Read Central Asmat 1 KORINTUS 7 Bible Online

1 KORINTUS 7 - Central Asmat bible

1 KORINTUS 7

¹Wunam, dor, e car surat dor atewenamfan atakam, atep ajitmin. Owerow bisatiw inim memem, bare akat ara.

²E nat, jursumec ow arke awamces. Inimas owerow aporsipor, cepes batewettotorces. Cepesam aporsipor ower bajuwuttotorces.

³Armipic e arem akat apormaras jipu baemcow. Aremam e armipic akat apormaras jipu baemcow

⁴Arem e dam, bare aropas opok. Aram armipicas ara. Armipicam e dam aropas opok. Aram aremas ara.

⁵Caram jimwec mamotpepem arapok. E nat, atakam aamsakamcokom ara: “Bare, dar inim jofay ajiwar isi cowkon opok aemamoc. Dar masirin janim Allah aanimawarmoc,” inim aecokom, bare akat ara. Wunam, e jofay isi cowkon mamoemamesey. Car jak fak opoknew, Iblis, car jursumecas bwem, bacajijimtawasin.

⁶E cepes batewetam, ower bajuwutam, atakam atawmin ara, dor jirmec car bajirim opok. E nat, car inimas bwem akat aporcokom, bare inimas mamemey.

⁷Dor ow takas dor cimin memem, bare akat aemin. E nat, Allah, ow aporsipor, aropas atetamcema. E ow aporsipor atetamcemarasam awcawor opok.

⁸Bare, dor atakam e petew opok cepesam owam, e fwisma cepesam owam, aotawmin ara: Ar, dor inim cimin baememces.

⁹E nat, ar jak fak opok aememcesnew, petew bajiwces. Cepes, ower jak basinom awutnakut bare pwicak ara. Owerowam, cepes jak basinom awutnakut pwicak ara. Bare, aram petew bajiwces.

¹⁰Dor jirmec e petew owam, e ower epcom cepesam, ajirimamin. E jirmec nat, dor opok. E Tuhan, inim jirmec ajirimama: Arem e armipic bajiwem arapok.

¹¹Arem e armipic ajiwemcow, ar tana cowoc inim baememcow. E nat, ar tana cowoc inim memem pwicak aporcow, ar e armipic akac baoememcow. Armipicam, bare e arem bajiwapom arapok.

¹²Doram atakam e wun ow aotawmin. Tuhanam inimas jirmec bajirim opok. Do nat, inim atakam, akat apormin: Bare, Yesus mamkawi ipic, e arem Yesus mamkawi opok cowoc aporcow, wunam e cowoc, e ipic cowkon bemap akat aporcow, bare, ar e arem bajiwapom arapok.

¹³Wunam, cowoc, armipic Yesus mamkawi opok ipic aporcow, wunam e ipic e cowoc cowkon bemap alat aporcow, bare ar e armipic bajiwem arapok.

¹⁴Allah nat, cowoc, Yesus mamkawi cowoc aporcow, aramat ipicam e armipic akat aporcema. Wunam, Allah, jipic, Yesus mamkawi ipic aporcow, Allah e ipic arem, akat aporcema. Allah inimas bwem opok ayaw, Allah e cajiwi, Yesus mamkawi opok ow ajiwi inim cimin aporma. E nat, Allah e jiwi akat apormar ara.

¹⁵Bare, Yesus mamkawi opok cowoc, e armipic Yesus mamkawi ipic aporcow, wunam ar e ipic bajiwem akat aporcow, bare bajiwemcow. Yesus mamkawi opok ipicam, arem Yesus mamkawi cowoc aporcow, wunam ar e cowoc bajiwapom akat aporcow, bare bajiwapomcow. Inimas aemcow, e Yesus mamkawi ipicnew, cowocnew, e bajiwapom opok jirmec amannew, bajiwem opok jirmec amannew, boemap opok aemcema. Bare, Allah car asan akat bemap ajatefan.

¹⁶E ormipic Yesus mamkawi opok ipicnew, o nat, e ormipic ajortewcemem openow. Wunam, e orem Yesus mamkawi opok cowocnew, oram e orem ajortewcemem openow. Car inimas camsom opok.

¹⁷Bare, ow aporsipor, e Tuhan atewemtotorefas jipu baemawarces. Ar, e Allah e ow ajateef jofay aemaptotorfesas, inim cowok baemapawarces. Doram inim atakam e asanin asanin Yesus basicim barewsi ow aotawcimin.

¹⁸Allah, e wun ow ajateef ara, e ow sunat epcom ow aememfesnew, bare ar e sunat opok cimin memem arapok. Allah e wun ow ajateef ara, ar sunat opok ow aememfesnew, bare aram sunat bwem arapok.

