Read Central Asmat GALATIA 3 Bible Online

GALATIA 3 - Central Asmat bible

GALATIA 3

¹Awapokom Galatia owa. Car jen ow awapokom ara. E tot car aotfan ow cam? Car Yesus Kristus e salib os op damir aafef atakam, jen umutonnakut emejifokom.

²Ca nat, a atakamnakap cowok mamotawcan. Car e Jirmec surat atakam ji aefokom, wunam Roh Kudus e cajak aman afiwaptotorfan, inim aranew? Car e Atakam Akat asicimfokom, wunam Roh Kudus e cajak aman afiwaptotorfan, inim aranew?

³Car jen awutut ucimaram? Car Yesus Kristus ajamkawifokom, e Roh Kudus car ay jak atetamtotorfan. E nat, car wow ow tarowatnak carma mememkurum, inim aranew?

⁴E awutut ajurusemfokomas, desenas aranew? Er desenas arapok.

⁵Allah e Roh car atetamaman. Aram junum bweas awut car aemtamaman. Car e Jirmec surat atakam ji aefokom, wunam Allah eras car aemfan, inim aranew? Car e Atakam Akat asicimfokom, wunam Allah eras aemfan, inim aranew?

⁶Er e Alkitab atakam jipu ara: “Abraham Allah asicimefen. Inimas Allah, aramat ipic, jipic tarowat ara, inim atakam asakamtiwefen.” Inim aema.

⁷Bare, e Allah asicimames ow, Abraham arurpisnak ara. Caram inimas baporkurumey.

⁸E wun Alkitab atakam, e Allah e Abraham atakam aotawefas ara: “Or asicimaman. Wun samat arkeam or cimin asicimcemenes. Doram asan akat e ow takas aomcimin.” Inim aeefen. Abraham inim atakam jen ajief ara, ar e Atakam Akat jen bap a takam ajiefen. Bare, Allah e atakam aotawef ara, ar e aemcowas atakam bap a takam aotawefen. E aemcowas ara, bare e Yahudi opok ow e aramat ipic asicimces, ar e ow, ow tarowat ara, inim atakam asakamtiwcema.

⁹Bare, Abraham, Allah asicimefen. Inimas Allah asan akat e aramat ipic aomefen. Allah, e ar asicimames ow takasam, asan akat, e Abraham inim cimin aomama.

¹⁰E Alkitab atakam, “Ow e Jirmec surat aeapomfes. Allah, e Jirmec surat atakam takas ji bwekurum opok ow, siksa aemcema.” Inim aema. Wun ow nat, “Dor e Jirmec surat atakam ji aecey, Allah dor ajortewceman,” inim bi binip aceceremames. Allah nat, e ow siksa aemcema.

¹¹E Alkitab atakamam, “Allah, e ar asicimames ow, ow tarowat ara, inim atakam asakamtiwma. Inimas e ow jiwnenak aatamemawarcemes.” Inim aema. Dar masirin Allah, e Jirmec surat atakam ji bwe ow, ow tarowat ara, inim atakam basakamtiw opok, bare atakam umuton cowok apormom ara.

¹²E Jirmec surat atakam, “Ow e Jirmec takas ji aekurumces, ar jiwnenak aatamemawarcemes,” inim aema. Bare, e Jirmec surat aropas ara. E Allah basicimam aropas ara.

¹³Allah, e Jirmec surat atakam ji bwekurum opok ow siksa aemcema. Kristus nat, juw auwuemforow. Allah siksa da bwemasin. Allah masirin, aramat ipic siksa aemef. Inimas Kristus e Allah siksa aemcarowas, asurumtamforow. Er e Alkitab atakam jipu ara: “Ow, kawey ow, os op atewtopomcesnew, Allah e aemtepces ow siksa aemcema.” E Alkitab inim aema.

¹⁴Bap ara, Allah, Abraham asan akat aomefen. Kristus, e Yahudi opok owam, inim asan akat bom, akat aemef. Inimas ar e salib os op ajurusemef. E aramat ipic basicim ow, e asan akat aomomcemes. Allaham Roh Kudus e ow batetam atayi aeef. E owam e Roh Kudus atewetcemes. Bare, Kristus inimas bwemtam akat aemef. Inimas ar e Allah siksa aemcarowas asurumtamforow.

