Read Central Asmat ROMA 8 Bible Online

ROMA 8 - Central Asmat bible

ROMA 8

¹Bare, wow Allah e Kristus Yesus ajamkawimes ow, “Car dosa ow ara,” inim atakam botaw opokut aemama.

²E Roh Kudus, e Yesus ajamkawimom ow, aomomamarow. Aram jiwnenak atetamamarow. Aramat ipicam dor asurumtamfan. Inimas e dosaam, e damirasam, dor momom opok.

³Asmat ow, e Jirmec ji bwemekurum asan opok. Inimas e Jirmec, asmat bwemjortew asan opok. Allah nat, e atiwnak atewnemef. Atiwam dam, asmat dosa dam inim awcawor ajaworemef. Aramat ipic e dadosa bakokoromosom damir aafef ara, ar dosa akumimosomef. E dosa dar boomomasin.

⁴Allah inimas aemef ara, eras, dar e Jirmec akat ji bwekurumas ara. Bare, dar e darasmat jak basinomas jipu bwem opok aemcom, wunam e Roh Kudus arakatas jipu aemcom, dar e Jirmec ji aekurumcomom ara.

⁵E ajak basinomas jipu bwem ow, e ajak basinom bi binip aceceremames cowok ara. E nat, e Roh Kudus akat apormaras jipu bwem ow, e aramat ipic akat apormaras bi binip aceceremames cowok ara.

⁶E ajak basinomas bi binip aceceremames cowok ow, damir aafcemes. E nat, e Roh Kudus akat apormaras bi binip aceceremames cowok ow, jiwne aemes. Aram jak akat aemopmes.

⁷Bare, e ajak basinomas bi binip aceceremames cowok ow, Allah jewew ow aememames. Ar Allah Jirmec ji bwe opok. Bare ar e Jirmec ji bweme asan opok.

⁸E ajak basinomas jipu bwem ow, e Allah akat apormaras jipu bwemem asan opok.

⁹Allah Roh e cajak aman aemapmarnew, car e cajak basinomas jipu bwem opok. Caram e Roh atakam jipu aemamokom ara. E Kristus Roh epcom opok ow, bare aram Kristusas opok.

¹⁰E cadam dosa epcom ara. Inimas caram damir epcom ara. E nat, Kristus e cajak aman aemaptotormannew, e Roh, jiwnenak car atetamtotorman. Allaham car ow tarowat ara, inim atakam asakamtiwef. Inimas Kristus eras car aemtamaman.

¹¹Allah, e Yesus ajaworomsumutumef. Bare, Allah Roh e cajak aman aemapmarnew, e Kristus ajaworomsumutumef ipic, jiwne, e cadamir epcom dam, atetamcema. Eras e aRoh, e cajak aman aemapmaras ara.

¹²Dojowow akatonokom. Inimas ara, dar e dajak basinomas jipu bwem arapok.

¹³Car, e cajak basinomas jipu aemcokom, bare adamirafcomokom araman. E nat, car e cajak aman dosa acatiwcokom, bare jiwne aecomokom. E Roh, inimas bwem, akac aemceman.

¹⁴E Allah Roh atakam ji bwe ow, bare Allah atiperes ara.

¹⁵E atewetfokom Roh, car desen kerja bwemtam ow, batewem opok. Aram omar boe ow, car batewem opok. E nat, e atewetfokom Roh, Allah atiperes car atewemfan. Inimas dar atakam Allah aamtawcom, dar, “Diwi! Doricipic!” inim aetotorcomom.

¹⁶E Roham atakam e daranakat ow aotawtotorcemarow. “Or Allah ajiwi ara.” Inim aetotorcemarow.

¹⁷Allah, asan akat e arow atetamcema. Daram Allah ajiwi araman. Inimas dar, e asan akat atowopcomom. Aramat ipicam asan akat e Kristus atetamcema. Daram e asan akat e Kristus akac atowopcomom. Dar e Kristus akac ajurusemcom ara, daram aramat ipic, asan akatnakut akac atowopcomom.

¹⁸E wow ajurusemamomasam, e Allah atetamcemarow asan akatnakutam, bare awcawor opok cowok. Dor eras nomsom ara.

¹⁹Jofay ara, Allah, e atiperes asan akatnakut aemapcesas, aporomcema. E Allah akenemapomefas takas eras bapor, jak aseremomames. Aram eras manmok afemes.

²⁰Bap ara, Allah e pok takas akenemapomefen. Aramat ipic nat, e pok takas desenas bemap atakam asakamtiwefen. E pok takas desenas bemap nat, e pok atakam arma basakamtiwas opoken. Bare, Allah inim atakam asakamtiwefen. E nat, e pok takas jirey Allah aemes. Ar, Allah, e pok takas, of boemames opokas bojaworomtaw, inim jirey aemes. E pok takas e Allah atiperes e aemapces asan akatnakut awcawor bemap akat arawen.

