Read Central Asmat 1 KORINTUS 14 Bible Online

1 KORINTUS 14 - Central Asmat bible

1 KORINTUS 14

¹Bare, ow damos mamjiomkurumey. E nat, e Roh atetamcemaras jak mamseremomey. E Allah atakam botaw cescuwas, bare jak baseremom awut mamemey.

²E Roh atatamcemar kawey atakam jukpiri botaw ow, atakam asmat ow botaw opok. Ar atakam Allah aotawcemes. Owam aratakam jen baji opok aemcemes. Ar e Roh atatamcemar amannakut atakam atawcemes.

³E Allah atakam botaw ow nat, atakam asmat ow aotawcemes. E atakam, ow, Tuhan mamkawi fak bemapomas ara. Aram atjen bowas ara. Aram jak akat bemapomas ara.

⁴E Roh atatamcemar kawey atakam jukpiri bataw ow, Tuhan mamkawi fak arop aemapomcemes ara. E Allah atakam botaw ow nat, e Yesus basicim barewsi ow, aramat ipic mamkawi fak aemapomcemes ara.

⁵Bare, dor car takas e Roh atatamcemar kawey atakam jukpiri bataw akat aemin. E nat, dor, car takas, Allah atakam botaw akatnak aemin. E Roh atatamcemar kawey atakam jukpiri juw buwumtew ow carasan memem opoknew, bare e atakam botaw penting kanim pwiciri ara. E Allah atakam botaw ow masirin, penting awut pwiciri ara. Wun ow nat, e Roh atatamcemar kawey atakam jukpiri juw auwuemtewces, ar e Yesus basicim barewsi ow e Yesus mamkawi fak aemapomcemes.

⁶Dojowow akatonokom. Dor car ajinawomcin, wunam e Roh atatamcemar kawey atakam jukpiri atawceynew, dor asan akat car bom ucimaram? Do nat, Allah acuruw atakam car aotawcinnew, dor e nomsomas aman atakam car aotawcinnew, dor Allah e wun atakam car aotawcinnew, dor atakam car amememtamcinnew, bare dor asan akat car aomcimin.

⁷E jiwne epcom opok pokam inim ara. E suling atow bwe owam, e gitar atow bwe owam, so umuton opok atow aeces, ow e so jen bwemji asan opok.

⁸Wunam, e fwi bam ipic, fwi umuton opok aamcow, ow jewew bamo bwemtawkenemem asan opok.

⁹Inimasam ara, car atakam umuton opok aotawcokom, ow caratakam jen bwemji asan opok.

¹⁰A capinmi bare atakam arkenakut awamses. Ow e atakam takas jen ajicemes.

¹¹Ow atakam aotawces, wunam dor e atakam jen baji opok aemcey, dor jewey samat ipic inim cimin aememcimin. E owam jewey samat ow inim cimin aememcemes.

¹²Caram ara. Car e Roh atatamcemaras batewet, jak baseremom awutut aemamokom. Bare, ca Yesus basicim barewsiap ow, e aramat ipic mamkawi fak bemapomas batewetkurum, inim jak mamseremomey.

¹³Inimas ara, e Roh atatamcemar kawey atakam jukpiri bataw ow, janim Allah baanimces. Ar Allah, e kawey atakam jukpiri juw buwumtew bi binip a batetam, janim baanimtotorces.

¹⁴Dor e Roh atatamcemar kawey atakam jukpiri atawcey, wunam janim Allah aanimcey, e dojak amanas janim Allah aanimcimin. E dobi binip nat, desen ara.

¹⁵Inimas dor ucimas emcey? Bare, dor janim Allah aanimcey, dor e dojak amanas janim Allah manim, akat aecimin. Doram bi binip epcom janim Allah manim, akat aecimin. Dor Allah basicim so aecey, dor e dojak amanas so bwe, akat aecimin. Doram bi binip epcom so bwe, akat aecimin.

¹⁶Car terima kasih atakam Allah aotawcokom, e nat, e cajak amanas cowok e terima kasih atakam aotawtotorces, e jen mami ow, “A atakam, bare atakamnak ara,” inim botaw, ucimaram? Ar caratakam jen baji opok aemcemes.

¹⁷Caram terima kasih atakam akat cowok aotawcokomnew, e atakam, e wun ow Kristus mamkawi fak bemapom opokut aemcema.

¹⁸Car e Roh atatamcemar kawey atakam jukpiri bataw, bare kanim inim. Do nat, awut inim. Inimas ara, dor terima kasih atakam Allah aotawmin ara.

¹⁹Ow Yesus basicim ajarewsiapces, dor e ow, e jen ajicemes pok juwas limanakap ajiwar, atakam bi binip epcom e ow botaw, bare akat inim. Er e ow mamememtamas ara. Do nat, e Roh atatamcemar kawey atakam jukpiri, e ow bipu bataw, bare pwicak inim. Aram e atakam jen baji opokut aemcemes.

