Read Central Asmat ROMA 6 Bible Online

ROMA 6 - Central Asmat bible

ROMA 6

¹Inimas ara, dar ucim atakam aotawcow? Dar dosa bwemawar— inimas e Allah asan akat atetamamaras kayimin aokakayicema aranew? Inim arapen?

²Inim arapok! Bare, dar damir emcaaffom inim cimin ara. Inimas e dosa, dar bwemomom asan opok. Dar dosa bwemawar arapok.

³Car e bwi babwimas camsom opoknew? Bare, dar Kristus Yesus cowkon aememfom. Inimas ow bwi abwimforowos. Ow bwi abwimforowos ara, dar e aramat ipic e damir aafef, inim cimin damir aaffom.

⁴Ow bwi abwimforowos, ar dar aramat ipic cowkon, se awuapomforowos inim cimin ara. Dar aramat ipic damir cowkon aaffom inim cimin ara. Er dar ay jak batowopas ara— e daricipic, e akatnakut fakas epcom, e Kristus aojaworomsumutumef inim awcawor ara.

⁵Dar Kristus cowkon damir aaffom inim cimin ara. Inimasam dar, e aramat ipic cowkon aojaworsitfom inim cimin ara.

⁶Ow e Kristus salib op acatopomfes ara, e datarey jakam damir aaffom inim cimin ara. Er, e dadosa basinom jak, bakumimosomas ara. Eram, dosa afakas, dar boomomasinas ara.

⁷Bare, ow damir aafces, dosa afakas, e ow boomom opok ara.

⁸Dar Kristus cowkon damir aaffom inim cimin aranew, daram aramat ipic cowkon aojaworsitfom inim cimin ara. Inimas daram ay jak atowopmom ara. Dar inim atakam asicimamom.

⁹Allah, e Kristus aojaworomsumutumef. E Kristus masirin, damir boaf opok aemcema. E damiras aramat ipic boomom opok aemcema. Dar inimas namsom ara.

¹⁰Aramat ipic damir aafef ara, ar dosa afakas bakumimosom damir aafef. Aram damir boaf opok ara. Inimas ara, ar wow Allah cowkon tetakay awap.

¹¹Inimas ara, car inim bi binip mamceceremey: “Dar damir aaffom inim cimin ara. Inimas dosa dar bwemoomom asan opok. E nat, dar Kristus Yesus cowkon awapom. Inimas dar e Allah akat apormaras jipu bwem, tetakay awapom.” Inim bi binip mamceceremey.

¹²Dosa afakas, e cadamir epcom dam aomomcow, car, e cajak basinomas jipu aemcomokom. Ca nat, inimas boem arapok.

¹³Caram e cadam, dosa bwem, botetam arapok. E cadam e fasias boem arapok. E nat, e cadam anakat epcom Allah mamtetamtotorey. Bare, car damir aaffokom inim cimin ara. E nat, Allah car aojaworomsumutumfan inim cimin ara. Bare, e cadam, akatas bwem, Allah mamtetamtotorey.

¹⁴Car e Musa surat aeapomef jirmec aman bemap opok. Car, e Allah atetamamar asan akat aman aemapmokom. Inimas dosa afakas car boomom arapok.

¹⁵Inimas ara, dar ucimaram? Dar e Musa surat aeapomef jirmec aman bemap opok. Dar e Allah atetamamar asan akat aman aemapmom. Inimas dar dosa bwem akat open? Dar inimas arapok.

¹⁶Car ow aratakam ji aecokomnew, car e ow akerka bwemtam ow ara. Caram dosa aratakam ji aecokomnew, car dosa akerja bwemtam ow inim cimin ara. Car masirin, damir aafcomokom. Car Allah aratakam ji aecokomnew, car aramat ipic akerja bwemtam ow ara. Aramat ipic masirin, car ow tarowat ara, inim atakam asakamtiwcema. Car inimas camsom opoknew?

¹⁷Bap ara, car dosa akerja bwemtam ow aememawirukum. Asep ara nat, car e amememfokom atakam ji aekurumfokom. Inimas dar terima kasih atakam Allah aotawmom ara.

¹⁸Allah car dosa afakas asurumtamfan. Car masirin, e akatas akerja bwemtam ow aememfokom.

¹⁹Bare, car e aman atakam jen bwemjikurum asan opok. Inimas dor asmat ow e atawcemes atakam, aotawmin. Bap ara, car e cadam, jursumecasam, fasias jukpiriam, inim bwem atetamfokom. Wow nat, car e cadam e akatas bwem, mamtetamtotorey. Er car ow tarowatnak mememas ara.

²⁰Car dosa akerja bwemtam ow aememawirukum ara, e akatas car momom opok aemawirin.

²¹E aemawirukumas nat, wow namke akayemamokom. Er, asan akatas opok. Er damiras ara.

²²Allah nat, e dosa afakas, car asurumtamfan. Aram aramat ipic akerja bwemtam ow, car atewemfan. E asan akat aemapmokomas, bare car ow tarowat aemapmokom ara. Caram jiwnenak aatamomomatawarmokom.

²³Dosa bwem ow, damir aafcemes. Allah amami batetamas nat, jiwnenak batamomomataweras ara. Er Kristus Yesus daTuhan aemtamforowas ara.