftamforow. Ar e Allah atakam asakamtiwef jofay damir aaftamforow.

⁷Ow, ow tarowat bajortew, damir baftam, bare opok openow. E nat, ow, ow akat bajortew, damir baftam akat aecemes openow.

⁸E nat, dosa ow aemapfom ara, Kristus dar bajortew, damir aaftamforow. Inimas ara, Allah damos awut ajiomamarow, apormom ara.

⁹Kristus ares atetamef. Er Allah dar ow tarowat ara, inim atakam basakamtiwas ara. Kristus inimas aemef, bare ar Allah ajokmenas, dar ajortewcemarow araman.

¹⁰Bap ara, dar Allah ajewew ow aememfom. E nat, atiw damir aafef. Er dar Allahcin pay bweas ara. Wow nat, dar Allah ajowow ara. Kristus bare aojaworsitef. Inimas ar ajortewcemarow araman.

¹¹Wunam, e Yesus Kristus daTuhan, dar Allahcin pay bwe ji aeremtiwe. Inimas ara, Allah, dar jak akat aemtamforow.

¹²Bare, jipic cowok, dosa, a capinmi afimimefen. Inimas ar damir aafefen. Ow takasam dosa aemfes. Inimas ow takasam damir aafcemes.

¹³Ametnak, Allah aJirmec, Musa batetam opok ara, a capinmi ow dosa bap emcaemfesen. E nat, Allah e jirmec epcom opok ow adosa bajucucumir opoken.

¹⁴E Adam aemapef jofay ara, wunam e Musa aemapef jofay ajiwar ara, e aemapfes ow takas damir aafkurumfesen. E Adam dosa awcawor bwem opok owam, bare damir aafkurumfesen. Bare, Adam e aenawcow ipic inim cimin ara.

¹⁵E jipic jamnuk nat, awcawornak opok. Allah e amami batetamas, e Adam adosa awcawor opok. E jipic cowok dosa aemefen. Inimas ow arke damir aaffes. E nat, e Allah asan akat atetamefas, bare akatnakut ara. Ar e asan akat, ow arke mami atetamef. Eram jipic cowok aemefas ara. E jipic, bare Yesus Kristus ara.

¹⁶E Allah mami batetamas, bare e Adam adosa awcawor opok. E jipic cowok dosa aemef ara, Allaham atakam asakamtiwefen. “Or dosa ara.” Inim aeefen. E nat, e ow arke dosa aemfes ara, Allah e ow, asan akat aomef. “Car dosa opok.” Inim aeef.

¹⁷Jipic cowok dosa aemefen. Inimas ow takas damir epcom araman. E nat, e wun ipic cowok aemefas, bare awutnakut ara. E ipic Yesus Kristus ara. Bare, wun ow, e Allah atetamamar asan akat, atewetmes. Aram e Allah mami batetamas aomomames. (E mami batetamas nat, Allah e ow, ow tarowat ara, inim atakam basakamtiw ara.) Bare, e ow jiwnenak aatamemawarcemes. Er Kristus aemtamefas ara.

¹⁸Bare, jipic cowok dosa aemefen. Inimas Allah, ow takas, dosa ow ara, inim atakam asakamtiwefen. Wunam, wun ipic cowok akatas aemef. Er Allah, ow takas, dosa opok ow, inim atakam basakamtiwas ara. Eram e ow jiwne batetamas ara.

¹⁹Jipic cowok atakam aopowefen. Inimas ow arke dosa ow aemapfes. Wunam, wun ipic cowok, atakam ji aeef. Inimas Allah, ow arke, ow tarowat ara, inim atakam asakamtiwcema.

²⁰Allah, e aJirmec, ow atetamef. Er, e ow aemamesas, dosa awut ara, inim baporomas ara. E dosa akawimef ara, e Allah atetamcemar asan akatam, bare awutut aokawimef.

²¹Dosa, bare fak awut ara. Inimas ow takas damir epcom ara. E Allah asan akat batetamasam, bare fak awut ara. Inimas Allah, ow tarowat, inim atakam asakamtiwcema. Aram jiwnenak atetamcemarow. Er Yesus Kristus daTuhan aemtamefas ara.