²⁰Dojowow akatonokom. Car bi binip aceceremcokom, jiwi kanim bi binip aceceremames inim cimin arapok. E nat, car pwicakas bwem, bare jiwi kanim pwicakas bwem amsom opok inim cimin mamemey. Bi binip aceceremcokom nat, ow ducur inim cimin bi binip mamceceremey.

²¹E Alkitab inim atakam ara: “Dor kawey samat ow, jirmec ajirimcimin. E ow masirin, doratakam awapes ow aotawcemes. Inimas jewey ewen picin, atakam a ow aotawcemes. E nat, e dorow, e doratakam ji bwe opok aemcemes.” Tuhan inim aeefen.

²²E Roh atatamcemar kawey atakam jukpiri, e Kristus basicim ow abaporomtamas opok. E nat, er e Kristus basicim opok ow, abaporomtamas ara. E Allah atakam botaw nat, e Kristus basicim opok ow abaporomtamas opok. Er e Kristus basicim ow abaporomtamas ara.

²³E Yesus basicim ow takas ajarewsiapces, wunam e takas e Roh atatamcemar kawey atakam jukpiri atawtotorces, er masirin mami ownew, Kristus basicim opok ownew, ajisces, ar car jayic ow, inim atakam aotawcemes.

²⁴E nat, ow takas Allah atakam aotawces, wunam Kristus basicim opok ipicnew, mami ipicnew, ajiscow, ar e atakam jen ajicema. Ar masirin, e ajak aman dosa aporcema. Aram e asalah atakam asakamtiwcema.

²⁵E ajak aman curuwasam, umuton aasamtiwcema. Ar masirin, bi fop aneyjiapcema. Aram, “Allah car akac awomcan,” inim aecema.

²⁶Dojowow akatonokom. E atawmin atakam ucimaram? Ajarewsiapcokom, car aporsipor so bwetamnew, atakam mamememtamnew, Allah acuruw atakam botawnew, e Roh atatamcemar kawey atakam jukpiri batawnew, e atakam juw buwumtewnew, inim aemcomokom. E nat, e aemcokomas takas, ow, Kristus mamkawi fak mamemapomey.

²⁷Ow, e Roh atatamcemar kawey atakam jukpiri bataw aememces, aram ow arke arapok. Ow jamnuknew, mamincopnew, batawces. Aram atakam juw uwema juw uwema, inim baeces. Jipic cowok masirin, e atakam juw bauwumtewcow.

²⁸Erasan atakam juw buwumtew ow opok aporces, e ow, e Kristus basicim barewsiap asan, jokon bajiapces. Arma atakam baotawces. Atakamam Allah baptawces.

²⁹Ow Allah atakam aotawces, ow jamnuknew, mamincopnew, baotawces. E wun ow takas masirin, e atakam, bi binip baceceremkurumces.

³⁰Allah, aratakam binip, e wun erasan aemapcow atetamcow, e bap ipic atakam bakaricow.

³¹Car takas Allah atakam botaw juw uwema, juw uwema baji asan araman. Er ow takas atakam mamememas ara. Eram ow takas jak fak bemapomas ara.

³²E Allah atakam botaw cescuwas epcom ow, e atakam bakari fakas epcom.

³³Allah, bacucumas pwicak aemama. E nat, ar ow asan akat bemap akat aema.

³⁴Cepes, e Yesus basicim barewsiap asan, jokon bajiapces. Aram atakam botaw arapok. Bare, e asanin asanin, Yesus basicim barewsiap ow tarowat inimas aemcemes. E cepes, owerow atakam ji baeces. Eras e Allah atetamef Jirmec jipu ara.

³⁵Cepes jonow batowpor akat aeces, ar e amiwis, e arop cem aman, jonow batowporces. Cepes, e Yesus basicim barewsiap asan atakam botaw, bare namkeas ara.

³⁶Ca nat, a atakam pwicaknew? Car e Allah atakam bap aotawfokomnew? Car e atakam jen carop ajifokomnew?

³⁷Wun ow abi binip ara, “Dor Allah atakam botaw ipic ara.” Wun ow masirin, “Dor, e Roh atatamcemaras atewetof.” Inim bi binip aceceremames. E nat, e car aeapomtamamin surat, bare Tuhan jirmec ara. E ow inimas baporkurumces.

³⁸Ow a atakam basicim opok aeces, caram e ow basicim arapok.

³⁹Dojowow akatonokom. Inimas ara, e Allah atakam botaw cescuwas batewet, jak mamseremomey. E Roh atatamcemar kawey atakam jukpiri botawam, acuw bat arapok.

⁴⁰E aemamokomas takas akat mamemey. Aram takas mamfafaykurumey.