²²Wow ajiwar nat, e Allah akenemapomef pok takas ajurusapmes. Inimas aram jen ajimes. Ar, cepes jiwi bajispetiw dam asesak inim cimin ara. Daram inimas namsom ara.

²³E jen ajimesas nat, e Allah akenemapomef pok cowok opok. E dar Roh Kudus epcom owam ara. E Roh Kudus, e Allah bap atetamforowas ara. Asep ara, ar wunasam atetamcemarow. Dar Allah e dar batewetkurumnak jofay bwenaw manmok afemom. E jofay, aramat ipic ay dam atetamcemarow. Bare, e jofay ajiwar dar e dajak aman jen ajimom ara.

²⁴Allah dar ajortewforow ara, ar ay dam dar batetam atakam aotawforow. Bare, daram eras manmok afemom. Ar e ay dam dar emcatetamforow ayaw, dar eras manmok bofe opok ara.

²⁵E nat, dar e manmok batiw opokas bwenaw, manmok afemom. Daram eras jak jirow epcom, manmok afemom.

²⁶Wunam, e Roh akac aemamarow. Dar ow kumit ara. Daram janim Allah manimnak namsom opok. E Roh nat, janim Allah aanimtamamarow. Janim Allah aanimtamamarow, e Roham jen awutnakut ajima. Dar asmat ow nat, e jen awutnakut ajimaras, atakam bwemotawkurum asan opok.

²⁷Allah, asmat ow ajak amanas takas amsom. Inimas aram e Roh abi binipam amsom. E Roh, e Allah akat apormaras jipu, janim aramat ipic aanimama. Ar, Allah, asan akat e ow tarowat batetam, inim janim aanimama.

²⁸Allah, e damos ar ajiomames ow, asan akat atetamama. E ow bajurusemnew, bajurusem opoknew, bare e takas, e ow asan akat bemapomas ara. E ow bare, e Allah, ajipuas bwem ajateef ow ara.

²⁹Ametnak ara, Allah e atiw ajamkawices ow amsom. Inimas ar e ow e atiw inim awcawor memem atakam bap asakamtiwef. Eras e atiw, betiw ipic mememas ara. Eram e atiw ajamkawices ow arke, aykun ow mememas ara.

³⁰Bare, e ow Allah e atiw inim awcawor memem atakam bap asakamtiwef. Aram e ow ajateef. Aram e ajateef ow, ow tarowat ara, inim atakam asakamtiwef. Aram e ow tarowat atakam asakamtiwef ow, asan akatnakut atetamef.

³¹Dar inimas apormom ara, dar ucim atakam aotawcom? Bare, Allah dar akac aemamarow. Inimas ow dar bwemkumimosom asan opok.

³²Allaham e atiw ban fak bakem opok cowok aemef. Ar, e atiw, dar takas damir baftam atewnemtamforow. Inimas aram e akatas takas dar atetamcemarow araman.

³³E Allah aereremtawef ow, dosa bwem ow ara, inim atakam ca otawcow? Bare, Allah, e ow, ow tarowat ara, inim atakam asakamtiwef.

³⁴E ow, dosa bwem ow ara, inim atakam ca sakamtiwcow? Bare, inim atakam ow opok cowok. Kristus Yesus, e damir aafef ipic ara. Aram damir baf cowok opok. Allah, aramat ipic aojaworomsumutumef. Wow aramat ipic Allah ban bo jamam awap. Aramat ipic janim fak Allah aanimtamamarow.

³⁵Kristus damos dar bajiom, ca karimcow? Ajurusemcomnew, asan pwicak emapcomnew, ow aemsokomcarowosnew, amostonakut ememcomnew, pakaian opok ememcomnew, ow dar acatiwcarowosnew, bare eras takas, Kristus damos dar bajiom bakarimas opok cowok.

³⁶E Alkitab atakam ara: “Dar or ajamkawimenom. Inimas join join, ow dar bacatiw atakam atawmes. Ar, ow e acatiwces domba cimin, dar aemamarowos.” E Alkitab inim aema.

³⁷E nat, Kristus damos ajiemamarow. Inimas eras takas dar bakumimosom opok cowok. Dar faknakut aememcomom.

³⁸Damir aafcomnew, tetakay ememcomnew, ow e Allah damos dar bajiomas bwemkarim asan opok. Malaikatnew, onam op pemerintah ownew, onam op kepala ownew, e Allah damos dar bajiomas bwemkarim asan opok. Ow e wow aemamarowosasnew, e asep jofay aemcemarowosasnew, e onam opasnew, awames capinmiasnew, e Allah akenemapomor wun pok aranew— bare, eras takas, e Allah damos dar bajiomas bwemkarim asan opok. Dor inimas nomsom ara. Bare, dar e Kristus Yesus daTuhan, cowkon aememamom. Inimas Allah damos ajiomamarow.