Read Central Asmat 2 KORINTUS 6 Bible Online

2 KORINTUS 6 - Central Asmat bible

2 KORINTUS 6

¹Wunam, daram Allaham kerja cowkon aemamom. Inimas ara, dar janim fak car aanimamenom. E Allah asan akat car atetamamanas, desen batowomat arapok.

²Allah atakam ara, “Dor asan akat or bom jofay ara, dor oratakam jen ajifin. E dor or bajortew jofay ara, dor akac or aemfin.” Allah inim aeefen. Ca nat, jakaperey. Wow, Allah asan akat ca bom aememama. Wow Allah ca bajortew aememama.

³Daram ow pwicakas bwem bacajijimtaw opok. Ow dar e Allah kerja aemtamamomas, atakam pwicak botawasin.

⁴E aemamomas takas nat, dar Allah kerja aemtamamom ow, inim aporomtamamom. Dar ajurusemfomam, asan pwicak aememfomam, jak opok aememfomam, bare dar jak jirow aememfom.

⁵Owam omop dar aafforowos. Aram penjara cem aman ajiwtewapomforowos. Aram jokmenas aemforowos. Daram kerja awutnakut aemfom. Daram isi bwes awut opok. Daram amosto awut aememfom.

⁶Daram jursumec opok aememfom. Daram e atakamnak namsom ara. Daram jak jirow aememfom. Daram ow asan akat aomfom. Daram Roh Kudus epcom. Daram ow damosnak ajiomfom. Bare, eras takas dar Allah kerja bwemtam ow ara, inim baporomtamas ara.

⁷Daram e atakamnak acacapiomfom. Allaham afakas atetamforow. Aramat ipicam ow tarowat aemapomforow. Er Allah ajewew ow bakumimosomas ara.

⁸Wun ow dar asicimamarowos. Wun ow masirin, namke akamamarowos. Wun owam dar ow akat atakam atawmes. Wun masirin, dar ow pwicak atakam atawmes. Wun ow dar suw ow atakam atawmes. Da nat, atakamnak aotawcomom.

⁹Wun ow dar amsom opok cimin aememames. E nat, ow takas dar amsomnakut ara. Daram damir bafken aemfom. E nat, jakaperey. Dar tetakay awamcom ara. Ow dar ajurusumforowos. E nat, ar dar bacatiw opok.

¹⁰Daram jak pwicak aememamom. E nat, daram jak akat aememawarmom. Daram pok awut opok aememamom. E nat, e anakatas awut, ow arke atatamamom. Daram pok opok. E nat, e anakatas takas awompom.

¹¹Awapokom Korintus owa. Dar atakam umuton car aotawmenom. Daram damos car ajiomamenom.

¹²Bare, dar damos awutut car ajiomamenom. Ca nat, damos kanim dar ajiomamarowokom.

¹³Car dotiperes aememamokom inim cimin atakam car aotawmin ara. Bare, e damos amatam pomatam mamemcarowey. Caram damos dar mamjiomkurumcarowey.

¹⁴Car e Kristus basicim opok ow mamkawi arapok. E tarowatasam, e fasiasam, bare awcawor opok. E sereasam, e jiwicasam, cowkon mamemap arapok.

¹⁵Kristusam, Belialam, bare atakam mamsakamtiw opok. E Kristus basicim owam, e Kristus basicim opok owam, cowkon mamemap arapok.

¹⁶Allah cemam, ēcoām, bare cowkon opok. Da nat, e jiwne Allah acem awapom ara. Bare, Allah inim atakam aotawefen: “Dor e ow cowkon aemapcomom. Bare, dor e ow awasec aemapcimin. Dor e ow arAllah aememcimin. Aram dorow aememcemes.” Inim aeefen.

¹⁷Inimas ara, e Tuhan atakam: “ ‘Car e ow bakan jiemey. Caram e ow bapakapiemey. E jursumecas ban bakurum arapok. Dor masirin car atewcimin.

¹⁸Doram caricipic aememcimin. Caram dotiperes aememcomokom.’ E faknakut Tuhan inim aema.” Allah inim aeefen.