Read Central Asmat GALATIA 2 Bible Online

GALATIA 2 - Central Asmat bible

GALATIA 2

¹Bare, tahun empat belas ajiwar aememawiru. Dor masirin, Barnabascin Yerusalem aoapenfom. Doram Titus ajisomosof.

²Allaham dor erasan baysos jirmec ajirimfan. Inimas dor erasan ajisosof. E wun ow e Yesus mamkawi ow akepala ow aememfes arawen. Doram e ow akac ajarewsiapfom. Dor masirin, e Yahudi opok ow acacapiomtamamin Atakam Akat, e owam aotawof. Er, e ow, e atakam boworporas ara. E aemofas, e bap kerja aemawiruasam, e jepen kerja aemawiruasam, desen memamesasin.

³E akac emjarawirum ipic juwas Titus, bare Yunani samat ipic ara. E nat, e ow e Titus sunat bwetiw jirmec bajirim opok.

⁴Wun ow e Titus sunat bwetiw atakam atawfes. E ow Kristus Yesus mamkawi pir bwe ow ara. Ar, e Kristus Yesus ajamkawimom ow, e Yahudi jirmec aman boemap opok aporfes. Aram eras boworpor, jak aserememfes. Aram dar e jutur jirmec aman batamemapawar akat arawen.

⁵Bare, e Atakam Akat, atakamnak ara. Daram ow, e atakamnak, suw atakam inim cimin bemapom, pwicak aemfom. Inimas ara, dar e ow atakam ji bwe opok cowok aemfom.

⁶E wun erasan ow e Yesus mamkawi ow akepala ow aememfes arawen. E ow nat, ay atakam dor mamememtam opok. Dobi binip nat, e ow, kepala ow aranew, mami ow aranew, bare awcawor ara. Allah, ow biin boworpor opok. Ar ow jak amanas aoworporma.

⁷Bap ara, Allah dor e Atakam Akat e Yahudi opok ow bacacapiom ipic atewemfan— ar Petrus e Atakam Akat e Yahudi ow bacacapiom ipic atewemef inim cimin ara. E kepala owam inimas aporfes.

⁸Bare, Allah e Petrus, Yahudi ow atakam botaw atewosomef. Aram dor e Yahudi opok ow atakam botaw atewosomfan. Ar inim kerja cescuwas atetamtotorforow.

⁹Yakobusam, Kefasam, Yohanesam, e Yesus mamkawi ow akepala ow aememfes arawen. E ipic mamincop, Allah inim tugas dor atetamfan aporfes. Ar masirin, Barnabasam, doram, banfe ajijimtawforowos. Eras, dar kerja ar akac bwem baporomas ara. Daram atakam aamsakamfom. Dor Barnabascin e Yahudi opok owpu baysos, wunam e ipic mamincop e Yahudi owpu baysos, inim atakam aamsakamfom.

¹⁰A nat, wun atakamam cowok aotawforowos. Dar e pok opok ow binip manim arapok, inim atakam aotawforowos. Doram inimas cowok bwem jak aserememof.

¹¹E nat, Kefas, Antiokia aenawef ara, dor atakam umuton aramat ipic basam apapayimtitamof. Aramat ipic pwicakas aemef aporof ara.

¹²Bap ara, aramat ipic e Yahudi opok ow amos akac aana ajimep. E nat, e Yakobus erasan atewosomef ow aenawfes ara, e Kefas aotasiemef. Ar e Yahudi opok ow amos akac boan opok aemef. Bap ara, wun ow e Yahudi opok ow sunat bwetiw atakam atawfes. Kefasam e ow omar aeef.

¹³E erasan aememfes Yahudi owam, e Petrus pir akac aemfes. E Barnabasutam e pir bwemas ajamkawief.

¹⁴Bare, e Atakam Akat atakamnak ara. E nat, e ow aemfesas, e atakamnak jipuas opok aporof. Dor masirin, atakam Petrus e ow takas bipu aotawof: “Or Yahudi samat ipic ara. E nat, e aemamemas Yahudi samat atakam jipu opok. E aemamemas Yahudi opok samat atakam jipu ara. Inimas ara, or a Yahudi opok ow, Yahudi ow inim cimin memem, jen opok aatamcicimomamem ucimaram?” Inim aeof.

¹⁵Bare, dar Yahudi samat ow ajisamesfom. E Yahudi ow atakam, “E Yahudi opok ow dosa ow ara.” Inim aemes. Da nat, Yahudi opok samat arapok.

¹⁶Bare, Allah, e Jirmec surat atakam ji bwe ow, ow tarowat ara, inim atakam basakamtiw opok aemama. E nat, ar e Yesus Kristus asicimames ow, ow tarowat ara, inim atakam asakamtiwma. Dar inimas namsom ara. Bare, dar Kristus Yesus asicimfom. Er Allah, dar ow tarowat ara, inim atakam basakamtiwas ara. E Jirmec surat atakam ji aefomas, Allah dar ow tarowat ara, inim atakam basakamtiwas opok. E nat, e Kristus asicimfomas, Allah, dar ow tarowat ara, inim atakam basakamtiwas ara. Bare, Allah e Yahudi jirmec ji bwe ow, ow tarowat ara, inim atakam basakamtiw opokut.

¹⁷Dar, Allah, dar ow tarowat ara, inim atakam basakamtiw, bare jak aserememfom. E Yesus ajamkawifom, bare eras cowok ara. Inimas aemfom, dar dosa ow ara, inimas aporfom. Dar e Yahudi opok dosa ow inim cimin aememfom aporfom. Inimas ara, Kristus dar dosa ow aemapomforow aranew? Inimas opok anakat!

¹⁸Bap ara, dar inim atakam ajamkawifom: “Allah, e Yahudi jirmec ji bwe ow, ow tarowat ara, inim atakam asakamtiwma.” Inim atakam ajamkawifom. Da nat, e atakam ajiwitiwfom. Bare, dar e atakam aojamkawicomnew, dar dosa ow ara, inim aporomcomom.

¹⁹Do nat, e Jirmec surat atakam do bajortew opok aporof. Inimas dor e Jirmec jirey boe opok aemof. Dor damir aafof inim cimin ara. Eras nat, dor Allah kerja bwemtam mememas ara. Bare, dor Kristus cowkon, e salib os op damir aafof inim cimin ara.

²⁰Inimas e tetakay awamceyas, dor opok. Er Kristus e dojak aman aemapmanas ara. Bare, dor Allah atiw asicimamin. Inimas wow awamceyas aemamin. E aramat ipic damos dor ajiomfan. Aram damir dor aaftamfan.

²¹Bare, dor e Allah e asan akat mami atetamamarowas botpem opok. Allah e Jirmec surat atakam ji bwe ow, ow tarowat ara, inim atakam basakamtiw ayaw, bare Kristus damir desen aafef.