Read Central Asmat 1 KORINTUS 5 Bible Online

1 KORINTUS 5 - Central Asmat bible

1 KORINTUS 5

¹Ow atakam aotawfes ara, caramaman, jursumec ow awamces. E Yahudi opok samatam, inim jursumecas awutut bwem amsom opoken. E jursumecas ara, jipic cowok e aricipic arem cen osom aatamemama.

²Ca nat, carma atawsicimamokom. Car bwec opok ucim inimaram? Bare, car e jursumec ipic caramaman bapakapiemey.

³Dor car cowkon memem opok. Do nat, car cowkon aememamin inim cimin ara. Inimas dor e inim aemef ipic adosa, bare atakam emcasakamtiwof.

⁴Car ajarewsiapcokom ara, doram car akac ajarewsiapcimin inim cimin ara. E Yesus daTuhanam, afakas atetamamarow.

⁵Car masirin, e ipic, Iblis aotasimemtamey. Iblis masirin, e ipic adam daniwis baemcow. Er e Tuhan aoenawcow jofay, e ipic bajoremas ara.

⁶E carma atawsicimamokom, bare pwicakut ara. Bibit roti kanimnakas, e daci roti bini epcom, awut aworomtiwcema. Car inimas camsom opoknew?

⁷Bare, e tarey bibit roti biwosomkurumey. Inimas car ay daci roti bini inim cimin aemapcomokom. Bare, e daBakamsow Pokbwi domba jiwi, Kristus ara. Ow e domba jiwi emcacatiwfes. Inimas ara, car bibit opok roti inim cimin ara.

⁸Inimas ara, dar e pokbwi aemencom, dar e tarey bibit epcom roti memen arapok. E pwicakasam, e jursumecasam, memen arapok. Da nat, e bibit opok roti aemenmocom. E roti e jursumec opokasam, e atakamnakasam, ara.

⁹E surat car aeapomtamfin ara, dor, car e jursumec ow dam bakawi arapok, inim atakam car aotawfin.

¹⁰E aotawfin atakam nat, dor e Kristus mamkawi opok jursumec owam, e pok basinom owam, e osom owam, e ēco basicim owam, inim ow atakam opok. Dor inim ow atakam aotawfin ayaw, bare car awames capinmi bakan bajios ara.

¹¹E surat car aeapomtamfinas nat, “Ow, ‘Dor Kristus car akac ajamkawimom,’ inim aeces, e nat ar jursumec ow aranew, pok basinom ow aranew, ēco basicim ow aranew, cemew atakam bataw ow aranew, jokmen bwi jayic ow aranew, osom ow aranew, bare car e ow amos akac ban arapok.” Inim aefin.

¹²Dor e cesen ow adosa atakam basakamtiw opok. Bare, Allah, e ow adosa, atakam asakamtiwcema. Ca nat, e Yesus basicim car akac barewsi ow adosa, atakam mamsakamtiwey. Bare car e dosa ipic mamotewerosomey.