Read Central Asmat GALATIA 1 Bible Online

GALATIA 1 - Central Asmat bible

GALATIA 1

¹Dor Paulus ara. Ow dor atakam botaw batewosom ipic atewemfenes. E atewemfenes ow nat, asmat ow opok. Yesus Kristusam, daricipic Allaham, dor atakam botaw batewosom ipic atewemfenes. Bare, e Allah e Yesus Kristus aojaworomsumutumef ipic ara.

²Doram, e dor cowkon aememamom dajowowam, a selamat atakam e ca Galatia capinmi asanin asanin Yesus basicim barewsi ow, aotawmenom.

³Daricipic Allaham, Tuhan Yesus Kristusam, asan akat car baomcan. Aram jak akat car batetamcan.

⁴E Kristusam e daricipic Allah atakam ji aeef. Inimas ar e dadosa bakokoromosom damir aaftamforow. Ar e wow aemapmom capinmi jursumecas, dar bajortew inim damir aaftamforow.

⁵Ow e aramat ipic baatamsicimawarces. A atakam, bare atakamnak ara.

⁶E Kristus aemefas, ow asan akat bomas ara. Allah, car e asan akat momom, car ajatefan. Ca nat, e car ajatefan ipic sarimnakap akorememamokom. Wunam car wun “atakam akat” jen ajimokom. (E wun “atakam akat” nat, atakamnak opok ara.) Dor e aemamokomas apormin, wunam junum awut aemin.

⁷Wun “atakam akat” nat, opok cowok. (E aotawfenomas cowok, e Atakam Akat anakat ara.) E nat, wun ow car ajurusumaman. E ow, e Kristus Atakam Akat, dās atakam bapwipwikimtaw, akat aemames.

⁸Dor aranew, onam op malaikatut aranew, wun “atakam akat” car acacapiomcan, bare e ow e jismak asan bafiwapces! Ow, e acacapiomfom Atakam Akat, e cowok bacacapiomces.

⁹Bap ara, dar inim atakam aotawfenom. Doram wow inim atakam car aotawmin: Ow, wun “atakam akat” car acacapiomces, e ow e jismak asan bafiwapces. Ow e ji aefokom Atakam Akat, e cowok bacacapiomces.

¹⁰Doram ucimaram? Dor asmat ow damos dor bajiom jak aseremomaminnew? Dor Allah damos dor bajiom jak aseremomaminnew? Dor asmat ow jak akat bemapompor aemaminnew? Do nat, wow ajiwaram, asmat ow jak akat bemapompor aemawiru ayaw, dor Kristus kerja bwemtam ipic memem opok ara.

¹¹Dojowow akatonokom. Doratakam jen pajiey. E acacapiomcimin Atakam Akat, asmat ipic arma atitewefas opok.

¹²Asmat ipic e atakam do mamememtam opok. E nat, Yesus Kristus aramat ipic, e atakam dor aporomfan.

¹³Car, e dor agama Yahudi ajamkawiawiruas, jen emejifokom. Dor e Yesus basicim barewsi ow, awutnakut ajurusumawiru. E ow nat, Allah aras ara. Doram e ow ajurusumkurumporawiru.

¹⁴Dor e agama Yahudi faknakut ajamkawiawiru. Doram e dorafasutmar pok cey aemawirisas, faknakut ajamkawiawiru. E dor umur cowkon aememfes ow nat, eras fak opok inim ajamkawiawiris.

¹⁵Bap ara nat, Allah, asan akat aomfan. Dor dorosowoc jak aman aemamesof ara, aramat ipic dor aeremtewfan. Aram dor akerja bwemtam ipic memem ajatefan.

¹⁶Aramat ipicam, e atiw dor baporomtam, inim atakam asakamtiwef Er, dor e atiw Atakam Akat, e Yahudi opok ow bacacapiomas ara. Ar e atiw dor aporomtamfan ara, dor asmat ow, “Dor ucimas emcey?” inim jonow batowpor opok.

¹⁷E Yerusalem atakam botaw batewosom ow, inim ow bap aememfes. Dor masirin, atakam botaw batewosom ipic asep aememof. Do nat, e owpu bapen opok. Dor Arab capinmi akan aakosof. Wunam kota Damsik aofasienof.

¹⁸Dor tahun tiga ajiwar aememof. Tahun tiga ajiwar aememof masirin, dor Kefas bi bapor aememof. Inimas dor Yerusalem aapenof. Doram Kefas acem isi lima belas ajiwar aemapof.

¹⁹Doram Tuhan arewec juwas Yakobus bi aporof. E nat, dor e wun atakam botaw batewosom ow bi bapor opokut.

²⁰A surat aeapomamin atakam, atakamnak ara. Bare, Allah manmok tiwap.

²¹Bare, dor Siria capinmiam, Kilikia capinmiam, ajisosof.

²²E Yudea capinmi asanin asanin Yesus basicim barewsi ow nat, e dobi bapor opokut aemawiris.

²³E ow atakamin jen ajifes. “E ajurusumforow ipic, e Yesus basicim atakam acacapiomama. Bap ara nat, ar e Yesus basicim ow ajurusumkurumporef.” Inim atakam jen ajifes.

²⁴Ar masirin, e aemofas aporfes, wunam Allah asicimfes.