Read Central Asmat 2 KORINTUS 12 Bible Online

2 KORINTUS 12 - Central Asmat bible

2 KORINTUS 12

¹Dor e aemawiruas apormin, wunam dorma batawsicim, bare desen ara. E nat, dorma aotawsicimamin araman. Dor e Tuhan, pok desen aporomtamfanasam, e curuwas aporomtamfanasam, inim atakam aotawmin.

²Bare, dor Kristus mamkawi ipic cowok nomsom ara. Tahun empat belas ajiwar aofeapmom ara, Allah e ipic e onam opnakut asan asarimtowotometef. E nat, Allah e ipic e onam op atowotometefnaknew, e ipic pok desen aporefnew, bare nomsom opok.

³Do nat, e ipic nomsom ara. E nat, Allah e ipic e onam op atowotometefnaknew, e ipic pok desen aporefnew, nomsom opok. Allah, bare amsom ara.

⁴Bare, Allah e ipic e Asan Akatipic atowotometef. Erasan ara, aramat ipic karow atakam jen ajief. Bare, asmat ow e atakam bwemotaw asan opok.

⁵Dor e ipic aemefas atawsicimamin. Do nat, dorma bwemtawsicim asan opok. Dor e dam pwicak ipic aememawiruas cowok dorma atawsicimamin.

⁶Do nat, dorma atawsicimceynew, dor atakamnak aotawcimin. Inimas dor jayic ipic inim cimin memem opok aemcimin. E nat, ow e aemofas, pwicak inim aporfes openow. Aram e atakam aotawofas pwicak inim aporfes openow. Inimas dor dorma batawsicim opok. E ow, e aemofasam, e atakam aotawofasam, akatnakut ara, inim atakam botawasin.

⁷Allah e aporomtamfanas, bare akatnakut ara. Aramat ipic nat, icis e donam das atewapomfan inim cimin ara. Er Iblis dor bajurusumas ara. Eram dodam asesak bemapomas ara. Eras dor, “Dor ow akat ara,” inim bi binip baceceremasin.

⁸Doram Tuhan e dodam asesakas biwosomtam janim bar mamincop aanimof.

⁹E Tuhan nat, atep ajitfan. “Dor asan akatnakut or aomamin. Or kumitnakap aemapcemnew, bare dor e dofakas awutut or aporomtamcimin.” Inim aefan. Bare, dor kumit ipic aemapawiruas, dorma atawsicimcimin. Inimas Kristus afakas dor atetamceman.

¹⁰Dor kumit aemapceynew, ow cemew dor aatcenesnew, dor asan aemapceynew, ow dor aemsokomcenesnew, dor Kristus kerja bwemtam ajurusemceynew, bare dor jak akat aememcimin. Dor kumit aememcey, dor Allah afakas atowomcimin.

¹¹Bare, dor e aemfokomas apormin. Inimas dor jayic ipic inim cimin aememamin. Car dor asicimfenokom ayaw, bare akat ara. Bare, dor ow pwicak ara. Caram e wun ow, “Bare, e ow atakam botaw batewosom ow akatnakut ara,” inim atakam aotawmokom. Do nat, e ow awcawor araman.

¹²Dor car cowkon aememawirum, dor Tuhan dor atakam botaw atewosomfan ipicnak ara, inimas car aporomtamawirin. Dor junum bweas e cadampu, jak jirow epcom aemawiru.

¹³Dor, asan akat, e wun asanin asanin Yesus basicim barewsi ow aomofnew? Dor masirin, asan pwicak car aomfinnew? Dor inimas aemof nat, ucimaram? Bare, dor pok dor bafafaytam janim car manim opok aemfin. Inimas dor asan pwicak car aomfin openow. Bare, e fasias aemfin, binip mamjiwosomey.

¹⁴Bare, dor jaki e cacapinmi bar jamnuk emcajitof. Dor masirin, car bojinawom aememamin. Dor ajinawomcin, dor pok dor bafafaytam janim car manim opok aemcimin. Dor e capok jimar opok. Do nat, ca jimar atewsecimin. Bare, jiwi, pok, e arisepes bafafaytam arapok. Arisepes nat, pok e atiperes bafafaytamji.

¹⁵Dor e dopok takas, car asan akat bom, car batetamkurum akat aemin. Doram, car asan akat bom, damir baftam akat aemin. Bare, dor damor awut car ajiomamin. Inimas car damos kanim dor bajiom arapen?

¹⁶Bare, dor asan pwicak car bom opok. Caram inimas camsom. E wun ow nat, “E Paulus pir bwetat ipic ara. Ar tot car aotfan. Inimas ar siso car aneykomopfan inim cimin ara.” Inim aeceman.

¹⁷E nat, e car atiwinamtamfin ow, e capok mami atewfesnew? Inimas dor tot car aotfinnew?

¹⁸Dor Titus car bajinawpor janim fak aanimof. Doram e wun dajowow ipic car atiwinamtamfin. Titus nat, tot car aotfannew? E Titusam, doram, jak awcawor araman. Daram kerja awcawor araman.

¹⁹Dojowow akatonokom. Ca nat, “E Paulus, ar salah bwem opok atakam atawma,” inim bi binip aceceremawirukumnew? E atakam aotawfom nat, Kristus akat apormaras jipu ara. Daram Allah bipu atakam aotawmom ara. E atakam, car Kristus mamkawi fak bemapomas ara.

²⁰Dor car ajinawomcin, car e dojak aseremomaminas jipu opok aememcomokom openow. Doram e cajak aseremomamokomas jipu opok aememcimin openow. Dor inimas omar aemin. Car caramaman bwe atakam aamtawmokom openow. Iciman aamfesmokom openow. Jak amop aememamokom openow. Car carop akat apormokomas jipu cowok aemamokom openow. Cemew aamatmokom openow. Kawey ow salah curuw atakam aamtawmokom openow. Caram carma atawsicimamokom openow. Caram acucumamokom openow. Bare, dor inimas aporcimin openow.

²¹Dor car aojinawomcin, Allah, dor e cabipu namke akamapomceman openow. Dor inimas omar aemin. Car wun ow arke dosa aemfokom. Bare car jursumecas aemfokom. Caram cen cemen osom aemfokom. Caram pwicakas aemfokom. E ca wun ow inimas aemfokom, wunam eras bak bapayem opok aemfokom. Dor inimas aporcey, dor bwec abweccimin openow.