Read Central Asmat 1 KORINTUS 16 Bible Online

1 KORINTUS 16 - Central Asmat bible

1 KORINTUS 16

¹Dor uang e ow tarowat baramsimapomtam, jirmec e Galatia capinmi Yesus basicim barewsiap ow emcajirimof. Bare, caram uang e ow tarowat mamaramsimapomtamey.

²E Hari Mingguin Hari Mingguin, car aporsipor, pok mameremtitamey. Pok awut inim atewfokom ow, pok awut inim mameremtitamey. Pok kanim inim atewfokom ow, pok kanim inim mameremtitamey. E uang masirin, sosey mametamey. Ajinawcey ara masirin, car uang boaramsimapom arapok.

³Caram ow akat mameremtewey. Wunam ajinawcey ara, dor, e ow e uangam, e uang atakam suratam, Yerusalem batowmir, inim jirmec ajirimcimin.

⁴E nat, doram Yerusalem bajir akat aporcey, e owam dor akac bajircenes.

⁵Doram Makedonia capinmi akorfiscimin. Dor e Makedonia capinmi akorfiscey, doram car ajinawomcimin.

⁶Doram car akac aemapcomom openow. Dor e jufu bwi erasan aemapcimin openow. Inimas ara, car dor e wun asan ajisoscey bowsec memenas batetam asan akat ara.

⁷Dor e cacapinmi jaki jipinnakap pwicak ara. Do nat, carasan tarey inim bemap akat aemin— Tuhan akat aporcow ara.

⁸E nat, Hari Pentakosta ajiwar, dor kota Efesus inim bemap.

⁹Arasan ara, dor Tuhan kerja akat bwemtam, bare asan akatnakut ara. E nat, atakam bopow ow arke awamces.

¹⁰Dor Tuhan kerja aemtamamin. E Timotiusam inimas cowok aemama. Inimas ara, aramat ipic car ajinawomcan, asan akat aramat ipic mamomey.

¹¹Owam e aramat ipic bifan arapok. Aram banajuw ememcow, caram e bowsec memenas ar mamtetamey. Inimas ar asan akat dor aojinawomceman. Bare, doram, e dajowowam, aramat ipic manmok afemom.

¹²Doram Apolos atakam atawmin. Dor e aramat ipic, e wun dajowow akac car bajinawom, janim fak aanima aeof. E aramat ipic nat, wow bajinaw pwicak awuten. E nat, asan akat aporcow, ar car ajinawomceman.

¹³Bare. Manmok mamtiwemawarey. E Kristus basicim, inim akajiremawarey. Jak fak mamememawarey. Ow fak mamememawarey.

¹⁴E aemcokomas takas, bare, ow damos mamjiomkurumawarey.

¹⁵Dojowow akatonokom. Car e Stefanusam, acem owam, camsom ara. Ar e Akaya capinmi bapnak Kristus ajamkawifes ow ara. Aram asan akat e tarowat ow aomawarmes.

¹⁶Doram atjen car aowmin ara. Car inim owam, e akerja fak akac bwem owam, aratakam ji mameey.

¹⁷Dor tarey cabi bapor opok ara. E nat, Stefanusam, Fortunatusam, Akaikusam, ajinawomfenes. Ar car juw auwuemtotorfan inim cimin ara. Inimas dor jak akat ara.

¹⁸Ar dor jak akat aemfenes. Aram car jak akat aemfan. Car inim ow mamsicimawarey.

¹⁹E Asia capinmi asanin asanin Yesus basicim barewsi ow, selamat atakam car aotawman. E Akwilain Priskaam, e acem Yesus basicim barewsi owam, Kristus ajamkawimes. Aram car akac Kristus ajamkawimokom. Inimas aram selamat atakam anakat car aotawmes.

²⁰E dajowow takas selamat atakam car aotawmes. Caram bi jamnuk aemamtewcokom, becer akat mamjipiromey.

²¹Bare, dor Paulus ara. Doram selamat atakam car aotawmin. Dor a selamat, tulis dorma aeapomamin.

²²Allah e Tuhan Yesus damos bajiom opok ow, at pwicak baetamcow. Bare, e daTuhan baoneycow.

²³Tuhan Yesus asan akat, car baomcan.

²⁴Dor e Kristus Yesus ajamkawimokom ow takas damos ajiomamin.