Read Central Asmat 1 KORINTUS 11 Bible Online

1 KORINTUS 11 - Central Asmat bible

1 KORINTUS 11

¹Dor Kristus aemefas jipu acowoymin. Caram e aemaminas jipu mamcowoyey.

²Bare, caram dobinip manim opok aemamokom ara. Caram e amememtamfin atakam bakorompim opok aemamokom ara. Inimas ara, dor car asicimamin.

³Do nat, car inimas baporkurum akat aemin: owerow takas, Kristus ban ton ara. Wunam, acepes amiwis ban ton ara. Wunam, Kristus Allah ban ton ara.

⁴E owerow, kus apwirimapomces, wunam janim Allah aanimcesnew, Allah atakam aotawcesnew, ar e Kristus bifan afayomcemes inim cimin ara.

⁵Cepes nat, kus fi janim Allah aanimcesnew, Allah atakam aotawcesnew, ar e amiwis bifan afayomames inim cimin ara. Bare, cepes e amiwis ban ton ara. E kus fi cepes e kus junuk cepes inim cimin ara.

⁶Cepes e akus bapwirimapom pwicak aporces, e afin baakosomces. Bare, cepes, kus fin jipinnew, kus junuknew, namkeas ara. Inimas e akus batakampwirimapomtotorces.

⁷Ow owerow bi apormes, ar Allah bi inim jipir apormes. Aram Allah arakatnakutas inim jipir apormes. Inimas owerow kus bapwirimapomtotor arapok. E nat, ow cepes bi apormes, ar amiwis arakatas inim jipir apormes.

⁸Allah, e bapnak asmat ipic, cowoc ajewem emake bakenemapom opok. Ar cowoc, e ipic ajewem emake akenemapomefen.

⁹Wunam, Allah, e ipic, e cowoc bakenemapomtam opok. Ar e cowoc e ipic akenemapomtamefen.

¹⁰Inimas ara, e cepes e akus bapwirimapomtotorces. Eras e cepes e amiwis ban ton, inim baporomtamas ara. E malaikat takasam eras aporcemes.

¹¹E nat, Tuhan mamkawi ow ara, bare cepes arop bwememem asan opok. Owerowam arop bwememem asan opok.

¹²Allah, cowoc, e jipic ajewem emake akenemapomefen. Cepesam ower jiwi ajispetiwcemes. Allah nat, eras takas akenemapomefen.

¹³E nat, cepes, kus fi, janim Allah manim akat open? Bare, bi binip carma ceceremey.

¹⁴Owerow kus fin jirow epcom, bare namkeas ara. Cepes nat, kus fin jirow epcom, bare arakatas ara. Ow takas inimas amsom. Bare, Allah e fin jirow, e kus bapwirimapomas, cepes atetamama.

¹⁶Wun ow nat, eras, bwe atakam mamtaw akat aporces aranew, dor inim atakam atawcimin: “Dar inimas cowok aemcomom. E asanin asanin Allah basicim barewsi owam inimas cowok aemcemes.” Inim aecimin.

¹⁷A atakam aotawmin ara, dor car basicim opok. E ajarewsiapmokom ara, bare akatas opok. Er pwicakas ara.

¹⁸A bap atakam aotawmin ara: Atakam jen ajiof, car Yesus basicim ajarewsiapmokom, car atakam cawor opok aemamokom. Dobi binip ara, e atakam, atakamnak ara openow.

¹⁹Bare, caramaman atakam cawor opok araman. Inimas e Allah akat apormar ow, umuton aememcemes.

²⁰E ajarewsiapcomokom ara, car Tuhan perjamuan memen barewsiap opok.

²¹Car aporsipor carop amos aemencomokom. Inimas ara, car wun ow amosto aemapcomokom. Wun, nat, jokmen bwi jayic aemapcomokom.

²²Car inimas bwem ucimaram? Car aporsipor, cem opok arawe? Caram e cacem aman amosam, bwiam, banji! Car e Allah basicim barewsiap ow bifan afayomamokomnew? Car e pok opok ow namke bakamapom akatnew? Dor ucim atakam car aotawcen? Dor car basicim arapen? Bare, car inimas bwem, dor car basicim opok ara.

²³E aotawfin atakam, bare Tuhan aotawfan. E atakam ara: Jipic cowok, e Tuhan Yesus, e jokmen ow aotasimemtamefen. Bap ara, e iram cowok, e Tuhan amos atewefen.

²⁴Aram terima kasih atakam Allah aotawefen. Terima kasih atakam aotawef masirin, e amos akokomefen. Atakamam aotawefen. “A dodam das ara. A dodam das car juw buwemas ara. Caram inimas mamemawarey. Eras car do bi binip bacomopas ara.” Inim aeefen.

²⁵Amos aanfes masirin, aramat ipic gelas anggur bwi epcom inim cimin atewefen. Atakamam aotawefen. “A bwi, e Allah ay atayi aeefas ara. E dores e Allah ay atayi aeefas, atayinak aporomtamcema. Car e bwi aancokom, dor bi binip mamcomopcan.” Inim aeefen.

²⁶Bare, car e amosam, e bwiam, aancokom, car e Tuhan damiras atakam aotawcomokom— e aofasineycow jofay ajiwar ara.

²⁷Inimas ara, ow e amosam, bwiam, mami aancesnew, ar Tuhan e damam, e esam, mami damam, esam, inim cimin aemcemes. Bare, ar dosa aemcemes.

²⁸Ow aporsipor, e ajak aman, arma batakamoworporkurumtotorces. Wunam e amosam, bwiam, asep baances.

²⁹Ow, e amosam, bwiam, mami aancesnew, wunam ar e Tuhan dam, bi binip bacomop opok aemcesnew, bare Tuhan, e ow e dosa, atakam asakamtiwcema.

³⁰Inimas ara, car wun ow arke dam ewaam, dam pwicakam, awapokam ara. Wun arke masirin, damir emeaffes.

³¹Dar ara nat, e dajak aman aoworporkurumcom, Tuhan dar boworpor opok aemcemarow.

³²Tuhan nat, e dadosa aoworporcow, aram siksa aemcemarow. Eras e aramat ipic dar amamkawi opok ow cowkon siksa atakam basakamtiwasinas ara.

³³Dojowow akatonokom. Inimas ara, Tuhan amos memen ajarewsiapcokom, amos akac mamemeney.

³⁴Ow amosto aememces, amos e arop cem aman batakamemences. Tuhan car dosa atakam basakamtiwasin. Aenawcey ara, dor e wun atakam car aotawcimin.