¹⁹E sunat epcomnew, e sunat opoknew, bare penting opok. E nat, Allah jirmec ji bwekurum, bare penting ara.

²⁰Ow, e Allah ajateef jofay aemaptotorfesas ara, inim cowok baemapawarces.

²¹E Allah car ajatetotorfan jofay, car mami kerja bwemtam ow aememfokomnew, inimas bi binip jirow arapok. E nat, e cakerja aramat ipic car basurumtam atakam asakamtiwcow, bare car inim afisey.

²²Tuhan e wun ow ajatetotoref jofay, ar mami kerja bwemtam ow aemapfes. Tuhan nat, e ow, dosa fakas asurumtamef. E ow masirin, Tuhan aras ara. Tuhan e wun ow ajatetotoref jofay, ar mami kerja bwemtam ow bemap opok. E ow, bare Tuhan mami kerja bwemtam ow aemapmes.

²³Tuhan e harga awutas atetamef, wunam ar car ajititfan. Inimas car asmat ow mami kerja bwemtam ow memap arapok.

²⁴Dojowow akatonokom. Ow, e Allah ar ajatetotoref jofay aemapfesas, bare inim cowok baemapawerces. Allaham bajamkawiawarces.

²⁵Bare, e petew opok ow aemcesas ara. Tuhan jirmec dor bajirim opok. E nat, Tuhan serow dor ajiomfan. Aram atakamnak ipic aemapomfan. Inimas dor e petew opok ow bi binip aceceremaminas, atakam car aotawmin ara.

²⁶Dar wow asan pwicak emapmom apormin ara. Inimas dobi binip ara, ow wow aemapmesas, inim cowok bemapawar akat ara.

²⁷Cepes epcom ow, e cepes bajiwapom arapok. Cepes epcom opok owam, cepes batewetpor arapok.

²⁸Ca nat, cepes atewetcokom, car dosa bwem opok. E tana cepesam ower ajuwutces, ar dosa bwem opok. E petew aemapmes ow nat, ajurusemcemes. Doram car inim bajurusem pwicak aemin.

²⁹E atakam aotawmin ara, dar Yesus Kristus kerja bwemtam asan, bar jirow opok aemamesma. Inimas e petew epcom ow, cepes batewet opok cimin baememces.

³⁰E bwec abwecmes owam, bwec opok cimin baememces. E jak akat aememames ow, jak akat opok cimin baememces. E pok ajititmes ow, pok opok cimin baememces.

³¹A wow apormom capinmi, bare aaniamescema. Inimas awames capinmias atakam bataw ow, awames capinmias, bi binip bacecerem awut opok cimin baememces.

³²Ca jak bini opok memem, akat aemin. Cepes opok ow, bare Tuhan kerja bwemtam bi binip awut aceceremames. Ar Tuhan jak akat baporemem akat aemes ara.

³³E cepes epcom ow nat, acepes jak akat baporemem akat aemes ara. Inimas ar awames capinmias bi binip awut aceceremames.

³⁴Bare, ar bi binip arke ara. E tana cepesam, e Tuhan kerja bwemtam bi binip awut aceceremames. Ar tarowatnakut memem akat aemes. E ower epcom cepes nat, awames capinmias bi binip awut aceceremames. Ar amiwis jak akat boporemem akat aemes.

³⁵E atakam atawminas, car bakekemas opok. Er car asan akat mememas ara. Er car e akatas bwem atjen bowas ara. Er car bi binip arke opok, Tuhan kerja bwemtamas ara.

³⁶Bare, jipic cowoc batewet aememcow, wunam, “Dor e cowoc batewet tarey aememawiru. E nat, do batewet opok. Eras bare pwicak ara. E cowocam aw tareynakut emetapef. Dor e cowoc batewet akat.” Inim bi binip aceceremcow, bare ar e akat aporcowas baemcow. Eras bwem bare dosa opok.

³⁷E nat, e ipic jak fak ememcow, wunam atakam arma asakamtiwcow, “Dor petew bajiw pwicak,” inim aecow, bare eram akat. Ar e cowoc batewet opok aecow, ar dosa bwem opok.

³⁸Ar e cowoc atewetcow, eram dosa opok ara. E nat, ar e cowoc batewet opok aecow, bare ar akatnakutas aemcema.

³⁹Cowoc armipic, damir baf opok aemcow, e cowoc wun ipic bajuwut arapok. E nat, e armipic damir aafcow, e cowoc, e akat aporcow ipic, bajuwutcow. E nat, e ipic Tuhan mamkawi ipic cowoka.

⁴⁰E dobi binip nat, e cowoc ower bojuwut opok aemcow, ar asan akat aemapcema. Dobi binipam ara, e atawmin atakam, Allah Roh arakat apormaras jipu ara.