Read Central Asmat 2 KORINTUS 1 Bible Online

2 KORINTUS 1 - Central Asmat bible

2 KORINTUS 1

¹Dor Paulus ara. Kristus Yesus, atakam botaw, dor atewosomfan. Allaham eras bwem akat aeef. E dajowow ipic Timotius, a surat akac aeapomamom. E ca Korintus bemap Yesus basicim barewsi ow, bare, Allah aras ara. E ca wun Akaya capinmi bemap owam, ow tarowat ara. Bare, dar a surat car aeapomtamamom.

²Daricipic Allaham, Tuhan Yesus Kristusam, asan akat car baomcan. Aram jak akat car batetamcan.

³E Yesus Kristus daTuhan ara. Allah, bare aricipic ara. Allaham daricipic ara. Ow Allah basicimces. Ar serow dar ajiomamarow. Aram jak fak aemapomkurumamarow.

⁴E ajurusemcomas takas, bare aramat ipic jak fak aemapomcemarow. Dar masirin, e wun ow, e ajurusemcesas takas, jak fak aemapomcomom. Er e aramat ipic jak fak aemapomforowas jipu cowok ara.

⁵Dar e Kristus ajurusemefas, ar akac, awutnakut ajurusemamom. E nat, e Kristus jak faknakut aemapomamarow.

⁶Dar bajurusem epen, er jak fak car bemapomas ara. Eram car bajoremas ara. Allah, dar jak fak bemapom epen, er car jak fak mememas ara. Car, dar inim cimin ajurusemcokom, bare Allah e ajurusemcokomas, inim bakajirem jak fakas atetamceman.

⁷Car dar akac ajurusemamokom apormom ara. E nat, Allah caram, daram, jak fak atetamamarow apormom ara. Inimas dar car asicimawarmenom.

⁸Dojowow akatonokom. E Asia capinmi ajisosfom, dar ajurusemfom. Dar car inimas atakam jen bajikurum akat aemom ara. E ajurusemfomas, bare awutnakut ara. Daram, “Bare, damir aafcomom,” inim bi binip aceceremfom.

⁹Ow dar bacatiw akatam aamsakamfes, inim cimin aemapfom. Eras nat, dar jirey darma bweasinas ara. Eras, dar jirey Allah cowok bweas ara. Aramat ipic, bare, e damir ow aojaworomsumutumcema.

¹⁰Allah nat, dar ajortewforow. Dar masirin, e pwicaknakut damir baf, bare opok arew. Aramat ipicam aojortewcemarow. Car, Allah, dar asan akat batetam, janim aanimtamcarowokom, aramat ipic ajortewcemarow. Dar eras jirey e aramat ipic aemom. Inimas ara, ow arke, e Allah dar asan akat batetam aporces, aram terima kasih atakam e aramat ipic aotawcemes.

¹²E dajak aman atakam, inim atakam aotawmarow: “Car e samatin samatin cowkon aemapawirukum ara, bare car ow tarowat aemapawirukum. Caram suw opok ow aemapawirukum. E aemawirukumas, asmat bi binip baceceremas opok. Allah, asan akat, car atatamawirin. Inimas ara, car eras aemawirukum. E Korintus ow cowkon aemapawirukum, car inimas cowok aemawirukum.” E dajak aman atakam inim atakam aotawmarow. Inimas ara, dar jak akat aemapmom.

¹³E surat car aeapomtamamenom atakam, bare aman opok. Car e atakam baca mamemey. Caram e atakam mamporkurumey. E daTuhan Yesus aofasicow jofay aemapcom, dar car asicimcemenom. Caram dar asicimcemarowokom. Car wow ajiwar eras baporkumum opok ara. Do nat, car asep jofay eras baporkurum, akat aemin.

¹⁵Do nat, eras aporkurumof. Inimas ametnak ara, dor car bajinawom at aetiwof. Dor, asan akat jamnuk car bajiom, akat aeof.

¹⁶Dor Makedonia ajircey, dor cacapinmi batayap at aetiwof. Wunam aofasicey, dor cacapinmi botayap at aetiwof. Eras car wun ow dor Yudea capinmi akac bajiras ara.

¹⁷Do nat, inimas bwem, bi binip arke aceceremofnew? Dor pok bwem at bwemtiw, e dojak beseremomas jipu aranew? Dor “owo” atakamam, “opok” atakamam, cowkon botawnew?

¹⁸Bare, Allah suw ipic opok. Doram suw atakam opok. Do car bajinawom atakam aotawfin, dor “owo” atakamam, “opok” atakamam, car botaw opok.

¹⁹Bare, Yesus Kristus, Allah atiw ara. Doram, Silwanusam, Timotiusam, e Yesus Kristus atakam car acacapiomfenom. E Yesus Kristus, “owo” atakamam, “opok” atakamam, cowkon botaw opok. Ar atakamnak aotawma.

²⁰E Kristus, e Allah atayi aeefas takas jipu aemkurumama. Dar inimas apormom ara, dar, “A atakam, bare atakamnak ara,” inim aecomom. E atakam aotawcomomas, bare Allah basicimas ara.

²¹Bare, Allah, daram, caram, Kristus mamkawi fak aemapomamarow. Aramat ipicam dar a kerja akat bwem atewemforow.

²²Aramat ipicam dar ajusuremforow. Allah e Roh Kudus e dajak aman atatamtotorforow. E Roh, bare e Allah asep jofay dar atatamcarowas, inim baporomas ara.

²³E atawmin atakam, bare atakamnak ara. Dor, Allah, eras atemen bwetam, janim aramat ipic aanimcimin. Aramat ipic e dojak amanas amsom. Doram car sawes akat aomamin. Inimas dor Korintus bofasi opok, atakam asakamtiwof.

²⁴Dar, “Car inim atakam basicimey. Inim atakam basicimey,” jirmec car bajirim opok. Bare, car Yesus basicimnak aemamokom ara. Da nat, kerja car akac aemamom. Er cajak akat bemapomas ara.