Read Central Asmat ROMA 7 Bible Online

ROMA 7 - Central Asmat bible

ROMA 7

¹Dojowow akatonokom. Car jirmec atakam camsom ow ara. Inimas e aotawcey atakam, jen ajicomokom ara. Bare, tetakay ow cowok, jirmec aman aemapmes. Ow damir aafces, ar jirmec aman boemap opok.

²Er cowoc ower ajuwutef inim cimin ara. E jirmec atakam ara, “E cowoc e armipic bajiwem, wunam wun ipic bojuwut arapok.” Inim aema. E nat, e armipic damir aafcow, wunam e cowoc ower aojuwutcow, e jirmec e cowoc dosa atakam opok.

³Inimas ara, cowoc armipic tetakay memem ara, wunam e cowoc wun ipic aojuwutcow, bare, e cowoc jursumec ara. E nat, e armipic damir affcow, e cowoc e ower bojuwut arapok, inim jirmec aman boemap opok aemcema. Ar wun ipic aojuwutcow, ar jursumec opok.

⁴Dojowow akatonokom. Caram inim ara. Car Kristus cowkon aemapmokom. E aramat ipic damir aafef. Inimas caram damir aaffokom inim cimin ara. Bare, car e Jirmec aman boemap opok. Car masirin, wow e aojaworsitef ipic aras ara. E dar e Allah akat apormaras bwemas ara.

⁵Bap ara, dar e dajak basinomas jipu cowok aemawirum. Dar e Jirmec aporawirum, inimas dosa bwem, jak asinomawirum. Bare, e aemawirumas damir bafas cowok ara.

⁶Bare, dar damir aaffom inim cimin ara. Inimas ara, Allah atakam aotawef, “Car e Musa tulis aeapomef Jirmec aman boemap opok.” Inim aeef. E Allah kerja aemtamamomas, bare, e tareyas jipu boem opok. Er e Musa surat aeapomef Jirmec jipu opok. E Allah kerja aemtamamomas nat, e Roh Kudus ay jak atetamforowas jipu ara.

⁷Da nat ucim atakam aotawcom? E Jirmec dosaas open? Opok cowok! Do e Jirmec jen baji opok ayaw, doram dosaas bapor opok aemawiru. E wun Jirmec atakam, “Pok sinomcokom,” inim aema. E Jirmec inim atakam opok ayaw, doram pok basinom bapor opok aemawiru.

⁸E Jirmec nat, pok basinomas atakam amememtamfan. Dor masirin, pok basinom kayimin aokakayimof. Bap ara nat, dor e Jirmec atakam bapor opok aemawiru, dor pok basinom kanim inim aemawiru.

⁹E Jirmec atakam ara, “Car inim inim pok emcokom,” inim aema. Dor e atakam bapor opok aemawiru, bare dor jak akat aememawiru. Do nat, e jirmec aporsipor aporof ara, dosa bwem asinomof. Dor masirin, jak pwicak aememof.

¹⁰Doram damir aafof inim cimin ara. Bare, Allah, jiwneas, asmat ow batetam akat aeefen. Inimas ara, e jirmec aporsipor atatitamefen. E nat, e jirmec, dor damir baf atakam basakamtiwas ara.

¹¹Bare, dosa asan akat aporef, e dosa tot aotfan inim cimin ara. Doram e jirmec aporsipor atakam jen ajiof ara, bare e dosa dor acatiwfan inim cimin ara. E dosa, e jirmec, dor acatiwfan inim cimin ara.

¹²Bare, e Jirmec, Allah atatitamefas ara. E jirmec aporsipor, Allah atatitamefas ara. Aram atakamnak ara. Aram akat ara.

¹³Inimas ara, e akat Jirmec dor acatiwfannew? Inimas opok! E dosa dor acatiwfan. E dosa, akatas, dor acatiwfan. E nat, eras, e dosa apwicakas, umuton baporomas ara. E jirmec aporsipor, ow dosa bwem arapok, inim atakam atawmes. Bare, ow e dosa dar acatiwforow apormes ara, aram e dosa pwicaknakut apormes.

¹⁴Bare, Jirmec, Allahas apormom ara. Do nat, asmat ipic ara. Dor dosa akerja bwemtam ipic ara.

¹⁵Dor e jak aserememofas jipu bwem opok. E nat, e bifan afayomaminas jipu aemamin. Dor inimas bwem ucimaram? Doram nomsom opok.

¹⁶Dor e dor jak baseremem opokas jipu aemey, dor e Jirmec akat aporcimin.

¹⁷Inimas dor e pwicakas bwem, dorma opok. E nat, e dojak aman aemapmar dosa, e pwicakas aemcema.

¹⁸E dojak aman aemapmaras, bare, akatas opok apormin ara. E dojak, bare asmat jak ara. Doram akatas bwem jak aserememamin. E nat, dor eras bwemem asan opok.

¹⁹Dor akatas bwem jak aserememamin. Do nat, eras bwem opok. Bare, dor e do jak baseremem opok dosa aemcimin.

²⁰Dor e do jak baseremem opokas aemcey, eras dorma bwem opok. E nat, e dojak aman ewatepec dosa, eras aemtamceman.

²¹Inimas ara, dor akatas bwem aememcey, e pwicakasam sotopnakap aememceman. Dor inimas cowok aemcimin.

²²Dor bi binip aceceremamin, “Allah Jirmec akat cowok.” Inim aemin.

²³E dobi binipas nat, aropas ara. E dodam amanasam aropas ara. “E Allah Jirmec ji bwe akat ara.” Inim bi binip kanim aceceremamin. E nat, e dodam amanas, dosa bwemawar, awutut asinomama. E dodam amanas fakut ara.

²⁴Bare, dor asan pwicaknakut ara. A dam adamirafcema. Dor ajortewcan nat, cam?

²⁵E Yesus Kristus daTuhan ajortewceman araman! Inimas ara, dor terima kasih atakam Allah aotawmin. Bare. Dor bi binip aceceremamin ara, “Allah Jirmec ji bwe akat ara,” inim aemin. E dojak aman nat, dosa ajirmec ji aemin.