Read Central Asmat 2 KORINTUS 5 Bible Online

2 KORINTUS 5 - Central Asmat bible

2 KORINTUS 5

¹E dadam, bare cem inim cimin ara. Awames capinmi ara, dar e cem aman aemaptotormom. E nat, e cem daniwis aemamestotorcow, dar onam op jiwne cem aaptometfiwaptotorcomom. (E cem e ay dam atowopcomas ara.) Asmat owam e cem bakenemapom opok. Allah e cem akenemapomef. Dar inimas namsom ara.

²Da nat, wow e daronam op cem batometfiw, jak aseremomamom. Inimas josesin amerfayemamom.

³E cem afiwapcom, asan akat aemapcomom.

⁴Dar awames capinmi cem aman aemapmom, dar jak pwicak aemapmom. Inimas josesin amerfayemamom. Dar e dadam biwosom opok. Da nat, Allah, e onam op dam, dar bapwirimapom akat aemom. Dar, e jiwneas, e damiras bakumimosom, akat aemom.

⁵Allah, dar e onam op dam batowom, akenemapomforow. Aram e Roh Kudus atetamforow. Inimas ar e atayi aeefas aemtamcemarow apormom ara.

⁶Inimas ara, dar jak fak aememamom. Dar e dadam aman aemapmom ara, bare dar Tuhan cowkon bemap opok ara. Dar inimas apormom.

⁷Dar e aemcomas manmok bwemtiw asan opok. Da nat, e aemcomas atakam asicimamom.

⁸Dar jak fak aememamom. Dar e dadam bakan bajios, wunam Tuhan cem bafiwap, akat aemom.

⁹E nat, a dam aman aemapcomnew, a dam bakan ajioscomnew, dar aramat ipic jak akat boporemem, jak aseremomamom.

¹⁰Bare, dar takas Kristus bipu umuton aememcomom. Aramat ipic, e tetakay aememawirumas akatnew, pwicaknew, atakam asakamtiwcema. Ar masirin, e aemawirumas jipu atetamcemarow.

¹¹Inimas dar Tuhan omar aemom. Daram ow acajijimtawmom. Bare, Allah e dajak amanas takas aporkurumamarow. Caram e dajak amanas baporkurum akat aemin.

¹²Dar, “Dar ow tarowat ara,” inim atakam car bootaw opok. E nat, car, “E ow, bare tarowat ara,” inim atakam carma botaw, bare akat ara. Inimas ara, car e wun ow atep ajitcomokom. E ow, bare ow biin aporcemes, wunam, “E ow tarowat ara,” inim aecemes. E nat, ar e ow jak amanas atakam botaw opok aemcemes.

¹³Wun ow, dar jayic ara, inim bi binip aceceremames openow. E nat, e aemfomas, Allah kerja bwemtamas ara. Wun ow, dar bi binip akat epcom, inim bi binip aceceremames openow. E aemamomas nat, asan akat car batetamas ara.

¹⁴Bare, jipic cowok, ow takas damir aaftamef. Inimas ow takas damir aramat ipic cowkon inim cimin aaffes. Dar inimas apormom ara. Kristus, dar damos ajiemamarow. Inimas dar aratakam ji aemom.

¹⁵E aramat ipic, damir, ow takas aaftamforow. Aram aojaworsitef. Ar, a tetakay aememamom ow, darop asan akatas pok boem pwicaken. Ar, dar, e aramat ipic kerja bwemtam akaten. Ar inimas damir, ow takas aaftamforow.

¹⁶Inimas ara, dar, ow, ow akatnew, ow pwicaknew, asmat bi binip jipu atakam bootaw opok. Bap ara, dar Kristus akatnew, pwicaknew, asmat bi binip jipu, atakam aotawfom. Da nat, wow inimas boem opok.

¹⁷Ow, Kristus ajamkawices, Allah e ow ay ajaworomapomcema. E tareyas akaricemes. Bare, er ayas ajaworemcemes.

¹⁸Allah eras takas aemtamama. Bap ara, dar Allah ajewew ow aememfom. E nat, Kristus damir aaftamforow. Inimas Allah pay dar aeforow. Aram e apay bweas, atakam kawey ow botaw ow, atewemforow.

¹⁹E atakam ara: Kristus asmat ow damir aaftamef. Inimas Allah e asmat ow pay aeef. Aramat ipicam asmat ow dosa bajucucumir opok aemama. Aram e apay bweas atakam botaw, atatitamforow.

²⁰Bare, dar Kristus atakam bajomattam ow ara. Inimas e atakam car aotawmenomas, e Allah atakam car aotawmanas ara. Inimas dar Kristus, janim fak car aanimtamamom. “Allah car pay bom aemama. Caram eras botpem arapok.” Inim aemenom.

²¹E Kristus dosa bwem amsom opok. Allah nat, aramat ipic dosa ipic ajaworomemef. Bare, aramat ipic juw auwuemforow. Eras, Allah, e Kristus ajamkawimom ow, ow tarowat ara, inim atakam basakamtiwas ara.