Read Central Asmat 1 KORINTUS 10 Bible Online

1 KORINTUS 10 - Central Asmat bible

1 KORINTUS 10

¹Dojowow akatonokom. Dor, car jen bemap pwicak ara. E darafasutmar e Musa ajamkawifes ara, e jak fwesak bap ajaramefen. E ow takas masirin, e jak fwesak jipu acowomosfesen. E jicupum bwiam poman aampayefen. E ow masirin, e poman asan akat camow aapirfesen.

²E ow Musa ajamkawifesen. Inimas Allah, e ow e jak fwesak amanam, e jipucum bwi amanam, bwi abwimef inim cimin arawen.

³Aram takas e Allah atewnemef amos pok cowok aanfesen.

⁴Aram takas e Allah atewnemef bwi aanfesen. E Allah atewnemef ek, e bwi, e ow atetamefen. E ekam, e ow ajamjarefen. E ek, bare Kristus arawen.

⁵E nat, Allah, e wun ow arke aemfesas, pwicak aporefen. Inimas ara, e ow, e cem opok asan damir aaffesen.

⁶E ow damir aaffesas, binip da bacomomas ara. Dar e ow e pwicakas jak asinomfesas, jak basinomasin.

⁷Daram ēco basicim arapok. E Alkitab atakam ara, “E ow amosam, bwiam, ban aneypwikapfes, wunam di badi asitfes.” Inim aema.

⁸Daram e wun ow inim cimin jursumecas bwem arapok. E ow nat, inimas aemfes, wunam bar cowok, ow dua puluh tiga ribu ajiwar aaffesen.

⁹Daram e wun ow inim cimin, Tuhan bwempor arapok. E ow inimas aemfes, wunam amer sis damir aaffesen.

¹⁰E owam Musa asan pwicak atakam atawfesen. Inimas e Bacatiw Malaikat e ow acajimirefen. Ca nat, e atawfes atakam cimin bwem arapok.

¹¹Bare, Allah eras e ow aomef ara, eram jen da boporjias ara. Owam e atakam tulis aeapomfes ara, ar dar binip bacomomtamas ara. Dar, e ow aemfes pwicakas mamemasin. Bare, dar a asepnak jofay bemap ow awapom ara.

¹²Wun ow abi binip ara, “Dor Kristus mamkawi fak awamcey ara,” inim aemes. E ow nat, pimicim baemces. Aram bakorneyasin.

¹³Iblis car dosa bwem acajijimtawman. Eras nat, carop opok. Asmat ow takas inim cowok ara. E nat, Allah e atayi aeefas, aemkurumcema. Aramat ipic, e Iblis, car dosa bwem bacajijimtaw awutnakut batetam opok aemcema. Car e dosa bwemasin. Iblis car dosa bwem acajijimtawcan, bare Allah e bacajijimtawas botpem fakas atetamceman. Ar, car e dosa bofe asan atetamceman.

¹⁴Dojowow akatonokom. Inimas ara, car e ēco basicimas botpemkurumey.

¹⁵Car bi binip epcom ow awapokom ara. Inimas ara, car e atawmin atakam ji bwe epen atakam mamsakamtiwey.

¹⁶Perjamuan aancom ara, dar e bwi “terima kasih” atakam Allah aotawcomom. Bare, Kristus ares asan akat aemapomforow. Dar masirin, e bwi akac aancom, dar e asan akat akac aemapmom aporomtamcomom. Kristus adamam asan akat aemapomforow. Daram e Perjamuan amos akokomtawcom, wunam e amos akac aancom, dar e asan akat akac aemopmom aporomtamcomom.

¹⁷E amos bokor, bare cowok ara. E amos bokor cowok aancomon ow nat, arke ara. Inimas dar takas Kristus adam cowok inim cimin awapom ara.

¹⁸E Israel ow aemcemesas bi binip mamceceremey. Ow, pok, e pok Allah jis bafamtam jowse ton afamtamcemes. E pok aances owam, “Pok Allah e jowse jis bafamtam akat,” inim cimin aecemes.

¹⁹E atawmin atakam nat, ucimasam? Bare, ow das ēco atetamcemes. Er e ēco basicimas ara. E das nat, anakatas open? E ēcoām anakatas open?

²⁰Bare, er anakatas opok. E atawmin atakam nat, e Israel opok ow, e basicim das atetamces, ar dat asicimcemes. Ar Allah basicim opok. Bare, dor car dat mamkawi pwicak ara.

²¹Car Tuhan bwiam, dat bwiam, jamnuk takas bweman asan opok. Car Tuhan amosam, dat amosam, jamnuk takas bweman asan opok.

²²Dar Tuhan icim bafesemapom arapen? Dar faknew? Tuhan kumitnew? Inim arapen?

²³Dar e pokin pokin takas bwem, bare karow opok. E nat, e wun pok bwem, asan akatas opok. Dar e pokin pokin takas bwem karow opok. E nat, e wun pok bwem, ow Yesus mamkawi fak bemapomas opok.

²⁴Ow arop asan akatas cowok bwem arapok. E nat, ar kawey ow asan akat baomces.

²⁵Car, e pok baytin asan, e uang ajitincemes pok jukpiri memen, bare akat ara. Caram, “Dor e amos pok aemencey, e dojak aman atakam, ‘E aemamemas salah ara,’ inim aeceman openow,” inim bi binip bacecerem arapok.

²⁶E capinmiam, e pokin pokin takasam, bare Tuhan aras ara.

²⁷Kristus basicim opok ow, car amos akac a memen janim aanimcan, ar e cabipu atewapomtamcan amos pok mamemeney. Caram, “Dor e amos pok aemencey, e dojak aman atakam, ‘E aemamemas salah ara,’ inim aeceman openow,” inim bi binip bacecerem arapok.

²⁸E nat, ow atakam car aotawcan, “Ow, a pok bare ēco basicim emcatetameres,” inim aecannew, bare e pok memen arapok. Er, e atakam car aotawcan ow, salah bwemasinas. Wunam, e ow jak aman atakam, “Or salah aemamem,” inim atakam e ow botawasin,

²⁹E atawmin jak aman atakam, bare kawey ow ajak aman atakam ara. Er e cajak aman atakam opok. Wun ow nat, inim atakam aotawcemes openow: “Dor kawey ow, ajak aman atakam jipu bwem nat, ucimaram?

³⁰Dor e akac aemencey amos, terima kasih atakam Allah aotawcey ara, ow dor e amos memen, atakam pwicak dor botaw ucimaram?” Inim aecemes openow.

³¹Ca nat, amosam, bwiam, aancokomnew, wun pok aemcokomnew, bare eras takas Allah basicimkurumas jipu mamemey.

³²E Yahudi ownew, e Yahudi opok ownew, e Yesus basicim barewsi ownew, e aemcokomas aporces, ar dosa bwemasin.

³³Doram ara. Dor e aemciminas takas, e ow takas jak akat aemtamcimin. E aemciminas, bare doropas opok. Er e ow takas aras ara. Er e ow bajortewas ara.