Read Central Asmat 2 KORINTUS 9 Bible Online

2 KORINTUS 9 - Central Asmat bible

2 KORINTUS 9

¹Bare, dor, car asan akat e ow tarowat bom, surat bwe arapok.

²Car, asan akat e ow bom, jak aseremomamokom apormin ara. Doram, car ow akat atakam e Makedonia ow aotawof. “E Akaya ow, e bap aemapfom tahun, e uang baramsimapom, atakam emcaamsakamtiwfes.” Inim aeof. Wun ow arkeam, e cajak aseremomamokomas aporfes. Ar masirin, car cimin bwem, akat aefes.

³Bare, dar, “E Akaya ow akat,” inim atakam aotawfom. E nat, dor dajowow ipic mamincop carasan atewenamtamcimin. E atawfom atakam desen atakam memamesasin. Caram e uang aaramsimapomkurumcokom, eras e atakam aotawofas jipu ara.

⁴E Makedonia ow dar akac ara ajinawomcannew, ar car e uang baramsimapom opok baporasin. Inimas aemcesnew, bare dar namke akayemcomom— e car ow akat ara, inim atakam fak aotawfomas ara. Bare, caram namke akayemcomokom.

⁵Inimas ara, dor binip aceceremof: “A dojowow, e Korintus bap bajirces. Dor e ow inimas janim aanimcimin. Dor masirin, erasan asep ajircimin. E Korintus ow, bare pok awut e asan pwicak ow batetam, atayi aefes. E dojowow e ow e pok aynam baramsimapom, atakam baotawces. Wunam ajinawcey ara, e uang emcaaramsimapomfes.” Inim aeof. Bare, car uang bap aaramsimapomcokomnew, ow car e uang kawey ow batatam jak aseremomamokom aporcemes. Ar ow car eras bwem jirmec bajirim opok aporcemes.

⁶Caram binip mamcomomey. Kebun kerja ipic eke arke opok atawapomcow, asep jofay masirin, anakat arke opok atewencema. E nat, eke arke atawapomcow, anakat arke atewencema.

⁷Ow aporsipor e atakam arma asakamtiwtotorfes jipu, pok batatamces. Aram e pok batatam jak pwicak arapok. Aram pok kawey ow batatam jirmec jen batakamji, wunam pok e ow batatam— inim arapok. Bare, Allah pok batatam jak akat ow, damos ajiomama.

⁸Allah, asan akatnak car batetam, inim fakas aomomamar ara. Car masirin, pok opok bemap opok aemcomokom. Caram wun pok kawey ow atatamcomokom.

⁹Er e Alkitab atakam jipu ara: “Aramat ipic pok sey aseyetamef. Ar pok e pok opok ow atatamef. Aram asan akat, ow aatamomawarma.” Inim aema.

¹⁰Allah, eke e eke batawapom ow atatamcema. Aram amos pok atatamcema. Bare, aram eke car atatamceman inim cimin ara. Aram e eke ajitimcema inim cimin ara. Ar masirin, car ow asan akat aomcokomas akakawimcema.

¹¹Aram pok awut car aotatamceman. Inimas car kawey ow, ban kumit sey baseyetam ara. Inimas dar e atatamcokom uang atowomirtamcom, e uang tatces ow, terima kasih atakam Allah aotawcemes.

¹²E atatamcokomas, bare, ow asan akat bomas ara. Owam terima kasih atakam awutut Allah aotawcemes.

¹³Car a pok sey aseyetamcokom, car Kristus mamkawinak aporomtamcomokom. Caram, “Dar e Kristus Atakam Akat asicimamom,” inim aefokom. Owam car e atakam ji bwekurum aporcemes. Aram car pok sey awut, aramat owam, e wun ow takasam, baseyetam aporcemes. Inimas ar Allah asicimcemes.

¹⁴Allah, bare, bi binip akat car atetamfan. E ow inimas aporces, ar damos awutnakut car ajiomceman. Ar masirin, janim Allah car aanimtamceman.

¹⁵E Allah atetamefas, bare akatnakut ara. Inimas dar eras atakam bwemtawkurum asan opok. Bare, dar terima kasih atakam Allah baotawmoc.