Read Central Asmat 2 KORINTUS 2 Bible Online

2 KORINTUS 2 - Central Asmat bible

2 KORINTUS 2

¹Inimas ara, dor inim atakam asakamtiwof: “Dor e Korintus ow jak pwicak bemapom, bojinaw opok.” Inim aeof.

²Do cajak pwicak aemapomceynew, e dojak akat bemapom ow cam? Bare, cajak pwicak aemapomfin ow cowok ara. Wun ow opok.

³Bare, car e dojak akat aemapomamenokom ow ara. Inimas ara, dor e surat car aeapomtamfin. Car e dojak pwicak bemapomasin. Dor jak akat aemapcey, caram jak akat aemapcomokom. Dor inimas apormin ara.

⁴E surat car aeapomtamfin ara, dor jak pwicakam jak opokam, aemapof. Doram bwec abwecof. E surat car aeapomtamfin, cajak pwicak bemapomas opok. E surat nat, dor car damos ajiomaminas baporomtamas ara.

⁵Jipic cowok, ow jak pwicak aemapomefnew, ar e dojak pwicak bemapom opok. Ar car takas jak pwicak aemapomfan. Do nat, atakam awut bamerferem arapok. Ar car ow arke jak pwicak aemapomfan.

⁶Car ow arke siksa e jipic emcaemfokom. E siksaas, bare awut ara.

⁷Wow nat, car e ipic pwicak aemefas, bi binip mamiwosomey. E ipicam jak akat mamemapomey. Ar jak pwicak awutnakut bemapasin. Aram jak basakayasin.

⁸Dor atjen car aowmin ara. Caram e ipic damosnak mamjiomey.

⁹Dor car bwempor aeof. Car doratakam ji bwe epen bapor aeof. Inimas dor e surat car aeapomtamfin ara.

¹⁰Car ow e pwicak aefesas, bi binip biwosomnew, bare doram eras bi binip biwosomamin. Do nat, ow e pwicak aefesas, bi binip ajiwiosomofnew, bare er car asan akat batetamas ara. Doram eras Kristus bipu aemamin.

¹¹Dar, ow e pwicak aefesas bi binip biwosom ara, e Iblis dar bakumimosomasinas ara. Daram e Iblis e at namsom ara.

¹²Bare, dor e Kristus Atakam Akat botaw e Troas ajarapof. Ajarapof masirin, Tuhan, e ow e atakam jen baji, binip akat emcatetamef aporof.

¹³Do nat, erasan, e dojowow ipic Titus, bi bapor opok aemof. Inimas jak bini aemapof. Dor masirin, “Doram bare, bojisos,” inim aeof, wunam Makedonia ajirof.

¹⁴Bare, dar terima kasih atakam Allah aotawmom. Dar Kristus ajamkawimom. Inimas dar e Kristus akac, e pwicakas akumimosomamom. Bare, Allah dar inimas bwem aomamarow. Daram Allah kerja aemtamamom. Inimas ara, e Kristus atakam, e asanin asanin apacayosma. Er pinim akat bapacayos inim cimin ara.

¹⁵Kristus, pok pinim akat, Allah afamtamama inim cimin ara. E pinim apacayosma. Daram e pinim inim cimin ara. E pinim e ajoremames owpu apacayosma. Eram e daniwis aemtiwces owpu apacayosma.

¹⁶E daniwis aemtiwces ow, dar damiras pinim inim cimin, binip aceceremames. E ajoremames ow masirin, dar jiwne batetamas pinim inim cimin, binip aceceremames. Inim kerja bwem awcawor ow nat, ucim owam?

¹⁷Dar e wun ow arke awcawor opok. E ow, pok batewet aemes. Inimas ar Allah atakam kawey ow aotawmes. Da nat, Kristus ajamkawimom. Allaham dar atewosomforow. Aram e aemamomas amsom ara. Inimas dar atakam pir bwe opok aotawmom.