¹⁵Dojowow akatonokom. Asmat jipic jamnuk atakam aamsakamces, ar e atakam bwemjiwitiw asan opok. Aram arop atakam e atakam bwemkawim asan apok.

¹⁶Bare, Allaham inim ara. E Alkitab atakam: “Allah, atayi, e Abrahamam, e arurpis ipicam, aeef.” E Alkitab inim aema. Er “arurpis ow,” inim atakam opok. “Arurpis ow,” bare ow arke ara. E nat, er “arurpis ipic” atakam ara. “Arurpis ipic,” bare jipic cowokut ara. E ipic Kristus ara.

¹⁷A atakam atawmin ara: Allah e a basicim ow bajortew atayi aeefen. “Dor e atayi aeminas jipu aemkurumcimin.” Inim atakam fak aotawefen. Inim atakam aotawef ara, ar tahun empat ratus tiga puluh ajiwar aememef, wunam e Jirmec surat atakam atatitamefen. E Jirmec surat atakam, e aramat ipic bap atayi aeefas bwemjiwitiw asan opok. Bare, e atayi aeefas inim aatamemamesawarma.

¹⁸Bare, Allah e a basicim ow bajortew, inim atayi aeefen. E nat, wun ow atakam, “Ow e Jirmec surat atakam ji aeces, Allah e ow ajortewcema,” inim aemes. E nat, e atakam, atakamnak ayaw, e Allah atayi aeefas, bare desenas ara. Bare, Allah atayi Abraham aeef araman. Inimas aram e atayi aeefas jipu Abraham aemtamefen.

¹⁹Allah, e Jirmec surat atakam atatitamef nat, ucimaram? E Jirmec, ow adosa baporomas ara. E Jirmecam e Abraham arurpis ipic aenawef jofay ajiwaras cowok ara. Bap ara, Allah e atayi, e ipic aeefen. Allaham, e Jirmec, malaikat atetamefen. E malaikat masirin, e Jirmec, asmat atakam bajomattam ipic aotetamfesen.

²⁰E nat, Allah e atayi aeef ara, ar atayi arma aeef. Aram atakam bajomat ipic janim manim opok.

²¹Inimas ara, e Jirmec surat atakam, arop atakam aranew? E Allah atayi aeefasam arop atakam aranew? Inimas arapok. E Jirmec, jiwneas, ow batetam ayaw, bare Allah e Jirmec ji bwe ow, ow tarowat ara, inim atakam emesakamtiwef.

²²E nat, e Alkitab atakam, “Ow takas e Jirmec aopowfes. Ar takas dosa aemfes.” Inim aema. Inimas ara, Allah, e atayi aeefas, e Yesus Kristus asicimames ow, atetamama.

²³Bap ara, e Kristus basicim jofay bwenaw opok ara, e Jirmec, e awapom asmat ow, aomomawiruw inim cimin ara. Dar Jirmec aman aemapawirum. Er Allah, e Kristus basicim aporomforow jofay ajiwar aemapawirumas ara.

²⁴Inimas ara, e Jirmec, manmok dar atiwawiruw inim cimin ara. Eras dar asep jofay Kristuspu batowocenas ara. Bare, Allah e Kristus basicim ow, ow tarowat ara, inim atakam asakamtiwma.

²⁵Wow nat, e Kristus basicim jofay emeenawef. Inimas e manmok batiwas, manmok dar botiw arapok.

²⁶Bare, car takas Kristus Yesus asicimfokom. Inimas car Allah atiperes ara.

²⁷Ow bwi car abwimfan ara, car Kristus ajamkawifokom. Inimas car Kristus inim cimin aememfokom.

²⁸E car Kristus ajamkawimokom ow takas, bare awcawor ara. Yahudi owam, Yunani owam, bare awcawor ara. Mami kerja bwemtam owam, arop kerja aemames owam, bare awcawor ara. Ower owam, cepesam, bare awcawor ara.

²⁹Car Kristus aras ara. Inimas caram Abraham arurpis ara. Allah masirin, e atayi aeefas car atetamceman.