Read Central Asmat 1 KORINTUS 12 Bible Online

1 KORINTUS 12 - Central Asmat bible

1 KORINTUS 12

¹Bare, dor, e Roh Kudus mami atetamcemaras, atakam ca botaw aemin. Dor car jen bemap pwicak ara.

²Caram Allah camsom opok aemapawirukum ara, ow car e atakam epcom opok ēco basicim, acajijimtawawirin. Caram eras bi binip opok aemapawirukum. Inimas camsom ara.

³Inimas ara, dor car inim atakam jen bajikurum akat ara: E Allah Roh mamkawi ow, “Yesus asan pwicak baemapcow,” inim atakam bwemotaw asan opok. Wunam e Allah Roh mamkawi opok ow, “Yesus, bare Tuhan ara,” inim atakam bwemotaw asan opok.

⁴E Roh atetamcemaras, bare cīncīnās ara. E nat, e eras atatamcemar Roh, bare cowokut ara.

⁵E kerja aemtamcomomasam, bare cīncīnās ara. E nat, e kerja aemtamcomom Tuhan, bare cowokut ara.

⁶E kerja bwemtam cescuwasam, bare cīncīnās ara. Allaham e cescuwas takas e ow takas atatamcema. E Allah, bare cowokut ara.

⁷E Roh, e atatamcemaras, ow aporsipor atatamtotorcema. Er dar takas asan akat bomas ara.

⁸E Roh, bi binip umuton atakam wun ow atatamtotorcema. E Roh cowokam, e aman atakam amsomas, wun ow atatamtotorcema.

⁹E Roh cowokam, Kristus basicim fak bi binip, wun ow atatamtotorcema. E Roh cowokam, ow dam baworomtam fakas, wun ow atatamtotorcema.

¹⁰Aram junum bweas bwem fakas, wun ow atatamtotorcema. Aram Allah atakam botaw cescuwas, wun ow atatamtotorcema. Aram ow e atawmes atakam, dat atakam jipunew, Roh Kudus atakam jipunew, inim baporkurumas, wun ow atatamtotorcema. Aram e atatamcemar kawey atakam jukpiri bataw, inim cescuwas wun ow atatamtotorcema. Aram e atakam juw buwumtew, inim cescuwas wun ow atatamtotorcema.

¹¹E inim aemcemaras takas, bare Roh cowokut ara. Ar e akat aporcowas, e ow aporsipor atatamtotorcema.

¹²Asmat ipic dam anakat, bare cowokut ara. E adam anakat pomanas nat, arke ara. E adam anakat pomanas arke nat, e dam anakat cowokutas ara. Bare, Kristusam inim cimin ara.

¹³Inimas ara, e Roh cowok, dar takas dam cowok ajaworomtamforow— ar e dajak aman afiwaptotorforow ara. Er e Yahudi owam, e Yunani owam, e mami kerja bwemtam owam, e arop kerja aemames owam, bare e takas dam cowok ajaworomtamforow. Daram takas e Roh cowok atewettotorfom.

¹⁴Asmat ipicam adam anakat pomanas cowok opok. Adam anakat pomanas, bare arke ara.

¹⁵E bwey atakam aotawcow, “Dor ban opok. Inimas dor e ipic aras opok,” inim aecownew, e bwey e ipic aras opok open?

¹⁶E jenmakam atakam aotawcow, “Dor manmok opok. Inimas dor e ipic aras opok ara,” inim aecownew, e jenmak e ipic aras opok open?

¹⁷Asmat ipic e adam takas manmok cowoknew, ar jen baji ucim inimaram? E adam takas jenmak cowoknew, ar bi basim ucim inimaram?

¹⁸E nat, Allah asmat ipic adam anakat pomanas takas e adam atewapomtotorefen. Er e akat aporefas jipu arawen.

¹⁹Asmat ipic, e adam takas bwey cowok ayaw, e adam anakat epcom bare opok ara.

²⁰E adam anakat pomanas, bare arke ara. E dam anakat nat, cowokut ara.

²¹E manmokam atakam aotawcow, “Ban. Or desenas apormin ara.” Ar inim atakam bwemotaw asan opok. Wunam, e kus atakam aotawcow, “Bwey. Or desenas apormin ara.” Aram inim atakam bwemotaw asan opok.

²²E wun dam anakat pomanas, bare kumit ara. E kumitas nat, pentingnakutas ara.

²³Dar asmat ow bi binip ara, “E wun dam anakat pomanas bare mamias ara.” Inim bi binip aceceremcomom. Da nat, e mamias basicim awut ara. E dawun dam anakat pomanas, bare manmok batiwas akat opok. Da nat, eras pimicim cowok aemamom.

²⁴E wun dadam anakat pomanas, bare manmok batiwas akat ara. Da nat, e akatas, inim pimicim bwem opok. Allah e dadam akenemapomef ara, ar e dadam mamias, basicimas akenemapomef.

²⁵Inimas ara, e dadam anakat pomanas aporsipor bifan mamfay opok aemames. E nat, e dadam anakat pomanas takas damos aamjiomames inim cimin ara.

²⁶E dadam anakat pomanas cowok ajurusemcow, e dadam anakat pomanas takas akac ajurusemcemes. Wunam, ow, e dadam anakat pomanas cowok asicimces, e dadam anakat pomanas takas jak akat aemapcemes inim cimin ara.

²⁷Bare, caram takas Kristus adam ara. Car aporsipor, Kristus adam anakat pomanas ara.

²⁸Allah, e Yesus basicim barewsi ow aman, inim ow atewemef: Bap ara, e atakam botaw batewosom ow ara. Wunam e Allah atakam botaw ow ara. Wunam e atakam mamememtam ow ara. Wunam ar e junum bweas bwem owam, e Roh Kudus ow dam baworomtam fakas atetamamar owam, e ow asan akat batetam owam, e atjen bow owam, e Roh atetamcemar kawey atakam jukpiri bataw owam, inim ow atewemef.

²⁹Ow takas atakam botaw batewosom ow memem opok. Ow takas Allah atakam botaw ow memem opok. Ow takas atakam mamememtam ow memem opok. Ow takas junum bweas bwem ow memem opok.

³⁰E Roh, ow takas dam ow baworomtam fakas batetam opok. Ow takas e Roh atatamcemar kawey atakam jukpiri bataw ow memem opok. Ow takas e Roh atetamcemar kawey atakam jukpiri juw buwumtew ow memem opok.

³¹E Roh atatamcemaras, wun penting awutut ara. Wun masirin penting awut opok. Bare car e penting awututas inim jak mamseremomey. Do nat, wun akatnakutas, atakam car aotawcimin.