Read Central Asmat 2 KORINTUS 8 Bible Online

2 KORINTUS 8 - Central Asmat bible

2 KORINTUS 8

¹Dojowow akatonokom. Allah, asan akat, e Makedonia capinmi asanin asanin Yesus basicim barewsi ow aomef. Dar car inim atakam jen baji akat aemom.

²E ow, awutnakut ajurusemfes. Eras bare, e ow Yesus mamkawi fak epen baporomtamas ara. E owam pok kanimnakas aemopfes. E nat, aram jak akatnakut aemapfes. Inimas aram pok awut kawey ow sey aseyetamfes.

³Bare, ar pok awut e kawey ow atatamfes. Aram arop pok kanimnakas aomomatfes. Ar masirin, wun pokam e kawey ow aotatamfes. Eras bwem nat, arop bi binip jipuas ara, Doram inimas manmok dorma atiwof.

⁴Ar e wun ow akac, uang, e Yudea capinmi ow tarowat batatam, janim fak aanimforowos.

⁵Daram bi binip aceceremfom, “E Makedonia ow, uang atatamcemes. Aram wunas bwem opok aemcemes,” inim aefom. E nat, ar uang cowok batatam opok. Aram Tuhan atakam ji bwekurum, atakam asakamtiwtotorfes. Aram daratakam ji bwekurum atakam asakamtiwtotorfes. Er Allah akat apormaras jipu ara.

⁶Dar inimas aporfom ara, dar Titus atjen aowfom. “Or e Korintus ow, pok, asan pwicak aemapmes ow batatam, amememtamfem. Bare, ar a akatas bwem, mammememapomkurumey.” Inim aefom.

⁷Bare, e aemamokomas takas, akat cowok ara. Car Kristus basicimnak aemamokom. Caram atakam akat aotawkurumamokom. Caram camsomnakut ara. Caram ow asan akat bom, jak aseremomkurumamokom. Caram damos dar ajiomkurumamenokom. Inimas ara, caram pok awut e asan pwicak aemapmes ow mamtatamkurumey.

⁸Dor jirmec car bajirim opok. Do nat, e wun ow e akatas bwem jak aseremomamesas, atakam car aotawmin. Car damosnak bajiom epen bapor aemin.

⁹E Yesus Kristus daTuhan, asan akat, ow aomef. Caram inimas camsom. Aramat ipic pok anakat awut aomomef. E nat, ar pok opok ipic aememef. Er car asan akat bomas ara. Eram car pok anakat awut batatamas ara.

¹⁰Dobi binip ara, car e bap tahun asuemfokomas, bwemkurum akat ara. Er car asan akat bemapas ara. Car e uang aaramsimapomfokom, bare bap ara. Caram eras bwem jak aseremomfokom bap ara. E wun ow masirin, asep aemfes.

¹¹Bare, eras mamemkurumey. Car eras atakam basakamtiw, jak aseremomfokom. Caram eras bwemkurum, inim jak mamseremomey. Caram e awompokom uang jipu e ow mamtetamey.

¹²Car pok batatam jak aseremomamokomnew, Allah e atatamcokomas akat aporcema. Aramat ipic, car e awompokomas jipu, kawey ow batatam, akat aema. Ar nat, e pok opok anakat ow, pok kawey ow batatam, atakam opok.

¹³Car pok kawey ow batetam nat, er e kawey ow asan akat bemapas, wunam car asan pwicak bemapas— inimas opok. Car pok kawey ow atatamcokom, caram, e owam, pok cawor inim aomomcomokom.

¹⁴Bare, wow car pok awut awompokom. Car masirin, pok e asan pwicak ow batatam, bare akat ara. Asep jofay masirin, car asan pwicak aemapcokomnew, wunam e ow pok awut aomomcesnew, ar pok car atatamceman.

¹⁵E Alkitabam inim atakam ara: “E amos pok awut inim aaramsimfes ow, e wunas bwemtatiw asan opok. E amos pok kanim inim aaramsimfes owam, amosto opok.” Inim aema.

¹⁶Dar asan akat car bom jak aseremomamom. Allaham, inim asan akat car bom jak, Titus atetamef. Inimas dar terima kasih atakam Allah aotawmom.

¹⁷Bare, e Titus e janim aanimfomas, jen akat ajief. Aramat ipicam asan akat car bom, jak aseremomkurumef. Inimas ar car bajinawom atakam arma asakamtiwef.

¹⁸Daram e dajowow ipic cowok e Titus akac atewosomamom. E dajowow ipicam, e Atakam Akat awutut aotawawiri. Inimas e asanin asanin Yesus basicim barewsi ow, e ipic asicimames.

¹⁹E nat, e cowok opok. E Yesus basicim barewsi ow e ipic atewemfes. Ar aramat ipic, e uang, dor akac batowomir, inim atewemfes. E uang atowomircom, er Tuhan basicimas ara. Bare, daram asan akat ow bom, inim jak aseremomcomom. Daram e uang atowomircom, ow inimas aporcemes.

²⁰Daram a uang awutut batowomir, pimicim cowok aemamom. Ow, atakam dar botawasin.

²¹Dar e Tuhan akat apormaras bwem, bi binip aceceremamom. Daram e asmat ow e akat apormesas, bi binip aceceremamom.

²²Bare, daram e wun dajowow ipic, e ow akac carasan atewenamcomon. Daram aramat ipic bar arke aoworporfom. Aram asan akat car bom, jak baseremomawar ipic aporfom. Wow nat, aramat ipic car basicim awutnakut aemaman. Inimas aram asan akat car bom, jak aseremomkurumama.

²³E Titus, bare dojowow ipic ara. Aramat ipic asan akat car bom, dor akac aemamom. E wun dajowow e Titus akac ajisoscemes. E Yesus basicim barewsi owam, e ow atewosomcemes. E ow, e Kristus akatnakut ara, inim aporomtamames.

²⁴Caram e ow damos mamjiomkurumey. E asanin asanin Yesus basicim barewsi ow eras baporces. Bap ara, dar atakam, “E Korintus ow, bare akat ara,” inim aefom. Bare, e ow, e atakam, atakamnak baporces.