Read Central Asmat 2 KORINTUS 7 Bible Online

2 KORINTUS 7 - Central Asmat bible

2 KORINTUS 7

¹Dojowow akatonokom. Dar e Allah atayi aeforowas apormom ara. Inimas dar e aemamom jursumecasam, e dajak aman jursumecasam, bajiwosomamoc. Daram Allah omar emoc. Inimas dar ow tarowatnak aememcomom.

²Bare, caram damos mamjiomcarowey. Dar, pwicakas, ow bwem opok cowok. Daram ow bajurusum opok cowok. Daram pok batewet, ow tot bot opok cowok.

³E atawmin atakam nat, car salah bwem ow ara, bare inim atakam basakamtiwas opok. Dar damos car ajiomamenom. Inimas dar tetakay aememcomnew, dar car akac aememcomom. Damir aafcomnew, daram damir car akac aafcomom. Bap ara, dor inim atakam car emcaotawfin.

⁴Dor car basicim awut ara. Dor, car ow akat, inim atakam awut aotawcimin. Bare, ow dor ajurusumamenes. E nat, jak faknakut aememamin. Jak akatnakutam aememamin.

⁵Makedonia capinmiam asetayapfom, dar asan akat bemap opok aemfom. E asanin asanin, bare ajurusapfom. Owam atakam dar aamtawforowos. Daram omar aefom.

⁶Allah nat, e jak pwicak ow, jak fak aemtamcema. Bare, aramat ipic Titus atewenamtamforow. Inimas Allah dar jak fak aemtamforow.

⁷E Titus aenawomforow, jak fak aememfom. E nat, e cowok opok. Aramat ipic e car jak fak ar aemtamfokomas, atakam aotawforow. “E Korintus Yesus mamkawi ow, or bi bapor jak aseremomkurumames. E pwicak aemfesas, bare jak pwicak aemapmes. Aram, or kay akaymenes.” Titus inim aeforow. Dor masirin, jak akat kayimin aokayimof.

⁸Ametnak ara, dor surat aeapomof, wunam e surat car atetamfin. E surat atakamam jak pwicak car aemapomfan. Do nat, eras, jak pwicak opok. Bare, e surat atakam car jak pwicak jipin inim aemapomfan. Bap ara, dor cajak pwicak aporof, doram jak pwicak aememof.

⁹Wow nat, dor jak akat aememamin. Dor car jak pwicak aemapomfin, inimas jak akat aememof— bare inimas opok. E nat, car jak pwicak aememfokom, wunam dosa bak apayemfokom. Dor inimas aporof, wunam jak akat aememof. E jak pwicak aememfokomas, bare Allah akat aporef jipuas ara. Inimas dar car bajurusum opok.

¹⁰Allah wun ow jak pwicak memem, akat apormar ara. E ow jak pwicak aememces, aram dosa bak apayemcemes. Inimas ara ajoremcemes. Owam eras akat aporcemes. E nat, ow awames capinmi atakam jipu jak pwicak aememces, ar damir aafcemes.

¹¹Car e Allah akat apormaras jipu jak pwicak aememfokom. Inimas car asan akatnakut aememfokom. Bare, car Kristus mamkawinak jak aseremomfokom. Caram e dosaut akac bwem opok. Car masirin, eras kawey ow baporomtam jak aserememfokom. Caram e dosaas, jak amop awut aememfokom. Caram omar awut aemfokom. Caram dor ca bwenawom jak aseremomfokom. Caram akatas bwem jak aseremomfokom. Caram siksa e dosaut aemef ipic aememfokom. E aemfokomas takas, bare salah opok cowok.

¹²Doram e surat car aeapomtamfin ara, dor e pwicakas aemef ipic bi binip awut opok. E ipic, salah, ow aomef. Doram, e ow bi binip awut opok. E nat, car damos dar ajiomkurumamarowokom. Doram eras, Allah bipu car baporomtam, jak aserememof. Inimas ara, dor a surat car aeapomtamfin.

¹³Car damos dar ajiomkurumforowokom aporfom. Inimas jak fak aememfom. Da nat, e jak fak aememfom, eras cowok opok. Caram Titus jak akat aemapomfokom. Dar e Titus jak akat aporfom, daram jak akat aoememfom.

¹⁴Doram atakam e aramat ipic aotawof, “E Korintus ow akat ara,” inim aeof. Caram pwicakas aemfokom, wunam namke dor akamemfonokam— bare inimas opok. E atakam car aotawawirinumas, atakamnak ara. E caratakam Titus aotawfomasam, bare atakamnak ara. Owam inimas apormes.

¹⁵Car e Titus atewfokom ara, caram aramat ipic asicimkurumfokom. Caram takas aratakam ji aefokom. Aramat ipic inimas bi binip aceceremamar ara, aram damos car bajiom kayimin akakayimama.

¹⁶Bare, car ow tarowat apormin ara. Inimas jak akat aememamin.